ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីព្រះសង្ឃនិងប្រជាពលរដ្ឋបានប្រទះឃើញសពស្រ្តីម្នាក់អណ្ដែតទឹកស្រះក្នុងវត្តនាគវ័ន្ត រួចក៏រាយការណ៍ទៅសមត្ថកិច្ចមូលដ្ឋាន ដើម្បីចុះធ្វើការត្រួតពិនិត្យជាក់ស្តែង ។

ករណីខាងលើនេះ កើតឡើងនៅវេលាម៉ោង១២និង៣០នាទីរសៀល ថ្ងៃទី២៧ ខែធ្នូ ឆ្នាំ២០១៩ នៅចំណុចក្នុងស្រះទឹកវត្តនាគវន្ដ័ ភូមិ២២ ក្រុម១០៥ សង្កាត់បឹងកក់២ ខណ្ឌទួលគោក ។

តាមប្រភពព័ត៍មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនដំបូងរូបគាត់បានដើរចូលទៅក្នុងវត្ត ហើយបានដើរកាត់ស្រះទឹក ស្រាប់តែប្រទះឃើញសពស្រ្តីម្នាក់បានអណ្ដែតក្នុងទឹក ក៏រាយការណ៍ទៅព្រះចៅអធិការវត្តតែម្តង ។

បើតាមប្រភពព័ត៌មានពីអ្នករស់នៅក្បែរកន្លែងកើតហេតុ បានឲ្យដឹងដែរថា ស្រ្តីខាងលើនេះមិនដែលឃើញមានបងប្អូនអីនោះទេ ហើយគាត់តែងតែមកដេកនៅក្បែរស្រះទឹក ពេលគាត់ផឹងស្រវឹងម្ដងៗ ។ កាលពីថ្ងៃទី២៦ម្សិលមិញ មុនពេលកើតហេតុស្រ្តីខាងលើបានផឹកទឹកត្នោតជូតាំងពីព្រឹករហូតដល់យប់ក៏បាត់គាត់ទៅ ស្រាប់តែនៅថ្ងៃទី២៧នេះ ក៏ប្រទះឃើញសពគាត់អណ្ដែតនៅក្នុងស្រះទឹកនៅក្នុងវត្តនាគវន្ត័តែម្ដង។

ក្រោយកើតហេតុ បន្ទាប់ពីកម្លាំងផ្នែកជំនាញពិនិត្យរួច ក៏ប្រគល់ឲ្យសមត្ថកិច្ចប៉ុស្តិ៍បឹងកក់២ រៀបចំធ្វើកំណតហេតុ និងដឹកសពយកទៅបូជាតាមប្រពៃណី នៅវត្តទួលអស់លោក ៕ស រស្មី