ខេត្ដកោះកុង៖ លោក ជា លាងហេង ដែលជាមន្ដ្រីបម្រើការងារការិយាល័យ អ្នកតំណាងរាស្ដ្របាននឹងកំពុងចេញមុខ បើកទីតាំងសង្វៀនមាន់ជាមួយនឹងល្បែង យូគីយ៉ាងគគ្រឹកគគ្រេងនៅសួនសត្វខេត្ដ កោះកុង និងមិនមានការបង្ក្រាបពីសមត្ថ កិច្ចឬអាជ្ញាធរពាក់ព័ន្ធនៅឡើយទេ ។
កន្លងមកលោក ជា លាងហេង តែង យកស.ជ.ណរបស់ក្រុមហ៊ុន LYP របស់ ឧកញ៉ាលី យ៉ុងផាត់ ដែលស្នើសុំបើក បន្ថែមមុខល្បែងមួយចំនួនទៀតសម្រាប់ កាស៊ីណូរបស់គាត់គឺកាស៊ីណូកោះកុង និងកាស៊ីណូអូរស្មាច់ ។ បើទោះជាលោក ជា លាងហេង មិនមានច្បាប់អនុញ្ញាត និងបើកល្បែងយូគី សង្វៀនមាន់ ក្នុងដី សួនសត្វ មិនមែនឋិតនៅក្នុងលិខិត ស.ជ.ណនេះក៏ដោយ ។ អាជ្ញាធរខេត្ដ សមត្ថកិច្ច ក៏ដូចជាខាងក្រសួងសេដ្ឋកិច្ច និងហិរញ្ញវត្ថុ ពុំទាន់មានចំណាត់ការនៅ ឡើយទេ ដោយសង្ស័យថា ការបើកល្បែង របស់លោក ជ*ា លាងហេង អាចនឹងត្រូវ ចំណាយប្រាក់ តាមរយៈការឃុបឃិតគ្នា លក្ខណៈប្រព័ន្ធ ។
លោក ជា លាងហេង មន្ដ្រីការិយាល័យអ្នកតំណាងរាស្ដ្រ បើកបនល្បែង បានបំពានផងដែរទៅនឹងអនុសាសន៍របស់ សម្ដេចតេជោ ធ្លាប់មានប្រសាសន៍ថា “សមត្ថកិច្ច មន្ដ្រីរាជការ ត្រូវដកខ្លួនពី ល្បែងស៊ីសង” ។
គេឃើញមានពលរដ្ឋខ្មែរ មន្ដ្រីរាជ ការ អ្នករកស៊ី និងជនជាតិថៃផងដែរបាន ប្រមូលផ្ដុំគ្នាយ៉ាងកុះករ ចូលលេងល្បែង យ៉ាងអនាធិបតេយ្យ និងក៏ជាបញ្ហាព្រួយ បារម្ភផងដែរពីមជ្ឈដ្ឋានរបស់ប្រជាពល រដ្ឋ ខ្លាចកើតមាននូវបទល្មើសដែលនឹង ផ្ដើមចេញពីប្រភពនៃបនល្បែង ។
មន្ដ្រីសាលាខេត្ដបានបង្ហើបថា លោក ជា លាងហេង បានជ្រកក្រោមស.ជ.ណ លេខ១០៥២របស់ទីស្ដីការគណៈរដ្ឋមន្ដ្រី សម្រាប់ក្រុមហ៊ុនរបស់ឧកញ៉ាលី យ៉ុង ផាត់ ដែលគាត់ស្នើសុំដាក់បន្ថែមមុខ ល្បែងក្នុងទីតាំងកាស៊ីណូរបស់គាត់ ។ ផ្ទុយ ទៅវិញ លោក ជា លាងហេង ចាត់ទុក ថា គាត់មានច្បាប់អនុញ្ញាត បន្ទាប់ពី ជួលដីសួនសត្វក្នុង១ខែប្រមាណ៣០លាន រៀលសម្រាប់បើកសង្វៀនមាន់ ល្បែង យូគីយ៉ាងអនាធិបតេយ្យនេះ ។
ពាក់ព័ន្ធនឹងករណីនេះ នគរវត្ដមិន អាចទាក់ទងបានទេពីមេបនល្បែង លោក ជា លាងហេង និងជាមន្ដ្រីបម្រើការងារ ការិយាល័យអ្នកតំណាងរាស្ដ្រ នៅរសៀល ថ្ងៃទី១ ខែមករា ឆ្នាំ២០១៦ ដោយគ្មាន លេខទូរស័ព្ទ ។
ដោយឡែកលោកឧត្ដមសេនីយ៍ សំ ឃិតវៀន ស្នងការនគរបាលខេត្ដកោះកុង បានប្រាប់នគរវត្ដតាមទូរស័ព្ទដូច្នេះថា “បើតាមខ្ញុំដឹង ខាងកាស៊ីណូបានបង្ហាញ ពីលិខិតអនុញ្ញាតស្នើសុំដាក់បន្ថែមនូវ មុខល្បែង ហើយក៏ឋិតនៅក្រោមការ គ្រប់គ្រងរបស់កាស៊ីណូ ” ។
លោកស្នងការបន្ដថា រឿងនេះយកល្អ គួរតែសួរនាំទៅខាងអ្នកគ្រប់គ្រងកាស៊ីណូ វិញ បានដឹងច្បាស់ ។ នគរវត្ដមិនអាច ទាក់ទងបានទេ ខាងអ្នកគ្រប់គ្រងកាស៊ីណូ នារសៀលថ្ងៃខែដដែលនេះ ដោយគ្មាន លេខទូរស័ព្ទ ។
សំឡេងដកងរំពងស្រែកហ៊ោកញ្ច្រៀវ បានបន្លឺចេញពីសង្វៀនមាន់ ល្បែងយូគី នៅសួនសត្វខេត្ដកោះកុង ក្រោមការ គ្រប់ដោយផ្ទាល់ពីលោក ជា លាងហេង ។ ប៉ុន្ដែទីតាំងខាងលើនេះ បាននឹងកំពុងធ្វើ ឱ្យប្រជាពលរដ្ឋនឹកដល់ការអនុវត្ដគោល នយោបាយ ភូមិ-ឃុំមានសុវត្ថិភាព និង គ្មានតម្លាភាព ។ ក្នុងនោះបទល្មើសអាច នឹងកើតមាន ៕
ដោយ៖ សុខ ខេមរា
