ភ្នំពេញ៖ តារាសម្តែងប្រុសស្រីល្បីឈ្មោះជាច្រើនរូបបានបង្ហាញវត្តមានក្នុងកម្មវិធីជប់លៀងបុគ្គលិកប្រចាំឆ្នាំរបស់ទូរទស្សន៍ប៉ុស្តិ៍លេខ៥។ កម្មវិធីនេះត្រូវបានធ្វើឡើងកាលពីរាត្រីថ្ងៃទី១០ ខែមករាឆ្នាំ ២០២០នៅភោជនីយដ្ឋានទន្លេបាសាក់២។
សិល្បករដែលមានវត្តមានក្នុងកម្មវិធីនោះមានដូចជាកញ្ញា ព្រះកាយ ច័ន្ទ កញ្ញា ដួង ម៉ានិច លោក សន ពិសិដ្ឋ កញ្ញា ម៉ានីកា កញ្ញា ផាត់ ផាន់ណា និងសិល្បករជាច្រើនរូបទៀត។ក្នុងនោះដែរក៏មានវត្តមានបុគ្គលិកគ្រប់ជាន់ថ្នាក់នៃស្ថានីយទូរទស្សន៍ប៉ុស្តិ៍លេខ៥ផងដែរ។
លោក សន ពិសិដ្ឋបានបញ្ជាក់ថាកន្លងមកថ្មីៗនេះលោកទើបនឹងចាប់ផ្តើមថតភាពយន្តភាគមួយរបស់ទូរទស្សន៍មួយនេះគឺរឿង”សម្បថនិស្ស័យ” រួមគ្នាជាមួយសិល្បករជាច្រើនរូបទៀត។ លោកថាកម្មវិធីជប់លៀងបុគ្គលិកមែនប៉ុន្តែសិល្បករមួយចំនួយក៏ត្រូវបានអញ្ជើញជាភ្ញៀវកិត្តិយសផងដែរដែលបង្ហាញពីការស្រលាញ់រាប់អានរបស់ផលិតករ និងថ្នាក់ដឹកនាំស្ថានីយទូរទស្សន៍ជាមួយសិល្បករ។ លោកថាក្រៅពីផ្តល់ការងារសម្រាប់សិល្បករ ទូរទស្សន៍ក៏ធ្លាប់បានបង្កើតកម្មវិធីជួបជុំជាច្រើនបន្តបន្ទាប់ដើម្បីបង្កើតរូបភាពសកម្មភាពស្រលាញ់រាប់អានគ្នាទៅវិញទៅមក។ លោកអរគុណសម្រាប់ទូរទស្សន៍ប៉ុស្តិ៍លេខ៥ដែលបាន ផ្តល់ឱកាសសម្រាប់លោកនិងសិល្បករជាច្រើនទៀតដើម្បីចូលរួមថតភាពយន្តភាគជាបន្តបន្ទាប់៕
ដោយ វឌ្ឍនា
