ភ្នំពេញ: ប្ដីប្រពន្ធមួយគូស្លៀកពាក់យ៉ាងស្រស់ស្អាតបើករថយន្តហាយឡិនឌ័រ មួយ គ្រឿងទៅញ៉ាំការមិនទាន់ដល់ផងត្រូវបានរថយន្តម៉ាកFUSOដឹកទំនិញធុនធំបើកកៀររកាខូចខាតយ៉ាងដំណំ កើតឡើងកាលពីវេលាម៉ោង ៨និង១០នាទីយប់ថ្ងៃទី១៨ខែធ្នូ ឆ្នាំ២០១៩ស្ថិតនៅតាមបណ្ដោយផ្លូវ១០០៣ ត្រង់ចំណុចមុខផ្សារទំនើបអ៊ីអន២ ក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រភពព័ត៌ពីម្ចាស់រថយន្តហាយឡិនឌ័របានឲ្យដឹងថាមុនកើតហេតុរូបគាត់ពីរនាក់ប្ដីប្រពន្ធបានទៅញ៉ាំការគេមួយកន្លែងនៅក្បែរកន្លែងកើតហេតុដោយបើករថយន្តហាយឡិនឌ័រមួយគ្រឿងពណ៌ខ្មៅពាក់ស្លាកលេខភ្នំពេញ2U-7825ធ្វើដំណើរការទិសដៅពីជើងទៅត្បួងលុះដល់ចំណុចកើតហេតុខាងលើជិតនឹងដល់កន្លែងញ៉ាំការហើយក៏មានរថយន្តដឹកទំនិញមួយគ្រឿងម៉ាក FUSO ពណ៌សលាយខៀវពាក់ស្លាកលេខព្រះសីហនុ 3A-6772បើកមកពីក្រោយស្របទិសដៅគ្នាបានគេចពីរថយន្តមួយគ្រឿងទៀត រេចង្កូតមកខាងឆ្វេងដៃជ្រុលទៅប៉ះនិងរថយន្តរបស់គាត់ចំហៀងផ្នែកខាងស្ដាំកៀបជាប់គ្នារងការខូចខាតយ៉ាងដំណំ។

ក្រោយកើតហេតុសមត្ថកិច្ចមូលដ្ឋាននិងជំនាញបានចុះមកដល់កន្លែងកើតហេតុបានឲ្យភាគីទាំងសងខាងធ្វើការសម្របសម្រួលគ្នាដោយភាគីរថយន្តដឹកទំនិញចេញជួសជុលរថយន្តហាយឡែនឌ័ឲ្យស្អាតឡើងវិញដើម្បីបញ្ចប់រឿងនៅនឹងកន្លែងកើតហេតុ ៕