ខេត្តក្រចេះ ៖ រថយន្ដដឹកឈើល្មើសច្បាប់ចំនួន២គ្រឿងត្រូវបានកម្លាំងកងរាជអាវុធហត្ថលើផ្ទៃប្រទេ សហការជាមួយកងរាជអាវុធហត្ថខេត្តក្រចេះ និងស្រុកឆ្លូងចុះបង្ក្រាបរឹបអូសបានយកប្រគល់ឱ្យជំនាញ។
ការចុះបង្ក្រាបនោះដឹកនាំដោយលោកឧត្ដមសេនីយ៍ទោ ដួង សារី កងរាជអាវុធហត្ថលើផ្ទៃប្រទេស ធ្វើឡើងនៅរសៀលថ្ងៃទី៨ ខែធ្នូឆ្នាំ២០១៩នេះនៅចំនុចភូមិព្រែកចំឡាក់ ឃុំកញ្ជរ ស្រុកឆ្លូង ខេត្តក្រចេះ។
ប្រភពពីសមត្ថកិច្ចបានឱ្យដឹងថា រថយន្តដឹកឈើចំនួន២គ្រឿងនោះក្រុមឈ្មួញនាំចេញពីស្រុកសំបូរ ឆ្លងកាត់ខេត្តក្រចេះបន្តទៅលក់ នៅខេត្តត្បូងឃ្មុំ និងខេត្តព្រៃវែង ប៉ុន្តែមិនទាន់បានដល់គោលដៅផង ក៏ត្រូវកម្លាំងធ្វើការបង្ក្រាបបានតែម្តង។
ប្រភពបន្តថា រថយន្ដទាំង២គ្រឿងនោះដឹកឈើ ប្រភេទក្ដាហើយពេលកម្លាំងកងរាជអាវុធហត្ថចុះទៅដល់អ្នកបើកបរបានរត់គេចខ្លួនបាត់អស់មិនទាន់ស្គាល់អត្តសញ្ញាណម្ចាស់ឈើនៅឡើយទេ។
ហើយឈើ និងរថយន្ដទាំងនោះត្រូវបានកម្លាំងកងរាជអាវុធហត្ថ ប្រគល់ឱ្យរដ្ឋបាលព្រៃឈើសង្កាត់ឆ្លូងចាត់ការបន្តតាមច្បាប់រដ្ព្រៃឈើផងដែរ។
ហើយនៅថ្ងៃដដែលនោះកម្លាំងកងរាជអាវុធហត្ថស្រុកចិត្របុរី ក៏បានសហការជាមួយរដ្ឋបាលព្រៃឈើសង្កាត់ថ្មក្រែបង្ក្រាបបានទូកដឹកឈើមួយគ្រឿងទៀតនៅក្នុងទន្លេត្រង់ចំនុចភូមិឬស្សីចារ ឃុំថ្មក្រែ ស្រុកចិត្របុរី ខេត្តក្រចេះ។
ហើយឈើ និងទូកមួយគ្រឿងនោះត្រូវកម្លាំងសមត្ថកិច្ចកំពុងនាំយកទៅ រក្សាទុកនៅស្ថានីយ៍បណ្ដុះកូនឈើខ្សា ដើម្បីចាត់តាមច្បាប់បន្តទៀតផងដែរ៕ ដោយ ជីវ័ន្ត
