ភ្នំពញ៖ប្រឡាយ បឹង បួរ ព្រែក អូរ ស្ទឹង ធម្មជាតិទាំងឡាយ មិនមែនជារបស់បុគ្គលឯកជនណាម្នាក់នោះទេ ពោលគឺជាសម្បត្តិរបស់រដ្ឋ សម្រាប់បម្រើផលប្រយោជន៍សាធារណៈ ។ ដូច្នេះគ្មានបុគ្គលណាម្នាក់មានសិទ្ធិរំលោភ​បំពានបោះបង្គោល ឬ ចាក់ដីរំលោភយកធ្វើជាកម្មសិទ្ធិបានឡើយ ។

ប៉ុន្តែបើយើងក្រឡេកទៅមើលនៅក្នុងមូលដ្ឋានទឹកដីខណ្ឌដង្កោ ឯណោះវិញ ថ្មីៗនេះ ប្រជាពលរដ្ឋ បានទម្លាយអោយដឹងថា ដីរដ្ឋជាច្រើន តាមដងស្ទឹងព្រែកត្នោត ស្ថិតក្នុងភូមិបាគូ សង្កាត់ដង្កោ ខណ្ឌដង្កោ បានិងកំពុងមានការចាក់ដីលុបស្ទឹងព្រែកត្នោតរំលោភបំពាន បំណងធ្វើជាកម្មសិទ្ធិផ្ទាល់ខ្លួន។

បញ្ហានេះ ក្រោយពីបែកធ្លាយអំពើទុច្ចរិតរបស់ក្រុមឈ្មួញដ៏មានឥទ្ធិពលរួចមក , លោក ជ ចាន់ស៊ាង អភិ​បាល​រងខណ្ឌដង្កោ ថ្លែងតាមរយៈបណ្តាញសង្គម Telegram ជាមួយអ្នកសារព័ត៌មាន យ៉ាងខ្លីថា “ក្រុមការងារខ្ញុំបានចុះទៅធ្វើកំណត់ហេតុរួចហើយ មិនអោយមានសកម្មភាពចាក់បែបនេះតទៅទៀតទេ និង មិនអោយមានការសាងសង់អ្វីនៅលើទីតាំងនោះដែរ”។

ចំពោះការបកស្រាយបំភ្លឺរបស់ លោក ជ ចាន់ស៊ាង អភិបាលរងខណ្ឌដង្កោ បែបនេះ ត្រូវបានប្រជាពលរដ្ឋ ឆ្លើយតបថា ហាក់មិនបានបង្ហាញរូបភាពនិងខ្លឹមសារលម្អិត នៃការចុះពិនិត្យទីតាំងដែលចាក់ដីរំលោភបំពានយក ដងស្ទឹងព្រែកត្នោតនោះឡើយ សូម្បីតែពេលវេលានិងថ្ងៃខែឆ្នាំ នៃការចុះពិនិត្យនេះ ។

ទន្ទឹមនេះ សំណូមពរអោយ លោកស្រី គឹម ញឹប អភិបាលខណ្ឌដង្កោថ្មី មេត្តាមានវិធានការអោយមានប្រសិទ្ធ​ភាពផង ជុំវិញបញ្ហានេះ ពោលគឺ ត្រូវបញ្ជាអោយឈ្មួញកាយដីនោះឲ្យអស់ចេញស្ទឹងព្រែកត្នោតឡើងវិញ និង មានចំណាត់ការតាមច្បាប់ផងដែរ ដើម្បីថែរក្សាសម្បត្តិរដ្ឋមួយនេះ ៕