អង្គការសហប្រជាជាតិ កាលពីថ្ងៃទី៥ ខែមករា ឆ្នាំ២០១៦ បានប្រញ៉ុចប្រញាប់នៅក្នុងការជួយជំរុញ ក៏ដូចស្នើឲ្យមានការឈានដល់ចុះកិច្ចព្រមព្រៀងសន្តិភាព បញ្ចប់ជម្លោះនៅក្នុងប្រទេសស៊ីរី និងយេមែន ស្របពេលដែលមានការព្រួយបារម្ភដោយសារតែអារ៉ាប៊ីសាអ៊ូឌីតបានផ្តាច់ទំនាក់ទំនងការទូតជាមួយរដ្ឋាភិបាលទីក្រុងតេអេរ៉ង់ផងនោះ ។
លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិបានថ្លែងថា លោកបាន គីមូន បានមានប្រសាសន៍ទៅកាន់រដ្ឋមន្ត្រីការបរទេសអារ៉ាប៊ីសាអ៊ូឌីត លោក Adel al-Jubeir ថា លោក(បានគីមូន)មានការព្រួយបារម្ភជាពន់ពេកចំពោះការផ្តាច់ទំនាក់ទំនងការទូតរវាងប្រទេសអារ៉ាប៊ីសាអ៊ូឌីត នឹងប្រទេសអ៊ីរ៉ង់ ។
អ្នកនាំពាក្យរបស់លោកបាន គីមូន បានបន្តថា លោកអគ្គលេខាធិការបានថ្លែងថា ការឈ្លានពានពីសំណាក់ក្រុមបាតុករទៅលើស្ថានទូតអារ៉ាប៊ីសាអ៊ូឌីតនៅក្នុងទីក្រុងតេអេរ៉ង់នោះវាជារឿងមួយកង្វល់រួចទៅហើយ ប៉ុន្តែការប្រកាសផ្តាច់ទំនាក់ទំនងការទូតរវាងអារ៉ាប៊ីសាអ៊ូឌីត នឹងទីក្រុងតេអេរ៉ង់នោះទៀត ទើបជារឿងមួយគួរឲ្យព្យួយបារម្ភកាន់តែខ្លាំងឡើងទ្វេដង ។
លោក Dujarric បានបន្តទៀតថា លោកបាន គីមូន បានជំរុញផងដែរឲ្យរដ្ឋមន្ត្រីការបរទេសប្រទេសទាំងពីរត្រូវធ្វើយ៉ាងណាគេចពីសកម្មភាពធ្វើឲ្យស្ថានការណ៍កាន់តែពុះកញ្ជ្រោលខ្លាំងឡើងជាងនេះ ទាំងរវាងប្រទេសអារ៉ាប៊ីសាអ៊ូឌីត, ប្រទេសអ៊ីរ៉ង់ និងទាំងនៅតំបន់ទាំងមូល ។
រដ្ឋាភិបាលអារ៉ាប៊ីសាអ៊ូឌីតបានកាត់ផ្តាច់ទំនាក់ទំនងការទូតជាមួយអ៊ីរ៉ង់កាលពីថ្ងៃ៣ ខែមករា ឆ្នាំ២០១៦ ពីរថ្ងៃក្រោយពីបាតុករនៅក្នុងប្រទេសអ៊ីរ៉ង់បានឡោមព័ទ្ធស្ថានទូតអារ៉ាប៊ីសាអ៊ូឌីតប្រចាំនៅទីក្រុងតេអេរ៉ង់ និងធ្វើបាតុកម្មប្រឆាំងតវ៉ាចំពោះទីក្រុងរ៉ីយ៉ាតដែលបានអនុវត្តទោសប្រហារជីវិតបព្វជិតក្នុងសាសនាអិស្លាមនិកាយស៊ីអ៊ីដជាន់ខ្ពស់មួយរូបនោះ ។
លោកបាន គីមូន ចង់ឲ្យមានការធានាពីប្រទេសអ៊ីរ៉ង់ និងអារ៉ាប៊ីសាអ៊ូឌីត ដែលជាគូប្រជែងដណ្តើមឥទ្ធិពលគ្នាក្នុងតំបន់ ហើយអូសបន្លាយពេលវេលាជាយូរលង់ណាស់មក និងជាប្រទេសដែលកំពុងមានទំនាក់ទំនង តានតឹងជាប្រវត្តិសាស្ត្រផងនោះ មានការប្តេជ្ញាចិត្តខ្ពស់នៅក្នុងការស្វែងរកសន្តិភាពនៅក្នុងប្រទេសស៊ីរី និងយេមែន ។ លោក Dujarric បានបន្តថា អ៊ីរ៉ង់ និងអារ៉ាបប៊ីសាអ៊ូឌីតជាអ្នកគាំទ្រក្រុមប្រឆាំងរៀងៗខ្លួន ។
