ប្រភពព័ត៌មានប៊ីប៊ីស៊ី កាលពីថ្ងៃទី៥ ខែមករា ឆ្នាំ២០១៦ បានផ្សព្វផ្សាយថា សហរដ្ឋអាមេរិកបានប្រកាសថា ខ្លួនរំពឹង ថា ប៉ាគីស្ថាននឹងចាត់វិធានការប្រឆាំងទៅលើអ្នកវាយប្រហារយ៉ាងមរណៈទៅលើទីតាំងបន្ទាយកងទ័ពជើងអាកាសប្រទេសឥណ្ឌា ។
អ្នកនាំពាក្យក្រសួងការបរទេសអាមេរិក លោក John Kirby បានបញ្ជាក់ថា ប៉ាគីស្ថានត្រូវតែគោលដៅទៅលើក្រុមឧទ្ទាម ។
សម្ពន្ធក្រុមប្រឹក្សាជីហាដ (UJC) ដែលជាបណ្តាញសម្ពន្ធមិត្តមួយរបស់ក្រុមឧទ្ទាមដែលធ្លាប់វាយប្រហារនៅដែនដីកាស្មៀរ គ្រប់គ្រងដោយភាគីឥណ្ឌានោះ បានប្រកាសទទួលស្គាល់ការវាយប្រហារបន្ទាយកងទ័ពជើងអាកាសនៅពេលនេះ ។
ការវាយប្រហារទៅលើបន្ទាយកងទ័ពអាកាស Pathankot របស់ឥណ្ឌាដែលនៅជាប់ព្រំដែនជាមួយប៉ាគីស្ថាននោះត្រូវគេមើលឃើញថា ជាការសកម្មភាពមួយប៉ុនប៉ងឲ្យមានការបន្ទុចបង្អាក់ដល់ដំណើរការឆ្ពោះទៅរកសន្តិភាពនាពេលថ្មីៗនេះរវាងប៉ាគីស្ថាន នឹងឥណ្ឌា ។
លោក Kirby បានថ្លែងថា រដ្ឋាភិបាលប៉ាគីស្ថានជាអ្នកមានអំណាចបំផុតនៅក្នុងបញ្ហានេះ ។ យើងរំពឹងថាពួកគេនឹងចាត់វិធានការដោះស្រាយ ។ ពួកគេអាចធ្វើបាន ។ យើងជំរុញរដ្ឋាភិបាលប៉ាគីស្ថានត្រូវតែបន្តគោលដៅប្រឆាំងទៅលើក្រុមឧទ្ទាមទាំងអស់នេះ ។
ក្រុមឧទ្ទាម៥នាក់ និងទាហានឥណ្ឌា៧នាក់ រហូតមកដល់ពេលនេះបានបាត់បង់ជីវិតក្នុងអំឡុងពេលប្រយុទ្ធគ្នារយៈពេល៤ថ្ងៃជាប់គ្នាមកនេះ ។ កងកម្លាំងយោធាឥណ្ឌានៅតែបន្តប្រតិបត្តិការបោសសម្អាតក្រុមឧទ្ទាមក្នុងទំហំផ្ទៃដី២ពាន់អ័ក្ស(acre)ស្ថិតនៅក្នុងបន្ទាយជើងអាកាសនោះ ។
កាលពីរសៀលថ្ងៃទី៤ ខែមករា ឆ្នាំ២០១៦ មន្ត្រីជាន់ខ្ពស់របស់ប្រទេសឥណ្ឌាបានថ្លែងនៅក្នុងសន្និសីទកាសែតថា សមាជិកក្រុមគ្រួសារទាំងអស់ដែលរស់នៅក្នុងបន្ទាយជើងអាកាសមានសុវត្ថិភាពគ្រប់គ្នា ហើយសម្ភារយោធាទាំងអស់ដែលនៅក្នុងបន្ទាយក៏មិនទទួលរងការខូចខាតអ្វីឡើយពីការវាយប្រហារខាងលើនេះ ។
លោក Dushyant Singh មន្ត្រីជាន់ខ្ពស់របស់ឥណ្ឌាបានបញ្ជាក់ថា ប្រតិបត្តិការបោសសម្អាតក្រុមឧទ្ទាមនៅក្នុងទីតាំងខាងលើនេះ មិនទាន់អាចប្រកាសបញ្ចប់សកម្មភាពក្នុងពេលឆាប់ៗបានឡើយ ពីព្រោះវាមានទំហំធំ និងលក្ខណៈភាពភូមិសាស្ត្រ ។
