ភ្នំពេញ​៖ នគរបាលនាយកដ្ឋានអន្តោប្រវេសន៍នៅតែបន្តចុះប្រតិបត្តិការត្រួតពិនិត្យជនជាតិបរទេសដែលមករស់នៅក្នុងប្រទេសកម្ពុជាដោយខុសច្បាប់ ក្នុងមូលដ្ឋានខណ្ឌដូនពេញ ជាលិទ្ធផលឃាត់ខ្លួនជនជាតិវៀតណាមប្រុសស្រីចំនួន២១នាក់ដែលជ្រកក្រោមស្លាកហាង កាហ្វេ ម៉ាស្សា កោសជប់ ដេីម្បីសាកសួររកឯកសារត្រឹមត្រូវ ។

ប្រតិបត្តិការនេះ បានធ្វេីឡេីង កាលពីវេលា​ម៉ោង​២ និង៣០នាទី​រសៀល ថ្ងៃទី​៥ ខែមករា ឆ្នាំ២០១៥ ដោយ​ឆែកឆេរនៅម្តុំផែថ្ម តាមបណ្ដោយផ្លូវព្រះសីុសុវត្ថិកែង​ផ្លូវ​លេខ៨០ សង្កាត់ស្រះចក ខណ្ឌដូនពេញ ដែលជាទីតាំងហាង​កាហ្វេ​ ម៉ាស្សា និង កោស​ជប់ ។​

ក្រោយពីចុះត្រួតពិនិត្យនេះរួច ជាលិទ្ធផលសមត្ថកិច្ចឃាត់ខ្លួនជនជាតិវៀតណាមប្រុសស្រី២១នាក់ ក្នុងនោះមានមនុស្សប្រុស២នាក់ ស្រី១៩នាក់ ហេីយត្រូវបានកម្លាំងនគរបាលនាយកដ្ឋានអន្តោប្រវេសន៍​ ដឹក​បញ្ជូន​ទៅកាន់​អគ្គនាយកដ្ឋាន​អន្តោប្រវេសន៍ នៃ​អគ្គស្នងការដ្ឋាន​នគរបាល​ក្រសួងមហាផ្ទៃ ដើម្បី​សាកសួរ និង​ចាត់ការ​តាម​នីតិវិធី ​៕

ដោយ៖ ស ដារ៉ា