ចាប់ប្រធានសហគមន៍រ៉ែមាសចុងផ្លាស់ក្រោយរកឃើញ ឈើជាច្រើនម៉ែត្រគូបលាក់នៅក្នុងរោងអាជីវកម្មរ៉ែមាស

ចែករំលែក៖

ខេត្តមណ្ឌលគិរី ៖ នៅក្នុងប្រតិបត្តិការចុះបង្រ្កាបបទល្មើសធនធានធម្មជាតិព្រៃឈើរបស់គណៈកម្មការ ថ្នាក់ជាតិ និងថ្នាក់ ខេត្តមណ្ឌលគិរី បានបន្តបេសកកម្ម របស់ខ្លួនចុះស្រាវជ្រាវលើបទល្មើសផ្សេងៗ រួម មាន៖ ព្រៃឈើ និងរ៉ែមាសផងដែរ។ ជា លទ្ធផលសមត្ថកិច្ចចម្រុះបានឃាត់ខ្លួនលោក តែ គឹមសាន ប្រធានសហគមន៍រ៉ែ មាសចុងផ្លាស់ សង្ស័យជាប់ពាក់ព័ន្ធបទល្មើសមួយចំនួនដែលខុសច្បាប់។
ការឃាត់ខ្លួនលោក តែ គឹមសាន មាន កម្លាំងកងរាជអាវុធហត្ថខេត្ត សហការជាមួយ កងកម្លាំងជំនាញជាច្រើនដឹកនាំដោយលោក ចឹង សុចន្ថា អភិបាលរងខេត្តមណ្ឌល​គិរី កាល ពីល្ងាចថ្ងៃទី២០ ខែកញ្ញា ឆ្នាំ​២០១៩ក្នុងឃុំ ចុងផ្លាស់ ស្រុកកែវសីមា ខេត្តមណ្ឌលគិរី។
លោក ហែម បូណារ៉ែល មេបញ្ជាការ​កងរាជអាវុធហត្ថខេត្តមណ្ឌលគិរីថ្លែងនៅព្រឹកថ្ងៃទី២១ ខែកញ្ញា ឆ្នាំ២០១៩នេះថា ពិតជាមានការ ឃាត់ខ្លួនជនសង្ស័យនេះ​មែន ដោយសារមន្រ្តីជំនាញចម្រុះខេត្ត បានរកឃើញការស្តុកលាក់ទុកឈើជាច្រើនម៉ែត្រគូប ជាវត្ថុតាងនៅក្នុងរោងអាជីវកម្មរ៉ែមាសរបស់គាត់ ហើយជនសង្ស័យ ត្រូវ​បាន សមត្ថកិច្ចបញ្ជូនទៅកាន់បញ្ជាការដ្ឋានកងរាជអាវុធហត្ថខេត្ត ដើម្បីបន្តនីតិវិធី។
លោក ចឹង សុចន្ថា អភិបាលរងខេត្ត មណ្ឌលគិរី ទទួលបន្ទុកប្រធានគណៈកម្មការបង្រ្កាបធនធានធម្មជាតិខេត្ត បានប្រាប់ ផងដែរថា ការឃាត់ខ្លួនជនសង្ស័យរូបនេះ ក្រោយកម្លាំងជំនាញស្រាវជ្រាវរកឃើញ បុគ្គលនេះ មានការស្តុកទុកឈើគ្រប់ប្រភេទ ជាច្រើនម៉ែត្រគូប។
លោក ស្វាយ សំអ៊ាង អភិបាលខេត្ត​មណ្ឌល​គិរី បានថ្លែងថា ករណីនេះទុកឲ្យខាងមន្រ្តីអនុវត្តច្បាប់ចាត់ការឲ្យបានតឹង រ៉ឹងបំផុតរាល់បទល្មើស ឬបុគ្គលណាដែលបានប្រព្រឹត្តផ្ទុយនឹងច្បាប់មិនថា អ្នកក្រ ឬអ្នកមានលុយនោះទេ អ្នកប្រព្រឹត្តខុស​ត្រូវទ​ទួលទោស មិនមែនអ្នកមានប្រាក់ ឬអាងនេះ អាងនោះនោះ រួចខ្លួននោះទេ ដើម្បីស្របទៅតាមប្រទេសមានច្បាប់ គ្រួសារមានវិន័យ។
រហូតមកដល់ព្រឹកថ្ងៃទី២១ ខែកញ្ញា ឆ្នាំ២០១៩នេះ មន្រ្តីជំនាញកំពុងបន្តនីតិ វិធីរបស់ខ្លួន ដើម្បីធ្វើការបញ្ជូនជនសង្ស័យទៅកាន់អយ្យការសាលាដំបូងខេត្តមណ្ឌល គិរី ចាត់ការបន្តទៀត៕ ហេង នរិន្ទ្រ


ចែករំលែក៖
ពាណិជ្ជកម្ម៖ ads2 ads3 ambel-meas ads5 ads6 scanpeople ads7 fk Print