ភ្នំពេញ៖ មនុស្សប្រុសស្រី២នាក់ ត្រូវកម្លាំងកងរាជអាវុធហត្ថខណ្ឌដូនពេញឃាត់ខ្លួន បន្ទាប់ពីពួកគេបានប្រើប្រាស់អាវុធខុសច្បាប់ កាលពីវេលាម៉ោង១១ និង២០នាទីយប់ ថ្ងៃទី៤ ខែមករា ឆ្នាំ២០១៦នៅចំណុចក្លោងទ្វារចូលបារចតុមុខ សង្កាត់ស្រះចក ខណ្ឌដូនពេញ ។

តាមប្រភពពីមន្ត្រីកងរាជអាវុធហត្ថ បានឲ្យដឹងថា ជនសង្ស័យ០២នាក់​ខាងលេីនេះទី១ឈ្មោះ ឃុត សុភត្រា ភេទប្រុស អាយុ៤០ឆ្នាំ មុខរបរ អ្នកបូជាសព​នៅវត្តទឹកថ្លា ស្នាក់ផ្ទះលេខ​១៥៨D ភូមិតំណាក់ត្រយឹង បុរីសន្តិភាព២ សង្កាត់​ចោមចៅ​ ពោធ៏សែនជ័យ និងទី២.ឈ្មោះ បូក ចណ្ឌី ភេទស្រី អាយុ៣០ឆ្នាំ មុខរបរនៅផ្ទះ ស្នាក់នៅ​ផ្ទះលេខ១៧ ជាន់ទី៦ ប្លុកបុរីកីឡា ខណ្ឌ៧មករា ។

លោកអនុសេនីយ៏ឯក លី គឹមឡេង មេបញ្ជាការរងអាវុធហត្ថខណ្ឌដូនពេញ  បានឲ្យដឹងថា មុនពេលឃាត់ខ្លួនជនសង្ស័យទាំង០២នាក់ គឺពួកគេបានចូលមកផឹកសុីក្នុងបារចតុមុខ ហើយបានផ្ញើអាវុធខ្លីខាងលើនៅសន្តិសុខ និងដោយមានការសង្ស័យសន្តិសុខក៏បានរាយការណ៍មកកម្លាំងយើងដើម្បីត្រួតពិនិត្យ ក្រោយមកកម្លាំងល្បាតយើងបានទៅដល់ហើយបានហៅជនសង្ស័យទាំង០២នាក់ចេញមកក្រៅហាង ដើម្បីសួរនាំអំពីអង្គភាព និងឯកសារផ្សេងៗពាក់ព័ន្ធនិងអាវុធ ។ ក្រោយពីត្រួតពិនិត្យគឺគ្មានឯកសារអ្វីទាំងអស់ ទើបកម្លាំងយើងបានឃាត់ខ្លួនជនសង្ស័យទាំង០២នាក់មកអង្គភាពដើម្បីធ្វើការសាកសួរ ។

វត្ថុតាងចាប់យកមាន៖ អាវុធខ្លី០១ដើម គ្មានម៉ាក គ្មានលេខនិងគ្រាប់រ៉ូឡូ០៥គ្រាប់, ម៉ូតូ០១គ្រឿងម៉ាកC125 ពណ៏ខ្មៅ ពាក់ស្លាកលេខ ក្រចេះ 1A:6079, ទូរស័ព្ទ សាំសុងពណ៏ស​០១គ្រឿងនិងម៉ាកiphone5 ពណ៌ស០១គ្រឿង, ខ្សែកធ្វើពីលោហះធាតុ ពណ៌ទង់ដែង ចំនួន០១ខ្សែ, ខ្សែដៃធ្វើពីលោហះធាតុ ពណ៏ទង់ដែង ចំនួន០១ខ្សែ, ចិញ្ជៀនពីលោហះធាតុ ពណ៏ទង់ដែង ចំនួន០១ខ្សែ ។

ក្រោយឃាត់ខ្លួនជនសង្ស័យបានឆ្លើយសារភាពថាកាំភ្លើងគឺរូបគេទិញពីថៃមកក្នុងតំលៃ៣០០០បាត ដើម្បីទុកគ្រាន់ការពារខ្លួន ៕

ដោយ៖ ស ដារ៉ា