ភ្នំពេញ៖ យ៉ាងហោចណាស់ក៏មានបុរស២នាក់ម្នាក់ជាជនជាតិខ្មែរ និងទៀតជាជនជាតិបរទេស បានរងរបួសធ្ងន់ត្រូវបានរថយន្ត សាមុយដឹកយកទៅសង្គ្រោះនៅមន្ទីរពេទ្យភ្លាមៗ ខណៈជិះម៉ូតូឌុបគ្នាមកដល់ចំណុចផ្លូវកែងត្រូវរថយន្ត ហ្វតបើកក្នុងល្បឿនលឿនបុកពេញទំហឹង អូសម៉ូតូជាប់ក្រោមរថយន្តប្រមាណជិត១០ម៉ែត្រ ។

ហេតុការណ៍នេះបានកើតឡើងកាលពីវេលាម៉ោង១ និង៥០នាទីរំលងអាធ្រាត្រឈានចូលថ្ងៃទី១ ខែមករា ឆ្នាំ២០១៦ នៅចំណុចផ្លូវលេខ២៩៤ កែងនឹងផ្លូវលេខ៥១ ស្ថិតក្នុងសង្កាត់បឹងកេងកងទី១ ខណ្ឌចំការមន ។

បើតាមសាក្សីដែលនៅក្បែរកន្លែងកើតហេតុបានឱ្យដឹងថា មុនពេលកើតហេតុគេបានឃើញបុរស២នាក់ ម្នាក់ជាជនជាតិខ្មែរ និងម្នាក់ទៀតជាជនជាតិបរទេស ជិះម៉ូតូម៉ាក FTR ពណ៍ស ពាក់ស្លាកលេខ ភ្នំពេញ 1BY-0951 ជិះឌុបគ្នាតាមបណ្តោយផ្លូវលេខ៥១ ទិសដៅពីជើងទៅត្បូង ពេលមកដល់ចំណុចកើត​ហេតុ​ស្រាប់តែមានរថយន្តហ្វតរ៉េជ័រ ពណ៍ទឹកប្រាក់ ពាក់ស្លាកលេខ ភ្នំពេញ2AH-8577 បើកបរតាមបណ្តោយផ្លូវលេខ២៩៤ ទិសដៅពីកើតទៅលិចក្នុងល្បឿនយ៉ាងលឿន បានបុកម៉ូតូពេញទំហឹង អូសម៉ូតូជាប់ក្រោមរថយន្តប្រមាណជិត១០ម៉ែត្រ បណ្តាលរងរបួស​ធ្ងន់ទាំង២នាក់ ហើយត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ ។ ក្រោកើតអ្នកបើកបររថយន្តរត់គេចខ្លួនបាត់ ។

ក្រោយកើតហេតុសមត្ថកិច្ចមូលដ្ឋានបានមកដល់កន្លែងកើតហេតុ និងសហការជាមួយជំនាញ ធ្វើការវាស់វែងយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕

ដោយ៖ ភារ៉ា ដង្កោ