លោក Dujarric បញ្ជាក់ទៀតថា អង្គការសហប្រជាជាតិនឹងជំរុញ ក៏ដូចជាសម្តែងការសង្ឃឹមយ៉ាងមោះមុតថា ស្ថានការណ៍តានតឹងនាពេលបច្ចុប្បន្ននេះនឹងមិនធ្វើឲ្យប៉ះពាល់ ឬជាឧបសគ្គដល់ដំណើរការស្វែងរកសន្តិភាពនៅក្នុងប្រទេសស៊ីរី និងយេមែននោះឡើយ ។
អង្គការសហប្រជាជាតិបានបញ្ជាក់ដែរថា ខ្លួនមានបំណងចង់ឲ្យមានការចរចាសន្តិភាពដោយផ្ទាល់រវាងរដ្ឋាភិបាលស៊ីរី នឹងក្រុមប្រឆាំង ដែលត្រូវធ្វើឡើងនៅទីក្រុងហ្សឺណែវ ថ្ងៃទី២៥ ខែមករា ឆ្នាំ២០១៦ ។ ជាមួយគ្នានេះដែរ អង្គការសហប្រជាជាតិក៏បានជំរុញឲ្យមានកិច្ចព្រមព្រៀងឈប់បាញ់មួយកើតឡើង អំឡុងពេលដែលមានការសម្រប សម្រួលជាអន្តរជាតិរបស់អង្គការសហប្រជាជាតិដើម្បីជំរុញឲ្យបញ្ចប់សង្គ្រាមស៊ីវិលអូសបន្លាយរយៈពេល៥ឆ្នាំនៅស៊ីរី នោះ ។
លោក Dujarric បានបន្តថា អ្នកសម្របសម្រួលបញ្ហាស៊ីរីរបស់អង្គការសហប្រជាជាតិ លោក Staffan de Mistura នៅក្នុងសប្តាហ៍នេះនឹងមានដំណើរទស្សនកិច្ចទៅកាន់ប្រទេសអារ៉ាប៊ីសាអ៊ូឌីត និងប្រទេសអ៊ីរ៉ង់ ខណៈដែលអ្នកសម្របសម្រួលបញ្ហាយេមែន របស់អង្គការសហប្រជាជាតិ លោក Ismail Ould Cheikh Ahmed បានវិលត្រឡប់ទៅកាន់តំបន់នោះនាថ្ងៃទី៦ ខែមករា ។
អ្នកសម្របសម្រួលបញ្ហាស៊ីរីរបស់អង្គការសហប្រជាជាតិ លោក Mistura បានថ្លែងថា ការផ្តាច់ទំនាក់ទំនងរវាងអ៊ីរ៉ង់ នឹងអារ៉ាប៊ីសាអ៊ូឌីតនាពេលនេះ ជាបញ្ហាកង្វល់ជាងគេបំផុត ហើយដែលលោកត្រូវតែស្នើឲ្យមានការធានាជាមុនថា វិបត្តិនេះនឹងមិនធ្វើឲ្យប៉ះពាល់ធំដុំដល់ដំណើរការសន្តិភាពនៅក្នុងតំបន់នោះឡើយ ។
កម្លាំងសម្ពន្ធមិត្តដឹកនាំដោយអារ៉ាប៊ីសាអ៊ូឌីតបានវាយប្រហារដោយទម្លាក់គ្រាប់បែកពីលើដែនអាកាសទៅលើក្រុមចលនា Houthi ដែលជាសម្ពន្ធមិត្តរបស់អ៊ីរ៉ង់នៅក្នុងទឹកដីយេមែនអស់រយៈពេល៩ខែកន្លងមកហើយនោះបានប្រកាសកាលពីចុងសប្តាហ៍មុននេះថា បានបញ្ចប់កិច្ចព្រមព្រៀងឈប់បាញ់កាលពីថ្ងៃទី១៥ ខែធ្នូ ឆ្នាំ២០១៥នោះហើយ ដែលធ្វើឡើងតាមការចង់បានរបស់អង្គការសហប្រជាជាតិដើម្បីបញ្ចប់ជម្លោះនោះ ។
លោក Dujarric បានថ្លែងថា លោកបាន គីមូន បានថ្លែងទៅកាន់លោក Jubeir ថា អារ៉ាប៊ីសាអ៊ូឌីត គួរតែចុះកិច្ចព្រមព្រៀងឈប់បាញ់ថ្មីទៀតនៅក្នុងប្រទេសយេមែន ៕
ប្រែសម្រួល៖ ថាច់ យ៉ាត
