ភ្នំពេញ៖ ជនសង្ស័យប្រុស ស្រីចំនួន៥នាក់ដែលជាប់ពាក់ពន្ធ័នឹងករណីជួញដូរគ្រឿងញៀននៅមុខពេទ្យលោកសង្ឃនោះ ត្រូវកំលាំងមន្ទីរប្រឆាំងបទល្មើសគ្រឿងញៀនក្រសួងមហាផ្ទៃបង្ក្រាបកាលពីវេលាម៉ោង០៤រសៀល ថ្ងៃទី២៩ ខែធ្នូ ឆ្នាំ២០១៥ នៅចំណុចក្រុម១១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ករណីនេះដឹកនាំដោយលោកវរសេនីឯក ធី សារ៉ាត់ នាយករងមន្ទីរប្រឆាំងគ្រឿងញៀងក្រសួងមហាផ្ទៃ និងមានការសម្របសម្រួលពីលោកព្រះរាជអាជ្ញារងអមសាលាដំបូងរាជធានីភ្នំពេញ ។
សមត្ថកិច្ចបានអោយដឹងថា ជនសង្ស័យទាំង៥នាក់ដែលឃាត់ខ្លួននោះទី១មានឈ្មោះ មិស មាន ភេទប្រុស អាយុ៣១ឆ្នាំ ជាម្ចាស់ផ្ទះ និងជាអ្នកលក់ថ្នាំញៀន ទី២ឈ្មោះ សាយ ស្រីមុំ ភេទស្រី អាយុ២៤ឆ្នាំត្រូវជាប្រពន្ធ មុខរបរលក់ដូរនៅផ្ទះខាងលើ មានស្រុកកំណើត ស្រុកកោះធំ ខេត្តកណ្តាល ទី៣ឈ្មោះ ភួង សុភក្រ័ ភេទប្រុស អាយុ១៨ឆ្នាំ មុខរបរ សិស្ស ស្នាក់នៅភូមចំរើនផល សង្កាត់ស្ទឹងមានជ័យ ខណ្ឌមានជ័យ ទី៤ឈ្មោះ ចំរើន រ៉ា ភេទប្រុស អាយុ២០ឆ្នាំ មុខរបរ និងស្នាក់នៅមិនពិតប្រាកដ និងទី៥ឈ្មោះ លួង ឃួន ភេទប្រុស អាយុ២២ឆ្នាំ មុខរបរចែកចាយគ្រឿងញៀន ស្នាក់នៅឃុំព្រះស្តេច ស្រុកព្រះស្តេច ខេត្តព្រៃវែង។
ប្រភពពីសមត្ថកិច្ចបានអោយដឹងទៀតថា សម្ភារដកហូតមានម៉ូតូ៤គ្រឿង ថ្នាំញៀនប្រភេទក្រាមថ្លាសចំនួន២កញ្ចប់ធំ រួមនិងឧបករណ៍សម្រាប់ប្រើប្រាស់មួយចំនួន។
បច្ចុប្បន្នជនសង្ស័យ រួមនឹងវត្ថុតាងត្រូវបញ្ជួនទៅកាន់មន្ទីរប្រឆាំងគ្រឿងញៀនក្រសួងមហាផ្ទៃដើម្បីចាត់ការតាមនិតិវិធីបន្ត ៕
ដោយ៖ តុង សីហា
