កាលពីថ្ងៃទី១៥ខែធ្នូ ហ្វីលីពីនរងការវាយប្រហារដោយរញ្ជួយដី ៦.៩រ៉ិចត័រនៅលើដែនកោះ មីនដាណាវ។ តាមការចេញផ្សាយរបស់ភ្នាក់ងារសិក្សាស្រាវជ្រាវអង្កេតអំពីការរញ្ជួយដី មូលដ្ឋាននៅអាមេរិក ហៅកាត់ថា USGS បានបញ្ជាក់ថា ការរញ្ជួយដីទ្រង់ទ្រាយធំមួយ គឺទំហំ៦.៩រ៉ិចទ័រ បានវាយប្រហារនៅលើដែនកោះ មីនដាណាវ (Mindanao) ជិតទីក្រុង Davao ភាគនិរតីរបស់ប្រទេសហ្វីលីពីន ។
ប្រភពផ្សាយអំពីគ្រោះរញ្ជួយដីនេះថា បានកើតឡើងកាលពីថ្ងៃទី១៥ ខែធ្នូ ឆ្នាំ២០១៩ ហើយចំណុចកណ្តាលរបស់វា ស្ថិតនៅប្រហែល៥៦គីឡូម៉ែត្រប៉ុណ្ណោះ ពីភាគនិរតីទីក្រុង Davao និងមានជម្រៅ៥៣គីឡូម៉ែត្រ ។
អាជ្ញាធរហ្វីលីពីនមិនបានចេញព្រមានអំពីរលកយក្សស៊ូណាមិដោយសារតែការរញ្ជួយដីពេលនេះនោះឡើយ ។ ភ្លាមៗនេះ ក៏មិនទាន់មានការផ្សព្វផ្សាយអំពីគ្រោះថ្នាក់ដល់អាយុជីវិតមនុស្ស ខូចខាតទ្រព្យសម្បត្តិអ្វីដែរ ។
សូមបញ្ជាក់ថា បើតាមអ្នកជំនាញបានអះអាងថា ដែនកោះ មីនដាណាវ របស់ហ្វីលីពីននេះ ជាតំបន់ដែលរងគ្រោះដោយការរញ្ជួយដីញឹកញាប់បំផុត និងជាប្រចាំផងដែរ ដោយសារតែវាមានទីតាំងស្ថិតនៅចំណុចខ្សែក្រវាត់ភ្លើងផែនដី ៕
