សារព័ត៌មានស៊ីនហួរ នៅព្រឹកថ្ងៃអង្គារ ទី០៣ ខែកញ្ញា ឆ្នាំ២០១៩ បានផ្សាយថា អាជ្ញាធរអាមេរិកបានបញ្ជាក់ថា មនុស្សយ៉ាងហោចណាស់ ០៨នាក់បានបាត់បង់ជីវិត និង ២៦នាក់ទៀតនៅតែមិនទាន់រកឃើញដដែល បន្ទាប់ពីទូកសម្រាប់ដឹកភ្ញៀវមុជទឹកកម្សាន្តមួយគ្រឿង បានឆាបឆេះនៅក្បែរកោះសាន់តាគ្រូស (Santa Cruz) នៅភាគខាងត្បូងរដ្ឋកាលីហ្វរញ៉ាអាមេរិក ។ក្នុងចំណោមសាកសពអ្នកស្លាប់ទាំង ០៨នាក់ មាន០២នាក់ជាបុរស និង ០២នាក់ជាស្ត្រី ដែលត្រូវបានស្រង់ចេញពីក្នុងទឹក ខណៈ០៤នាក់ទៀត កំពុងត្រូវក្រុមការងារជួយសង្រ្គោះ។
គួរជម្រាបថា ទូកខាងលើដែលមានឈ្មោះ ខុនសិបសិន (Conception) បានចាកចេញពីទីក្រុង សាន់តាបាបារ៉ា (Santa Barbara) នៃរដ្ឋកាលីហ្វរញ៉ាកាលពីថ្ងៃសៅរ៍ចុងសប្តាហ៍មុន សម្រាប់ការធ្វើដំណើរកម្សាន្តមុជទឹករយៈពេល ០៣ថ្ងៃ ដោយទូកនេះបានគ្រោងនឹងត្រឡប់ទៅកាន់ដីគោកវិញ នៅព្រឹកថ្ងៃអង្គារសប្តាហ៍នេះ ប៉ុន្តែបែរជាជួបភាពអកុសល្យ។ បច្ចុប្បន្នក្រុមសង្គ្រោះនៅតែកំពុងតាមរកមនុស្ស ២៦នាក់ទៀតដែលកំពុងបាត់ខ្លួន។
ប្រភពដដែល បានបន្តថា នាវាមុជទឹកនោះ ដឹកមនុស្សសរុបប្រហែល៤០នាក់។ រីឯមូលហេតុ នៃគ្រោះអគ្គិភ័យនេះ គេមិនទាន់ដឹងនោះទេ ខណៈមន្រ្ដីជំនាញកំពុងដំណើរការស៊ើបអង្កេត និងស្រាវជ្រាវ។
សេចក្តីថ្លែងការណ៍របស់ឆ្មាំការពារដែនសមុទ្រក្នុងតំបន់ បានបញ្ជាក់ថា ភ្លើងបានឆាបឆេះនៅលើនាវាមុជទឹក ឈ្មោះ Conception ដែលមានប្រវែង២៣ម៉ែត្រនោះ នៅវេលាម៉ោង៣ និង១៥នាទីរំលងអធ្រាត្រ ខណៈនាវា ទើបតែចាប់ផ្តើម ចេញពីកំពង់ផែដែនកោះ Santa Cruz រដ្ឋកាលីហ្វ័រនីញ៉ា សហរដ្ឋអាម៉េរិក។
ដោយឡែក នាវិក៥នាក់ នៅលើនាវានោះ បានគេចខ្លួន ផុតពីភ្លើងឆេះះ ខណៈអ្នកដំណើរកំពុងលង់លក់ នៅក្នុងដំណេក នៅជាន់ខាងក្រោម។ រីឯក្រុមនាវិកទាំងនោះ ក៏បានស្វែងរកជំនួយសង្គ្រោះបន្ទាន់។ ភ្លាមៗនោះ ក្រុមជួយសង្គ្រោះបានទៅដល់ ហើយភ្លើងបានឆាបឆេះយ៉ាងឆាប់រហ័ស ហើយភ្លាមៗនោះ គេបានរកឃើញសាកសពជនរងគ្រោះ៤នាក់ ខណៈអ្នកផ្សេងទៀតកំពុងតែបាត់ខ្លួន។
ក្រុមហ៊ុនប្រតិបត្តិការដឹកជញ្ជូនកម្សាន្តតាមនាវាមុជទឹក មានមូលដ្ឋាន នៅកាលីហ្វ័រនីញា សហរដ្ឋអាមេរិក បានបញ្ជាក់នៅលើគេហទំព័ររបស់ខ្លួនថា នាវា Conception បានធ្វើដំណើរ រយៈពេល៣ថ្ងៃ ឆ្ពោះទៅកាន់ដែនកោះ Channel ហើយនាវានោះនឹងត្រូវត្រឡប់មកកាន់កំពង់ផែទីក្រុង Santa Barbara កាលីហ្វ័រនីញ៉ាវិញ នៅថ្ងៃចន្ទ ទី១ ខែកញ្ញា៕