ជាមួយគ្នានេះផងដែរ ប៉ូលិសនៅក្នុងតំបន់ Mohali រដ្ឋ Punjab មានព្រំដែនជាប់ជាមួយប៉ាគីស្ថាននោះបានបញ្ជាក់ថាកងកម្លាំងប្រចាំតំបន់នេះបានចាប់ខ្លួនបុរស៣នាក់ប្រដាប់ដោយអាវុធខុសច្បាប់ និងបានឆែកឆេររកឃើញស៊ីមកាតទូរស័ព្ទប្រើប្រាស់នៅក្នុងប្រទេសប៉ាគីស្ថានលើខ្លួនរបស់ពួកគេថែមទៀតផង ។ ប៉ូលិសបញ្ជាក់ថា គេមិនទាន់ប្រាកដនៅឡើយទេថា តើក្រុមបុរសទាំង៣នាក់នេះមានជាប់ពាក់ព័ន្ធជាមួយក្រុមឧទ្ទាមដែលបានវាយប្រហារមកលើបន្ទាយកងទ័ពជើងអាកាសឥណ្ឌាដែរឬយ៉ាងណានោះ ។
ការវាយប្រហារបន្ទាយកងទ័ពជើងអាកាស Pathankot បានចាប់ផ្តើមឡើងនៅវេលាមុនថ្ងៃរៀបអស្តង្គត ចុងសប្តាហ៍មុន នៅពេលដែលខ្មាន់កាំភ្លើងមួយក្រុមស្លៀកពាក់ឯកសណ្ឋានយោធាឥណ្ឌា ចូលទៅកាន់ទីលានបន្ទាយកងទ័ពជើងអាកាសរួចមកនោះ ។
ការផ្ទុះអាវុធចាប់ផ្តើមកើតឡើង ដោយមានការប្រើអាវុធធុនធ្ងន់ផងដែរ ។ ឧទ្ធម្ភាគចក្រចាប់ផ្តើមហោះហើរឆ្វេចឆ្វាច់នៅក្នុងប្រតិបត្តិការប្រមាញ់ក្រុមខ្មាន់កាំភ្លើង ។
ការពីប៉ុន្មានថ្ងៃកន្លងទៅថ្មីៗនេះ ឥណ្ឌា និងប៉ាគីស្ថានបានស្រុះស្រួលគ្នាផ្តួចផ្តើមឲ្យមានការចរចាសន្តិភាពដែលជាប់គាំងជាយូរមកហើយនោះ ។ ប៉ុន្តែការវាយប្រហារនៅពេលនេះ ទំនងធ្វើឲ្យគម្រោងចរចាសន្តិភាពពេលនេះអាក់ខានទៅវិញជាក់ជាមិនខាន ។
នាយករដ្ឋមន្ត្រីឥណ្ឌា លោក ណារ៉េនដ្រា ម៉ូឌី បានធ្វើទស្សនកិច្ចដោយគ្មានការរំពឹងគិតទុកជាមុនទៅកាន់ប្រទេសប៉ាគីស្ថានដើម្បីជួបជាមួយសមភាគីប៉ាគីស្ថាន លោកនាយករដ្ឋមន្ត្រី ណាវាស់ សារីហ្វ ។ គោលបំណងនៃដំណើរទស្សនកិច្ចកាលពីចុងខែធ្នូ ឆ្នាំ២០១៥របស់លោកនាយករដ្ឋមន្ត្រីឥណ្ឌានោះគឺគោលដៅផ្តួចផ្តើមឲ្យមានការចរចាសន្តិភាព និងបង្កបរិយាកាសល្អប្រសើររវាងប្រទេសទាំងពីរឡើងវិញ ។
ក្រសួងការបរទេសប៉ាគីស្ថាន ក៏ដូចក្រសួងការបរទេសអាមេរិកផងដែរបានថ្កោលទោសចំពោះការវាយប្រហារទៅលើបន្ទាយកងទ័ពជើងអាកាសប្រទេសឥណ្ឌានៅពេលនេះ ។ បន្ទាយកងទ័ពជើងអាកាស Pathankot មានមូលដ្ឋាននៅចម្ងាយប្រមាណ៤៣០គីឡូម៉ែត្រភាគខាងជើងទីក្រុងញូវដេលី និងមានផ្លូវភ្ជាប់ត្រង់ទៅដល់តំបន់កាស្មៀរផងដែរ ។ក្រោយទទួលឯករាជ្យ៧០ឆ្នាំកន្លងមក ឥណ្ឌា និងប៉ាគីស្ថានតែងតែផ្ទុះហិង្សាដាក់គ្នាជានិច្ចទាក់ទងដែនអធិបតេយ្យនៅតំបន់កាស្មៀរ ៕
ប្រែសម្រួល៖ ថាច់ យ៉ាត
