ខេត្តពោធិ៍សាត់ៈ ប្រជាពលរដ្ឋរាយការណ៍មកថា ឃើញមន្ត្រីបរិស្ថានដែនជំរកសត្វព្រៃភ្នំឱរ៉ាល់ខេត្តពោធិ៍សាត់ ចុះបង្ក្រាបរោងម៉ាស៊ីនអាឈើខុសច្បាប់ ដោយដុតកំទេចអាចម៌រណា និងជំរាកឈើចោលនៅនឹងកន្លែង ត្រូវបានគេសង្ស័យថាជាការចរចាលុយកាក់មិនត្រូវរូវគ្នា ។
ប្រភពខាងលើបន្តថា ប្រតិបត្តិការមន្ដ្រីបរិស្ថានចុះបង្ក្រាបរោងម៉ាស៊ីនអាឈើអាណាធិបតេយ្យខាងលើ ប្រព្រឹត្តឡើងកាលពីថ្ងៃទី២៧ ខែធ្នូ ឆ្នាំ២០១៥ ត្រង់ចំណុចក្នុងព្រៃភ្នំតំបន់ហាមឃាត់ ជាប់ព្រំប្រទល់ខេត្តកំពង់ស្ពឺក្នុងខេត្តពោធិ៍សាត់ ។
ប្រភពបន្តទៀតថា ពាក់ព័ន្ធនឹងមន្ដ្រីបរិស្ថានដែនជំរកសត្វព្រៃភ្នំឱរ៉ាល់ខេត្តពោធិ៍សាត់ ដឹកនាំដោយលោក ប៉ាន់ មរកត ប្រធានស្ដីទីមន្ទីរបរិស្ថានខេត្តពោធិ៍សាត់ និងជានាយកដែនជំរកសត្វព្រៃភ្នំឱរ៉ាល់ខេត្តពោធិ៍សាត់ ធ្វើការបង្ក្រាបខាងលើនោះ គេមិនដឹងអំពីលទ្ធផលក្នុងការបង្ក្រាបនោះឡើយ ដោយមានការលាក់លាម ហើយការបង្ក្រាបខាងលើនេះ ដោយគេសង្ស័យថា ជាការចរចាថ្លៃថ្នូរលុយកាក់គ្នាមិនត្រូវ ។
ពាក់ព័ន្ធនឹងប្រភពរាយការណ៍ខាងលើ នៅរសៀលថ្ងៃទី២៩ ខែធ្នូ ឆ្នាំ២០១៥ នគរវត្តមិនអាចសុំការពន្យល់តាមទូរស័ព្ទពីលោក ប៉ាន់ មរកត ប្រធានស្ដីទីមន្ទីរបរិស្ថានខេត្តពោធិ៍សាត់ និងជានាយកដែនជំរកសត្វព្រៃភ្នំឱរ៉ាល់ខេត្តពោធិ៍សាត់បានទេខណៈលោកប្រាប់ថា ជាប់រវល់ជាមួយចៅហ្វាយខេត្ត ៕
ដោយ៖ ប៉ឹម ពិន
