ខេត្តសៀមរាប: មន្ត្រីសាខាកាំកុងត្រូលខេត្តសៀមរាប ដោយបានការសហការពីមន្ត្រីពាណិជ្ជកម្មខេត្ត មន្រ្តីអាកាសយានដ្ឋានអន្តរជាតិខេត្តជាតិសៀមរាប និងគណ:កម្មការផ្សារ បានចុះត្រួតពិនិត្យ និងផ្សព្វផ្សាយអំពីគុណភាព សុវត្ថិភាពម្ហូបអាហារ ដែលមានដាក់តាំងលក់នៅក្នុងផ្សារពីរកន្លែងក្នុងក្រុងសៀមរាប ដោយរកឃើញទំនិញខូចគុណភាពជាច្រើនហើយបានដកហូតយកទៅកម្ទេចចោល ។
ការចំត្រួតពិនិត្យទំនិញរបស់ស្ថាប័នសាខាកាំកុងត្រូលខេត្តសៀមរាបនេះបានប្រព្រឹត្តទៅកាលពី ថ្ងៃ អង្គារ ៩រោច ខែអស្សុជ ឆ្នាំ កុរ ឯកស័ក ព.ស.២៥៦៣. ត្រូវនឹងថ្ងៃទី ២២ ខែ តុលា ឆ្នាំ២០១៩ នៅផ្សារសម្ដេចតេជោដើមក្រឡាញ់ ដែលមានទីតាំងនៅភូមិត្រពាំងសេះ សង្កាត់គោកចក និងផ្សារទឹកវិល ស្ថិតនៅភូមិទឹកវិល សង្កាត់ទឹកវិល ក្រុងសៀមរាប ខេត្តសៀមរាប។
មន្រ្តីសាខាកាំកុងត្រូលខេត្តសៀមរាបបានឲ្យដឹងថា ក្នុងសកម្មភាពនេះ មន្ត្រីជំនាញ បានធ្វើតេស្តបឋម ដើម្បីរកសារធាតុគីមីហាមឃាត់មួយចំនួន ទៅលើផលិតផលម្ហូបអាហារដែលដាក់លក់ក្នុងផ្សារនោះបានចំនួន ៩គំរូ មានដូចជា៖ បង្គាថៃ ប្រហិតសាច់គោ ខ្ញីហាន់រួច មីលឿង សរសៃលត គុយទាវបាញ់កាញ់ សណ្ដែកបណ្ដុះ ស្ពៃជ្រក់ និងអំបិល ជាដើម។ ជាមួយគ្នានោះ មន្ត្រីជំនាញ បានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារផងដែរ ។
មន្រ្តីសាខាកាំកុងត្រូលខេត្តសៀមរាបបានឲ្យដឹងទៀតថា ជាលទ្ធផលក្នុងប្រតិបត្តការនេះមន្ត្រីជំនាញ បាន រកឃើញទំនិញខូចគុណភាព និងហួសកាលបរិច្ឆេទប្រើប្រាស់រួមមាន៖ ប្រហិតចំនួប ៨ កញ្ចប់ ស្មើនឹង ៨ គីឡួក្រាម ហតដកចំនួន ៧ កញ្ចប់ ស្មើនឹង ៥ គីឡូក្រាម ម្សៅស៊ុបចំនួន ៩ កញ្ចប់ ស្មើនឹង ៩ គីឡូក្រាម ស្រាបៀរកំប៉ុងចំណុះ ៣៣០ មីលីលីត្រចំនួន ៩១ កេស ស្មើនឹង ៧២០.៧២ លីត្រ ទឹកក្រូចកំប៉ុងចំណុះ ៣៣០ មីលីលីត្រចំនួន ១២ កេស ស្មើនឹង ៩៥.០៤ លីត្រ ទឹកក្រូចដបចំនួន ១៤ ដប ស្មើនឹង ១៨ លីត្រសរុប ភេសជ្ជៈនិងទំនិញហូបចុកផ្សេងៗខូចគុណភាពដែលមន្ត្រីជំនាញដកហូតបានចំនួន ៨៣៣.៧៦ លីត្រ និង ២២ គីឡូក្រាម។
បន្ទាប់មក មន្ត្រីកាំកុងត្រូលបានធ្វើកំណត់ហេតុដកហូត ទំនិញទាំងនោះយកទៅកម្ទេចចោលភ្លាមៗតាមនីតិវិធី។ ទន្ទឹមនឹងនោះមន្ត្រីជំនាញក៏បានធ្វើការណែនាំដល់អាជីវករផ្សេងទៀត ឱ្យយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀតផង ៕
