ខេត្តរតនគិរី៖ ក្មេងស្រីអាយុ១០ឆ្នាំម្នាក់បានបាត់បង់ជីវិត និងមនុស្ស៧នាក់ផ្សេងទៀតបានរងរបួសធ្ងន់ និងស្រាល បន្ទាប់ពីហេតុការណ៍ក្រឡាប់រថយន្តហាយឡែនឌ័រ ដែលវាក់នឹងអ្នកដំណើរឆ្លងផ្លូវ ហើយអ្នកបើកបរបានចាប់ហ្វ្រាំងបង្ខំ ទើបបណ្តាលឲ្យរថយន្តក្រឡាប់ជាច្រើនត្រឡប់ ។
ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង១និង៣០នាទីរសៀល ថ្ងៃទី៣១ ខែធ្នូ ឆ្នាំ២០១៥ ស្ថិតនៅតាមបណ្តោយផ្លូវជាតិលេខ៧៦ ភូមិព្រួកស្រែទាហាន ឃុំប៉ាតាង ស្រុកលំផាត់ ខេត្តរតនគិរី ។
លោក អ៊ុច សាវុទ្ធ អ្នកយកព័ត៌មានរបស់មជ្ឈមណ្ឌលព័ត៌មាននគរវត្តប្រចាំនៅខេត្តរតនគិរីដែលចុះយកព័ត៌មានដល់កន្លែងកើតហេតុនោះបានរាយការណ៍ថា ក្នុងករណីនេះបណ្តាលឲ្យក្មេងស្រីម្នាក់បាត់បង់ជីវិតនៅកន្លែងកើតហេតុ រីឯជនរងគ្រោះ២នាក់ផ្សេងទៀត រងរបួសធ្ងន់ ត្រូវបញ្ជូនទៅកាន់មន្ទីរពេទ្យភ្លាមៗផងដែរ ។
ប្រភពព័ត៌មានពីសមត្ថកិច្ចមូលដ្ឋាន ក្នុងនោះមានលោកអធិការរងផងដែរដែលចុះដល់កន្លែងកើតហេតុបានបញ្ជាក់ថា មុនពេលកើតហេតុ រថយន្តហាយឡែនឌ័រ ពណ៌ស្ករ ពាក់ស្លាកលេខភ្នំពេញ 2AF-6578 ធ្វើដំណើរដោយមនុស្សប្រុស ស្រីសរុប៨នាក់ ដោយចាកចេញពីខេត្តមណ្ឌលគិរីឆ្ពោះទៅកាន់ខេត្តរតនគិរី ។ លុះមកដល់ចំណុចកើតហេតុខាងលើ ខណៈដែលរថយន្តកំពុងធ្វើដំណើរក្នុងទិសដៅពីត្បូងទៅជើងនោះ បានវាក់នឹងអ្នកដើរឆ្លងថ្នល់ ពេលនោះអ្នកបើកបរបានជាន់ហ្វ្រាំងលើកទី១មិនជាប់ ក៏បង្ខំជាន់ហ្វ្រាំងលើកទី២ទៀត បណ្តាលឲ្យរថយន្តក្រឡាប់ជាច្រើនត្រឡប់បង្កឲ្យមានអ្នកស្លាប់ និងរងរបួសធ្ងន់ ស្រាលតែម្តង ៕
ដោយ៖ អ៊ុច សាវុទ្ធ
