ខេត្តពោធិ៍សាត់៖ កម្លាំងនគរបាលស្រុកបាកានចាប់ខ្លួនលោកតាម្នាក់ក្រោយពីទទួលពាក្យបណ្ដឹងពីលោកពូម្នាក់ថាលោកតាកញ្ចាស់រូបនេះ លួងលោមរំលោភកូនស្រីរបស់គាត់ដែលទើបត្រឹមអាយុ ១០ឆ្នាំប៉ុណ្ណោះ នៅក្នុងចំការចេកក្បែរផ្ទះបានសម្រេចរហូតដល់ទៅ ៣លើក ទើបបែកការ។
ហេតុការណ៍ដែលសង្គមកំពុងយកចិត្តទុកដាក់ខាងលើ បានកើតឡើងកាលពីវេលាម៉ោង៩ និង៤៥នាទីព្រឹក ថ្ងៃទី៣១ ខែធ្នូ ឆ្នាំ២០១៥ ស្ថិតក្នុងភូមិសំរោងពក ឃុំអូរតាប៉ោង ស្រុកបាកាន ខេត្តពោធិ៍សាត់ ។
តាមការឱ្យដឹងពីលោកវរសេនីយ៍ នាង វុធ អធិការនគរបាលស្រុកបាកានប្រាប់ថា លោកតាសង្ស័យត្រូវចាប់ខ្លួនឈ្មោះ រស់ រ៉េន អាយុ ៦៣ឆ្នំា រស់នៅភូមិសំរោងពក ឃុំអូរតាប៉ោង ស្រុកបាកាន (កន្លែងចាប់ខ្លួន) ។
លោកអធិការបន្តថា ការចាប់ខ្លួនលោកតាខាងលើធ្វើឡើងក្រោយពីទទួលបានពាក្យបណ្ដឹងពីលោកពូម្នាក់ឈ្មោះ ស៊ន សឿន អាយុ ៣៦ឆ្នាំរស់នៅភូមិ.ឃុំជាមួយគ្នាត្រូវឪពុកកុមារីរងគ្រោះបានរៀបរាប់ថា កាលពីវេលាម៉ោងប្រមាណជាង ៨ព្រឹកថ្ងៃទី២៨ ខែធ្នូ ឆ្នាំ២០១៥ កន្លងមកថ្មីៗនេះ លោកតារូបនេះបានប្រព្រឹត្តផ្តេសផ្តាស់(រំលោភ)មកលើរូបរាងកាយកូនស្រីគាត់នៅចំការចេកក្បែរផ្ទះ (តាសង្ស័យ) ហើយគាត់គំរាមមិនឱ្យកុមារីនិយាយទេ (បើហ៊ាននិយាយអារកសម្លាប់ចោល) ។
ក្នុងពាក្យបណ្ដឹងខាងលើបន្តថា ករណីជនសង្ស័យរំលោភកុមារីរងគ្រោះ មិនមែនមួយលើកនេះទេ គឺពីរលើករួចមកហើយ មិនចាំថ្ងៃប៉ុន្តែនៅក្នុងខែធ្នូ ដោយលោកតាល្មោភកាមរូបនេះ លើកទី១ គាត់ប្រើល្បិចឱ្យកុមារីរងគ្រោះទៅទិញស្រាសយកមកឱ្យគាត់ បន្ទាប់មកគាត់ចាប់ដៃអូសចូលចំការចេកក្បែរផ្ទះខាងលើ ដោយបង្ខំរំលោភទាល់តែបានសម្រេច រួចឱ្យលុយកុមារីរងគ្រោះ ២០០០៛ និងគំរាមមិនឱ្យនិយាយប្រាប់គេប្រាប់ឯង (បើហ៊ាននិយាយអារកសម្លាប់ចោល) បន្តមកទៀត លោកតារូបនេះ បានប្រើស្ទីលដដែលជាចុងក្រោយនៅព្រឹកថ្ងៃទី៨ធ្នូ ក្រោយពេលធ្វើសកម្មភាពរួច កុមារីរងគ្រោះទ្រាំនឹងការឈឺផ្សារមិនបានក៏និយាយរឿងរ៉ាវ ប្រាប់ម្តាយរបស់នាង ក៏បែករឿងតែម្តង ។
លោកអធិការបន្តទៀតថា ផ្ទះកុមារីរងគ្រោះ និងជនសង្ស័យនៅក្បែរគ្នា ប៉ុន្តែឪពុកម្ដាយរបស់ក្មេងជាប់រវល់ដើររកស៊ីឆ្ងាយៗបាត់ពីផ្ទះ ដោយក្មេងស្រីនៅជាមួយជីដូន ធ្វើឱ្យលោកតាល្មោភកាមមានឱកាសបែបនេះ ហើយសមត្ថកិច្ចរបស់លោកបានហៅលោកតាសង្ស័យមកសួរនាំ គាត់បានឆ្លើយសារភាព ពិតជាបានប្រព្រឹត្តពិតប្រាកដមែន ដូច្នេះករណីនេះ លោកកំពុងបំពេញសំណុំបែបបទ បញ្ជូនខ្លួនគាត់មកស្នងការដ្ឋាននគរបាកខេត្តពោធិ៍សាត់ដើម្បីបន្តតាមនិតិវិធី នៅរសៀលថ្ងៃទី០១ ខែមករានេះ៕
ដោយ៖ ប៉ឹម ពិន
