ខេត្ដព្រះសីហនុ៖ ជនជាតិដាណឺម៉ាក ម្នាក់បានស្លាប់ក្នុងផ្ទះសំណាក់ម្ដុំបឹងកាឡូមួយជាប់នឹងឆ្នេរសមុទ្រអូរឈើទាលបង្កឱ្យមានការភ្ញាក់ផ្អើលកាលពីវេលាម៉ោងជាង១២រំលងអធ្រាត្រឈានចូលថ្ងៃទី៤ ខែមករា ឆ្នាំ២០១៦ ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ។
ម្ចាស់ផ្ទះសំណាក់បឹងកាឡូដែលជា ជនជាតិខ្មែរបានឱ្យដឹងថា នៅពេលដែល មានបុគ្គលិកចុះមើលសោតាមបឹងកាឡូ ស្រាប់តែឃើញប្រទះឃើញបុរសរងគ្រោះស្លាប់ជាប់នឹងមាត់ទ្វារ។ ពេលឃើញ ដូច្នេះក៏បានរាយការណ៍ឱ្យសមត្ថកិច្ចចុះមកត្រួតពិនិត្យ ។
មន្ដ្រីនគរបាលបច្ចេកទេសវិទ្យាសាស្ដ្រ បានឱ្យដឹងថា ជនបរទេសដែលស្លាប់ ឈ្មោះ ELOWSSON TOM FTEMMING សញ្ជាតិដាណឺម៉ាក អាយុ៦៦ឆ្នាំ កាន់លិខិតឆ្លងដែនលេខ 207680120 មានសុពលភាពថ្ងៃទី១១ ខែសីហា *ឆ្នាំ ២០២៤។ ដោយបានចូលមកស្នាក់នៅ ក្នុងបឹងកាឡូ យីហោ TRANQUILITY GUESTHOUSE បន្ទប់លេខនេះរយៈ ពេលជាង១ ខែមកហើយ។
ពេលពិនិត្យសពរួចរាល់លោកគ្រូពេទ្យ និងនគរបាលការិយាល័យបច្ចេកទេសវិទ្យា សាស្ដ្រខេត្ដព្រះសីហនុបានឱ្យដឹងថា ជន បរទេសម្នាក់នេះគឺស្លាប់ដោយសារគាំងបេះដូង ។
សាកសពជនរងគ្រោះក្រោយពីពិនិត្យរួចបានបញ្ជូនទៅរក្សាទុកនៅមន្ទីរពេទ្យ បង្អែកចំការចេក ខេត្ដព្រះសីហនុ ដើម្បី រង់ចាំការសម្រេចពីមន្ដ្រីស្ថានទូតដាណឺម៉ាក ៕
ដោយ៖ ឆ្លាមសមុទ្រ
