ដោយសេដ្ឋកិច្ចក្នុងតំបន់កើនឡើង ក្នុងយៈពេលប៉ុន្មានឆ្នាំចុងក្រោយនេះ ប្រទេសនៅក្នុងតំបន់អាស៊ានបានបង្កើនការចំណាយសម្រាប់ការពារជាតិ និងទិញអាវុធទំនើបៗជាច្រើន។ កាលពីមុនប្រទេសតំបន់អាស៊ានមិនសូវបង្ហាញអាវុធជាសាធារណៈ នោះឡើយ ប៉ុន្តែពេលនេះ បានបង្ហាញមីស៊ីលទំនើបៗដែលខ្លួនមាន។
ជាក់ស្តែងកាលពីថ្ងៃទី ៩ ខែធ្នូ សន្និបាតយោធា ប្រចាំឆ្នាំ២០១៩ របស់កម្លាំងទាហានប្រជាជនវៀតណាម ក៏បានដាក់បង្ហាញអាវុធទំនើបៗជាច្រើន ក្នុងនោះមាន ទាំងប្រព័ន្ធមីស៊ីលការពារដែនអាកាស SPYDER ផងដែរ។
នាយករដ្ឋមន្ត្រីវៀតណាម លោក Nguyen Xuan Phuc បានទស្សនាការដាក់បង្ហាញអាវុធការពារជាតិដ៏ទំនើបរបស់កម្លាំងប្រជាជនវៀតណាម បានដាក់បង្ហាញ នៅបរិវេណក្រសួងការពារជាតិ ក្នុងឱកាស នៃសន្និបាតយោធាទូទាំងប្រទេស នៅថ្ងៃទី៩ ខែធ្នូ ឆ្នាំ២០១៩។
ចំណុចដែលចាប់អារម្មណ៍បំផុតនោះគឺ អាវុធដែលដាក់បង្ហាញនោះ មានទាំងមីស៊ីលការពារដែនអាកាស SPYDER ដែលវៀតណាមបានទិញពីអ៊ីស្រាអែល។ ក្រៅពីនេះនៅមានរថក្រោះ T-90S ដ៏ទំនើបដែលទាហានវៀតណាម ទើបនឹងទទួលបាន ពេលថ្មីៗនេះ។ ប៉ុន្មានឆ្នាំកន្លងមកនេះ ប្រព័ន្ធផ្សព្វផ្សាយបរទេស បានផ្សាយថា វៀតណាមបានទិញមីស៊ីលពីអ៊ីស្រាអែល ប៉ុន្តែមីស៊ីលនោះ មិនដែលបានបង្ហាញ ជាសាធារណៈនោះឡើយ ។
មីស៊ីលការពារដែនអាកាស SPYDER (Surface-to-air PYthon and DERby) ជាមីស៊ីលរយៈចម្ងាយខ្លី អាចវាយប្រហារកម្ទេចគោលដៅហោះហើរ ដូចជា យន្តហោះចម្បាំង មីស៊ីលឆ្លងទ្វីប យន្តហោះគ្មានមនុស្សបើក …ជាដើម ។មីស៊ីលខាងលើប្រើប្រាស់គ្រប់ស្ថានភាពអាកាសធាតុ។ ប្រព័ន្ធមីស៊ីលការពារនេះ ជាប្រភេទអាវុធដ៏ទំនើបបំផុត ផលិតដោយប្រទេសអ៊ីស្រាអែល។
ដោយឡែកប្រទេសហ្វីលីពីនវិញបើតាមសារព័ត៌មានហ្វីលីពីន បានផ្សាយថា ហ្វីលីពីន បានបញ្ចប់រាល់ឯកសារ នៅក្នុងកិច្ចព្រមព្រៀងទិញមីស៊ីលល្បឿនលឿនបំផុតលើពិភពលោក BrahMos ផលិតរួមគ្នាដោយបច្ចេកវិទ្យា ឥណ្ឌា និងរុស្ស៊ី។
មីស៊ីល BrahMos មិនត្រឹមតែមានល្បឿនលឿននោះឡើយ ថែមទាំងមានបច្ចេកវិទ្យា បំបាំងកាយទៀតផង។ មីស៊ីលនេះ អាចបាញ់ចេញពីនាវាមុជទឹក នាវាចម្បាំង យន្តហោះចម្បំា ក៏ដូចជាជើងទម្រ ចល័តនៅលើដីគោក។
បច្ចុប្បន្ន កិច្ចពិភាក្សាស្តីពីតម្លៃ កំពុងតែធ្វើឡើង ហើយហ្វីលីពីនសង្ឃឹមថា កិច្ចព្រមព្រៀងនឹងបញ្ចប់នៅក្នុងឆ្នាំ២០២០។
រដ្ឋាភិបាលទីក្រុងញ៉ូវដេលីបាន បានផ្តល់ប្រាក់កម្ចីសម្រាប់ការពារជាតិមានតម្លៃ១០០លានដុល្លារអាមេរិក ឲ្យហ្វីលីពីន។ ប៉ុន្តែទឹកប្រាក់ដែលឲ្យខ្ចីអាស្រ័យទៅលើចំនយនមីស៊ីល BrahMos ដែលហ្វីលីពីនទិញ។រដ្ឋាភិបាលទីក្រុងម៉ានីល មានបំណងទិញមីស៊ីល BrahMos ដោយប្រាក់ផ្ទាល់ខ្លួន ។
មីស៊ីល BrahMos ត្រូវបានផលិតឡើងដោយឥណ្ឌានិងរុស្ស៊ី ត្រូវបានគេចាត់ទុកថាជាមីស៊ីល មានល្បឿនលឿនជាងគេបំផុតលើពិភពលោក ដែលអាចបាញ់ប្រហារចំគោលដៅ ក្នុងល្បឿនលឿនជាងសំឡេងដល់ទៅ៣ដង ស្មើរ៣.៦៧៥ គីឡូម៉ែត្រក្នុងមួយម៉ោង ។ ឥណ្ឌាក៏បានអភិវឌ្ឍន៍បង្កើនរយៈចម្ងាយបាញ់ដល់ទៅ៥០០គីឡូម៉ែត្រ ។
រដ្ឋាភិបាលទីក្រុងញ៉ូវដេលី បានសាកល្បងបាញ់មីស៊ីល BrahMos ចេញពី យន្តហោះចម្បាំង Su-30 ដោយជោគជ័យ ។ ជាមួយគ្នានេះឥណ្ឌាបានឡើងគម្រោង បាញ់សាកល្បង បាញ់ចេញពីនាវាចម្បាំង នៅពេលដ៏ខ្លីខាងមុខ៕
