ខេត្តសៀមរាប ៖ រថយន្តដឹកខ្សាច់ខ្នាត ធំមួយគ្រឿងបានដឹកលើសទម្ងន់បានលួចចូលក្នុងក្រុងសៀមរាប បណ្តាលឲ្យផុងខូច ផ្លូវកៅស៊ូដែលទើបនឹងសាងសង់ថ្មី។ ហេតុការណ៍រថយន្តដឹកខ្សាច់កិនខូចផ្លូវនេះបានកើតឡើងនៅ វេលាម៉ោង៩ព្រឹកថ្ងៃទី២០ ខែកញ្ញា ឆ្នាំ២០១៩ ស្ថិតនៅតាមបណ្តាយផ្លូវ៣០ម៉ែត្រ ក្នុងភូមិទក្សិណខាងត្បូង សង្កាត់គោកចក ក្រុងសៀមរាប ។
មន្ត្រីនគរបាលចរាចរណ៍ផ្លូវគោក នៃ ស្នងការដ្ឋានខេត្តសៀមរាប បានឲ្យដឹងថា ករណីខូចផ្លូវនេះសមត្ថកិច្ចជំនាញបាន ទទួលបទបញ្ជាពីថ្នាក់ដឹកនាំខេត្តឲ្យអូស រថយន្តដឹកខ្សាច់ខាងលើមកកាន់ស្នងការ ដ្ឋាននគរបាលខេត្ត ដើម្បីរង់ចាំដោះស្រាយគ្នាតាមផ្លូវច្បាប់។ មន្ត្រីដដែលបន្តថាផ្លូវ ខូចនោះមានប្រវែង៣៦,៥ម៉ែត្រ និងផុង ខូចកៅស៊ូមានជម្រៅ០,៥ម៉ែត្រ ស្ថិតនៅ តាមបណ្តាយផ្លូវ៣០ម៉ែត្រ ក្នុងភូមិទក្សិណ ខាងត្បូង សង្កាត់គោកចក ក្រុងសៀមរាប។ មន្ត្រីបន្តថា ចំពោះអ្នកបើកបរត្រូវបាននាំ ខ្លួនយកទៅសួរនាំនៅសាលាខេត្ត ដើម្បីមានចំណាត់ការបន្ត។ មន្ត្រីបន្ថែមថា ឈ្មោះ អ្នកបើកបរនិងក្រុមហ៊ុនដឹកខ្សាច់មិនទាន់ដឹងនៅឡើយ គ្រាន់តែដឹងថាអ្នកបើកបរនោះជាយោធា នៅកងពលធំអន្តរាគមន៍ លេខ២ ហើយរថយន្តនោះមានស្លាកលេខ បាត់ដំបង3A-0648។
អភិបាលរងខេត្តសៀមរាប និងជាអ្នក នាំពាក្យខេត្តសៀមរាប លោក លី សំរិទ្ធ បានឲ្យដឹងតាមទូរស័ព្ទថា ពេលនេះអាជ្ញាធរខេត្តបានហៅអ្នកទទួលការងារមកធ្វើឡើងវិញ ព្រោះផ្លូវនេះធ្វើមិនទាន់រួចរាល់ នៅឡើយទេ។ លោកបន្តថា ចំពោះអ្នកបើកបរនោះខាងខេត្តក៏បានហៅមកជួប ដើម្បី ដោះស្រាយតាមផ្លូវច្បាប់ផងដែរ។ លោកបន្ថែមថា រាល់រថយន្តធំៗចូលក្នុងក្រុងសៀមរាបបានរាល់ថ្ងៃនេះ អាជ្ញាធរចម្រុះបានដាក់ ស្លាកសញ្ញាហាមឃាត់ដែរ តែពួកគេចេះតែបំពាន។ លោកបន្ថែមថា អ៊ីចឹងទេអាជ្ញាធរ ទាំងអស់ត្រូវរួមគ្នាចាត់ការរឿងនេះ ដោយ ជួយមើលគ្នាផង ព្រោះខេត្តនិងជំនាញមិនអាចមើលគ្រប់កន្លែងបានទេ។
លោកអភិបាលរងថា ចាប់ពីភូមិ ឃុំត្រូវរាយការណ៍មកសមត្ថកិច្ចជំនាញពាក់ព័ន្ធ ទើបកិច្ចការនេះទទួលបានជោគជ័យ។
