ភ្នំពេញ​៖​ ស្ត្រីកម្មការិនីរោងចក្រម្នាក់ខណះចេញពីធ្វេីការបំណងទៅផ្ទះជួលក៏ជួបក្រុមទម្លាក់យោងបោកបញ្ឆោតប្រេីល្បិចដោះដូរមាសយកគ្រឿងអលង្ការនិងលុយអស់ពីខ្លួន

។

ហេតុការណ៍នេះ បានលកើតទ្បើងកាលពីវេលាម៉ោង៤ល្ងាចថ្ងៃទី១០ ខែធ្នូ ឆ្នាំ២០១៩ តាមផ្លូវលំក្នុងភូមិត្រពាំងទា សង្កាត់សំរោងក្រោម ខណ្ឌពោធិ៍សែនជ័យ​ លុះព្រឹកថ្ងៃទី១១ខែឆ្នាំដដែលទេីបរត់ទៅប្តឹងនគរបាលជួយអន្តរាគមន៍។

ជនរងគ្រោះឈ្មោះ ឆិល ចាន់ដារ៉ា អាយុ៤០ឆ្នាំ មុខរបរ កម្មការនីរោងចក្រ៣ជាន់ ភូមិព្រៃព្រីងជើង ជាស្រីម៉េម៉ាយ មានកូន២នាក់ (ប្រុស១នាក់) ស្នាក់នៅផ្ទះជួលក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិសែនជ័យ មានស្រុកកំណើត ភូមិត្រពាំងថ្នល់ ឃុំស្រែននោង ស្រុកត្រាំកក់ ខេត្តតាកែវ ។

សម្ភារ:បាត់បង់ ចិញ្ចៀនត្រា មាសទម្ងន់៣ជី ក្រវិលមាស៥ហ៊ុន លុយ២០០ដុល្លារ ទើបបើកបានថ្មីៗ លុយខ្មែរមួយចំនួន ទូរស័ព្ទដៃoppo មួយគ្រឿង ។

តាមការរៀបរាប់ពីស្ត្រីរងគ្រោះ បានឲ្យដឹងថា កាលពីល្ងាចថ្ងៃទី១០ ខែធ្នូ  គ្រាដែលចេញពីធ្វើការរោងចក្រ ដើរឆ្ពោះទៅផ្ទះជួល បានជួបស្ត្រីសង្ស័យម្នាក់ ដើរមកសាកសួរ រឿងកញ្ចប់លុយ មាស ហើយល្បួងនាំទៅចែកគ្នា ជាមួយក្រុមជនសង្ស័យ៤នាក់ ប្រុស២នាក់ ស្រី២នាក់ ជិះម៉ូតូ២គ្រឿង ទៅដល់ចំណុចតាមផ្លូវលំ ក្នុងភូមិត្រពាំងទា សង្កាត់ត្រពាំងក្រសាំង ដោះដូរយកគ្រឿងអលង្ការ លុយកាក់ ទូរស័ព្ទ បានសម្រេចហើយ ហុចកញ្ចប់ក្រហមមួយឲ្យកាន់ រួចក្រុមជនសង្ស័យនាំគ្នាជិះម៉ូតូគេចទៅបាត់អស់ ។

ក្រោយពីដឹងថា ចាញ់បោកគេហើយ ស្ត្រីរងគ្រោះ បានសុំម៉ូតូគេជិះ វិលត្រឡប់មកផ្ទះជួលវិញ ដោយមិនដឹងថា ទៅប្តឹងសុំការអន្តរាគមន៍ នៅប៉ុស្តិ៍ប៉ូលិសខាងណា រហូតដល់ព្រឹកថ្ងៃទី១១ ខែធ្នូ ឆ្នាំ២០១៩នេះ ក៏បានទៅដាក់ពាក្យបណ្តឹងនៅប៉ុស្តិ៍ចោមចៅ៣ លុះនគរបាលសាកសួរ ទើបដឹងរឿងហេតុ ប្រាប់ឲ្យទៅដាក់ពាក្យបណ្តឹង នៅប៉ុស្តិ៍ត្រពាំងក្រសាំងវិញ ជាកន្លែងកើតហេតុ ៕សុខាសែនជ័យ​