ខេត្តកណ្តាល៖ ម៉ូតូ២គ្រឿងបើកបោះពួយបុកគ្នាពេញមួយទំហឹង នៅលើកំណាត់ផ្លូវក្រាលកៅស៊ូមួយខ្សែ ស្ថិតក្នុងភូមិអង្គរសិរី ឃុំភ្នំបាត ស្រុកពញាឮ បណ្តាលមនុស្ស៣នាក់រងរបួសយ៉ាងធ្ងន់ធ្ងរ កាលពីវេលាម៉ោង១៩ និង៣០នាទី ថ្ងៃទី៣១ ខែធ្នូ ឆ្នាំ២០១៥ បន្ទាប់ពីមានហេតុការណ៍កើតឡើងជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ ។ ដោយឡែកម៉ូតូទាំង២គ្រឿងត្រូវបានសមត្ថកិច្ចនគរបាលចរាចរណ៍ស្រុកពញាឮ ដកហូតយកទៅរក្សាទុកនៅអធិការដ្ឋាន ដើម្បីចាត់ការតាមច្បាប់ ។
មន្ត្រីនគរបាលស្រុកពញាឮបានឲ្យដឹងថា ម៉ូតូបង្កម៉ាកហុងដាគុប ធុនសេ៧០ ពណ៌បៃតងខ្ចី គ្មានស្លាកលេខ បើកបរដោយឈ្មោះណា ណាត ភេទប្រុសអាយុ៣០ឆ្នាំ មានទីលំនៅក្នុងភូមិថ្មសឃុំភ្នំបាត ស្រុកពញាឮ ។ភាគីម្ខាងទៀតម៉ូតូម៉ាហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខភ្នំពេញ1BY-4203បើកបរដោយឈ្មោះកែម ណាវីភេទប្រុស មានទីលំនៅក្នុងភូមិត្រពាំងព្រៃភូមិ ឃុំទំនប់ធំ ស្រុកពញាឮ ។ អ្នករួមដំណើរជាព្រះសង្ឃព្រះនាម កែប យ៉ុង ជាព្រះចៅអធិការវត្តធម្មស្រះ ។
ប្រភពដដែលបានបន្តថា នៅមុនពេលកើតហេតុសាក្សីបានឃើញបុរសម្នាក់បើកបរម៉ូតូម៉ាកហុងដាគុបបើកបរតាមបណ្តោយផ្លូវក្រាលកៅស៊ូក្នុងទិសដៅពីលិចទៅកើត ។ លុះបើកដល់ចំណុចកើតហេតុ ក៏បានជ្រុលចង្កូតចូលទៅបុកជាមួយម៉ូតូបើកបរច្រាស់ទិសគ្នាពេញមួយទំហឹង បណ្តាលឲ្យមនុស្សទាំង៣នាក់ជិះលើម៉ូតូទាំង២គ្រឿងរងរបួសយ៉ាងធ្ងន់ធ្ងរតែម្តង ៕
ដោយ៖ ស្អាងជ័យ
