ខេត្តកោះកុង ៖ ប្រភពព័ត៌មានពីខេត្តកោះកុងបានឲ្យដឹងថា មានករណីបាក់ស្រុតផ្លូវជាតិលេខ៤៨ បណ្តាលឲ្យខូច និងដាច់ជាដុំៗ ច្រើនកន្លែងខណៈមានជំនន់ទឹកភ្លៀវធ្លាក់យ៉ាងខ្លាំង កាលពីថ្ងៃ អង្គារ ៤រោច ខែភទ្របទ ឆ្នាំ កុរ ឯកស័ក ព.ស.២៥៦៣ ត្រូវនឹងថ្ងៃទី១៧ ខែកញ្ញា ឆ្នាំ២០១៩ នៅត្រង់ចំណុចបង្គោលគីឡូលេខ៤២ ស្ថិតក្នុងស្រុកបូទុមសាគរ ខេត្តកោះកុង ។
ពាក់ព័ន្ធនឹងហេតុការណ៍ខាងលើអាជ្ញាធរ ស្រុកបុទុមសាគរ បានអនុញ្ញាតឲ្យរថយន្តតូចៗអាចឆ្លងកាត់ផ្លូវជាតិលេខ៤៨បាន ប៉ុន្តែលើកលែងតែរថយន្តធុនធំៗ ពុំអាចអនុញ្ញាតឲ្យឆ្លងកាត់បាននោះទេ ហើយខណៈពេលនោះ មន្ត្រីជំនាញបានចុះធ្វើការត្រួតពិនិត្យនៅកន្លែងកើតហេតុបាក់ស្រុតផ្លូវជាតិនេះផងដែរ ។
រដ្ឋបាលស្រុកបូទុមសាគរ បានជម្រាបជូនដល់បងប្អូនប្រជាពលរដ្ឋទាំងអស់ដែលបានធ្វើដំណើរនៅលើផ្លូវជាតិលេខ៤៨ នេះ សូមមានការប្រុងប្រយ័ត្ន ដោយសារតែមានការបាក់ផ្លូវ និងស្ពានពីចំណុចបឹងមាស ស្ថិតក្នុងភូមិព្រលាន ឃុំកណ្ដោល ស្រុកបូទុមសាគរ ខេត្តកោះកុង មានប្រវឺងជាង៥គីឡូម៉ែត្រ ។
រដ្ឋបាលស្រុកបូទុមសាគរ បានបញ្ជាក់ថា នៅថ្ងៃទី១៧ ខែកញ្ញា ឆ្នាំ២០១៩ អាជ្ញាធរភូមិ-ឃុំ បានធ្វើការបិទផ្លូវនេះមួយរយៈដើម្បីឲ្យខាងជំនាញធ្វើការជួសជុលជាបន្ទាន់ ហើយក្នុងរយៈ៣ថ្ងៃយ៉ាងយូរនិងជួសជុលជាស្ថាពរឲ្យដំណើរការឡើងវិញ ៕
