ភ្នំពេញ៖ ទីបំផុតព្រឹត្តិការណ៍ភាពយន្តប្រចាំឆ្នាំ Movie Of The Year 2019 ដែលរៀបចំធ្វើដោយរោងភាពយន្តលេជេន បានបញ្ចប់ដោយជោគជ័យនិងស្វែងរកឃើញជ័យលាភីភាពយន្ត និងតារាសម្តែងឆ្នើមប្រចាំឆ្នាំ២០១៩ហើយ។កម្មវិធីនេះត្រូវបានរៀបចំឡើងកាលពីរសៀលថ្ងៃទី២៦ ខែធ្នូ ឆ្នាំ២០១៩នេះនៅរោងភាពយន្ត Legend Eden ក្រោមវត្តមានមន្ត្រីក្រសួងវប្បធម៌ និងវិចិត្រសិល្បៈ សិល្បករ ផលិតករ ជាច្រើនចូលរួម។ 

ភាពយន្តឆ្នើមបានធ្លាក់ទៅលើរឿង”ស្នេហាក្មេងៗ “ របស់ផលិតកម្មកងចក្រ ខណៈតារាសម្តែងប្រុសឆ្នើមបានទៅលើលោករ៉ុង សុភាដេវីដ ក្នុងភាពយន្តដដែលនេះ។ តារាសម្តែងស្រីឆ្នើមប្រចាំឆ្នាំបានទៅលើតារាសម្តែងស្រី យ៉ែម ស្រីពេជ្រ ដែលចូលរួមសម្តែងក្នុងភាពយន្តរឿង”នាឡិការដាស់វិញ្ញាណ” របស់ផលិតកម្ម LD Picture។ 

យ៉ែម ស្រីពេជ្រ បានថ្លែងទាំងរំភើបខ្លាំងដោយទទួលបានពានរង្វាន់ឆ្នើមមួយចារឈ្មោះនាងនៅលើពាន ដែលជាក្តីស្រមៃរបស់នាងជាយូណាស់មកហើយ។ នាងថានេះបានឆ្លុះបញ្ចាំងពីការខិតខំក្នុងការងារសិល្បៈអស់រយៈពេល៤ឆ្នាំនេះ។ នាងក៏អរគុណដល់រោងភាពយន្ត លេជេន ដែលបានបង្កើតកម្មវិធីមួយនេះ និងអរគុណអ្នកគាំទ្រ ផលិតករ សិល្បកររៀមច្បង ដែលបានជំរុញលើកទឹកចិត្តនាងកន្លងមក។ 

លោក លៀក លីដា អ្នកគ្រប់គ្រងទូទៅរបស់ផលិតកម្ម LD Picture  បានលើកឡើងថា ជាមោទនភាពដែលផលិតកម្មលោកបានជាប់បេក្ខភាពភាពយន្តឆ្នើមរហូតដល់៥ ក្នុងចំណោមភាពយន្តទាំង១០ ដែលផលិតដោយផលិតកម្មក្នុងស្រុក។ លោកថាកម្មវិធីភាពយន្តប្រចាំឆ្នាំ នេះបានចូលរួមលើកកម្ពស់គុណភាព ស្នាដៃផលិត របស់ផលិតករខ្មែរ និងជំរុញឲ្យមានការខិតខំប្រឹងប្រែងបន្ថែមទៀតសម្រាប់ការផលិតភាពយន្តបន្តបន្ទាប់ទៀតផងដែរ។ 

លោក ព្រំ បញ្ញាវ័ន្ត តំណាងភាពយន្តលេជេន បានលើកឡើងថានេះគឺជាលើកទី៤ហើយដែល លេជេន បង្កើតព្រឹត្តិការណ៍ភាពយន្តប្រចាំឆ្នាំដូចគ្នានេះឡើង។ លោកថាគោលបំណងនៃការបង្កើតកម្មវីធីនេះ ដើម្បីចូលរួមចំណែកជួយលើកកម្ពស់ភាពយន្តខ្មែរ ក៏ដូចជាគាំទ្រលើកទឹកចិត្តដល់សិល្បករខ្មែរផងដែរ។ លោកបន្តថា នៅឆ្នាំ២០២០ខាងមុខ លេជេន និងបន្តពង្រីកបន្ថែមនូវរោងភាពយន្តថ្មីឲ្យបានរហូតដល់១៣ ឬ១៤រោង ដែលជាការពង្រីកទីផ្សារភាពយន្តជូនដល់សិល្បករផលិតករ និងផ្តល់ជម្រើសកាន់តែងាយស្រួសដល់អ្នកគាំទ្ររោងភាពយន្តលេជេន។ លោករំពឹងថាព្រឹត្តិការណ៍នេះនឹងកើតមាននៅឆ្នាំក្រោយបន្តទៀតដើម្បីចូលរួមចំណែក ជួយដល់វិស័យភាពយន្តក្នុងស្រុក៕ ដោយ វឌ្ឍនា