លោកជំទាវកិត្ដិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្ដីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានបញ្ជាក់ថា៖ ពិធីបុណ្យអកអំបុក ដែលអាជ្ញាធររាជធានីភ្នំពេញថ្ងៃនេះ គឺស្របពេល ជាថ្ងៃបុណ្យឯករាជ្យជាតិ និងថ្ងៃកំណើតកងទ័ពជាតិ ហើយក៏ និងចូលរួម អបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែល នឹងប្រារព្ធធ្វើថ្ងៃទី១០-១១-១២ ខែវិច្ឆិកា ដែលជាបុណ្យប្រពៃណីជាតិរបស់ប្រជាជនខ្មែរ ដែលមានតាំងពីយូរលង់មកហើយ។ ពិធីបុណ្យប្រពៃណីជាតិខាងលើ មានតាំងពីបុរាណកាល ដ៏យូរលង់ណាស់មកហើយ ដូចមានចែងក្នុងឯកសាររបស់ប្រវត្ដិវិទូជាច្រើន ក៏ដូចជាតាមសិលាចារឹក នៃប្រាង្គប្រាសាទអង្គរ។ លោកជំទាវកិត្ដិសង្គហបណ្ឌិត ម៉ែន សំអន បានបញ្ជាក់បែបនេះ ខណៈលោកជំទាវចូលរួម ជាអធិប តីភាពក្នុងពិធីអកអំបុក ដែលអាជ្ញាធររាជធានីភ្នំពេញ បានរៀបចំឡើងនៅរម្យនីដ្ឋានវត្ដភ្នំ កាលពីថ្ងៃសៅរ៏ ១៣កើតខែ កត្ដិក ឆ្នាំ២០១៩ ត្រូវនិងថ្ងៃទី០៩ វិច្ឆិកា ឆ្នាំ២០១៩។
លោក ជំទាវបានបញ្ជាក់ថា៖ ព្រះរាជាណាចក្រកម្ពុជា ក្រោមការដឹកនាំ របស់រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ដ្រី បានទទួលសុខសន្ដិភាពពេញបរិបូរណ៍ និងមានការអភិវឌ្ឍន៍រីកចម្រើនឈានឡើងលើគ្រប់វិស័យ ហើយប្រជាជនទូទាំងប្រទេសកាន់តែមានជីវភាពល្អប្រសើរឡើង មានសុភមង្គល និងមានសិទ្ធិសេរីភាពពេញលេញ ក្នុងជំនឿសាសនា និងការប្រារព្ធពិធីបុណ្យជាតិ ប្រពៃណី និងបុណ្យសាសនាផ្សេងៗយ៉ាងសប្បាយរីករាយ។ ជាក់ស្តែង រាជធានីភ្នំពេញយើងថ្ងៃនេះ កំពុងរៀបចំពិធីអកអំបុក ដើម្បីអបអរសាទរថ្ងៃឯករាជ្យជាតិផង និងដើម្បីរួបរួមគ្នាការពារជាតិ សាសនា ព្រះមហាក្សត្រផង។
លោក ឃួង ស្រេង អភិបាលរាជធានីភ្នំពេញ បានបញ្ជាក់ថា៖ ទិវានេះ មានអត្ថន័យ ធំធេងណាស់ ព្រោះឱកាសនេះ រដ្ឋបាលរាជធានីភ្នំពេញ យើងបានធ្វើឡើង ដើម្បីទប់ស្កាត់ជនក្បត់ជាតិមួយចំនួន ដែលមានបំណង ប៉ុនប៉ងផ្តួលរំលំរាជ រដ្ឋាភិបាលស្របច្បាប់ និងបង្កចលាចល អសន្តិសុខ និងវិនា សកម្មដល់ប្រទេសជាតិយើង។ ម៉្យាងទៀត ក៏ចង់ក្រឿនរំលឹកដល់យុវជនជំនាន់ក្រោយៗទៀតឲ្យបានយល់កាន់តែច្បាស់ និងស្គាល់អត្តសញ្ញាណជាតិផងដែរ ព្រោះថា យុវជនយើងស្ថិតក្នុងបរិបទសម័យថ្មី យុវជនខ្លះគាត់ទំនើបពេកទៅ គាត់ស្គាល់របៀបអឺរ៉ុបច្រើនជាង ក៏ភ្លេចអត្តសញ្ញាណជាតិ។ ពេលនេះគឺពួកគាត់អាចស្វែងយល់បន្ថែមទៀតអំពីប្រវត្តិ និងប្រពៃណីពីបុរណរបស់ខ្មែរយើង និងបានស្គាល់អំពីរបៀបដាល់អំបុក ឬក៏ការធ្វើអំបុក កាន់តែច្បាស់ ។ យើងទាំងអស់អស់គ្នា ត្រូវ រួមគ្នាថែរក្សា និងអភិរក្សនូវអ្វីដែលជាមរតករបស់ដូនតាខ្មែរឲ្យនៅស្ថិតស្ថេរគង់វង្ស ផងដែរ ។
លោក ឃួង ស្រេង បានបញ្ជាក់ទៀតថា៖ លើសពីនេះទៀត ព្រឹត្តការណ៍នេះក៏ពិតជាការបង្ហាញពីស្មារតីសាមគ្គីភាពដ៏រឹងមាំរបស់ប្រជាជននៅរាជធានីភ្នំពេញ ក៏ដូចជានៅទូទាំងព្រះរាជាណាចក្រកម្ពុជាយើង ដែលកំពុងតែសប្បាយរីករាយនឹង សុខសន្តិភាព និងគាំទ្ររាជរដ្ឋាភិបាលដែលដឹកនាំដោយសម្តេចតេជោហ៊ុន សែន ៕ ដោយ៖ សំរិត