ប្រភពព័ត៌មានបានឲ្យដឹងថា រថយន្តខាងលើនេះ គឺជាកម្មសិទ្ធិរបស់ក្រុមហ៊ុន អេង សុខហ្គិច ដែលជាស្ត្រីជើងខ្លាំងអ្នក ជំនួញបូមខ្សាច់ និងកាយថ្មភ្នំ លក់ដ៏ល្បី ល្បាញម្នាក់ក្នុងខេត្តសៀមរាប ដែលគ្មាន នរណាម្នាក់ហ៊ានប៉ះពាល់នោះទេ ។ ដោយគេខ្លាចអំណាចរបស់ឪពុក អតីតប្រធាន សភាពាណិជ្ជកម្មខេត្តសៀមរាប។
ប្រភពបន្តថា ផ្លូវនេះអាជ្ញាធរខេត្តជា អ្នកទទួលខុសត្រូវឲ្យក្រុមហ៊ុនមួយជាអ្នកស្ថាបនាផ្លូវនេះគ្មានគុណភាព ។
នៅក្នុងបណ្តាញទំនាក់ទំនងសង្គមហ្វេសប៊ុកបានចែករំលែក,ការបញ្ចេញមតិមានទាំងការកោតសរសើរនិងរិះគន់ ចំពោះទិដ្ឋភាពដែលបានឃើញ ។ រថយន្តដឹកខ្សាច់ធំមួយគ្រឿង បើកបរលើផ្លូវថ្នល់បណ្តាលឲ្យកិន ដាច់ផ្លូវកៅស៊ូ ចូលជម្រៅប្រហែល២តឹក ទើបអ្នកបើកបររថយន្តលែងបន្តដំណើរ ។ រូបភាពបែបនេះ គឺជាទារុណកម្មយ៉ាងធ្ងន់ធ្ងរ ចំពោះផ្លូវដែលទើបកសាងថ្មី ។
មតិរិះគន់ជាច្រើនបានលើកឡើងថា មិនមែនដោយសាររថយន្តដឹកខ្សាច់នោះធ្ងន់ទេ ប៉ុន្តែគឺដោយសារផ្លូវដែលធ្វើនោះមិនគោរពទៅតាមស្តង់ដារ ។ ការធ្វើផ្លូវគ្មានគុណភាពជាហេតុធ្វើឲ្យបង្កគ្រោះថ្នាក់ឬហានិភ័យផ្សេងសម្រាប់ យានយន្តធ្វើដំណើរតាមដង ផ្លូវ ។ ជាក់ស្តែងរថយន្តដែលជាប់គាំងទៅមុខលែងរួចនេះ ដោយសារតែផ្លូវគ្មានគុណ ភាព មិនមែនដោយសាររថយន្តធ្ងន់ពេកនោះទេ ។ ដូច្នេះមន្ទីរសាធារណការ និងដឹកជញ្ជូនខេត្តសៀមរាបគួរធ្វើផ្លូវ បែបណាសម្រាប់រថយន្តធ្ងន់ៗដូចជារថយន្តដឹកខ្សាច់ខាងលើនេះ ។
មតិខ្លះបានលើកឡើងថា អំណាចម្ចាស់រថយន្តដឹកខ្សាច់ដ៏ធំមហិមានៅខេត្តសៀមរាបល្បីរាប់សិបឆ្នាំមកហើយនោះ គ្រាន់តែដឹកប៉ុណ្ណឹងមានអីខុសឆ្គង ឬត្រូវរិះគន់? អ្នកខ្លះនិយាយថា ថៅកែខ្សាច់ដ៏មានឥទិ្ធពល និងមានអំណាចម្នាក់នេះ គឺគ្រប់ជំនាន់អាជ្ញាធរខេត្ត គ្មាននរណាហ៊ានប៉ះពាល់នោះឡើយ ។ ដូច្នេះវាជារឿងធម្មតាសម្រាប់ការបំផ្លិចបំផ្លាញសម្បត្តិសាធារណរបស់ រដ្ឋបន្តិចបន្តួចប៉ុណ្ណេះនៅខេត្តសៀមរាប ៕
