ភ្នំពេញ៖ ជិះម៉ូតូបញ្រ្ចាសទិសដៅចរាចរណ៍ឆ្លងផ្លូវមិនផុតត្រូវម៉ូតូមួយគ្រឿងទៀតជិះក្នុងល្បឿនលឿនដែលស្របផ្លូវជ្រុលមកបុកចំពីហៀងបណ្តាលឲ្យរងរបួសស្រាល៣នាក់ កាលពីវេលាម៉ោង១១ និង៣០យប់ ថ្ងៃទី៣១ ខែធ្នូ ឆ្នាំ២០១៥ នៅជិតស្ថានីយបូមទឹកបឹងត្របែក ផ្លូវ២៧១ សង្កាត់ផ្សាដើមថ្កូវ ខណ្ឌចំការមន ។
ប្រភពព័ត៌មានបានឲ្យដឹងថា មុនពេលកើតហេតុ មានបុរស២នាក់ជិះម៉ូតូម៉ាកវីវ៉ា ពណ៌ក្រហម ពាក់ស្លាកលេខ កំពង់ចាម1D-0261 ធ្វើដំណើរតាមផ្លូវ២៧១ ទិសដៅពីកើតទៅលិច ក្នុងល្បឿនលឿនហើយស្រវឹង ។ ចំណែកម៉ូតូម៉ាក សង់កូរ៉េ ពណ៌ក្រហម ពាក់ស្លាកលេខ កំពង់ចាម1E-9931 បើកបរដោយបុរសម្នាក់តាមផ្លូវ២៧១ ទិសដៅពីលិចទៅកើត ដោយជិះនៅខាងឆ្វេងដៃបញ្ច្រាសទិសចរាចរណ៍ បានស៊ីញ៉ូបត់ស្តាំឆ្លងផ្លូវទៅខាងស្តាំវិញ ស្រាប់តែម៉ូតូវីវ៉ាបើកលឿនពេកជ្រុលទៅបុកចំហៀងខាងក្រោយ ផ្នែកខាងស្តាំ ធ្វើឲ្យអ្នកជិះម៉ូតូម៉ាកវីវ៉ា រងរបួស រលាត់ដៃជើង និងមុខ រងរបួសស្រាលទាំង២នាក់ ចំណែកអ្នកបើកម៉ូតូសង់កូរ៉េរងរបួសស្រាលដែរ ប៉ុន្តែបានរត់ចោលម៉ូតូនៅកន្លែងកើតហេតុ ។
ក្រោយពេលហេតុភាគីខាងម៉ូតូវីវ៉ាមិនចង់ទាមទារសំណងទេចង់យកម៉ូតូទៅជួសជុល និងព្យាបាលរបួសខ្លួនឯង ប៉ុន្តែដោយសារតែភាគីខាងម៉ូតូសង់កូរ៉េ រត់ចោលម៉ូតូអត់នៅ ទើបសមត្ថកិច្ចវាស់វែង យកទៅរក្សាទុកនៅអធិការខណ្ឌចំការមនរងចាំដោះស្រាយតាមក្រោយ ៕
...
ដោយ៖ ភារ៉ា ដង្កោ
