ខេត្តបាត់ដំបង៖ ជនសង្ស័យគ្រឿងញៀនប្រុសស្រី២នាក់ត្រូវបាននគរបាលស្រុកភ្នំព្រឹកខេត្តបាត់ដំបង ធ្វើការបង្ក្រាបចាប់ឃាត់ខ្លួនថែមទាំងរកឃើញដកហូតបានកាំភ្លើងអាកាបត់១ដើមរក្សាទុកខុសច្បាប់ និងថ្នាំញៀនមួយចំនួនទៀតខណៈដែលកម្លាំងនគរបាលឆ្មក់ចូលក្រសោបចាប់បានជនសង្ស័យនៅក្នុងផ្ទះមួយកន្លែង កាលពីរសៀលថ្ងៃទី៥ ខែមករា ឆ្នាំ២០១៦ នៅចំណុចភូមិដំណាក់បេង ឃុំបួរ ស្រុកភ្នំព្រឹក ខេត្តបាត់ដំបង ។
ជុំវិញនៃការបង្ក្រាបជនសង្ស័យគ្រឿងញៀន និងដកហូតបានកាំភ្លើង១ដើមគេមិនទាន់មានសេចក្តីរាយការណ៍ពីសមត្ថកិច្ចឱ្យដឹងថា តើជនសង្ស័យទាំងនោះជាប់ពាក់ព័ន្ធ និងបក្ខពួកក្រុមចោរប្លន់ប្រដាប់អាវុធដែលបានធ្វើសកម្មភាពប្លន់ផ្ទះគ្រូទាយ នៅឃុំខ្នាចរមាស ស្រុកបវេល ខេត្តបាត់ដំបង កាលពីកន្លងទៅថ្មីៗនេះយ៉ាងណានោះទេ។ គ្រាដែលសមត្ថកិច្ចខេត្តបាត់ដំបង កំពុងតាមប្រម៉ាញ់ក្រុមចោរប្លន់ប្រដាប់អាវុធប្លន់ផ្ទះគ្រូទាយនៅស្រុកបវេលដែលវាយម្ចាស់ផ្ទះឱ្យរងរបួស និងប្លន់យកទ្រព្យសម្បត្តិយ៉ាងសន្ធឹកសន្ធាប់បានសម្រេចហើយរត់គេចខ្លួនបាត់អស់ ។ ជនសង្ស័យទាំង២នាក់កំពុងតែស្ថិតក្នុងការសាកសួររបស់សមត្ថកិច្ច ។
ជនសង្ស័យមានឈ្មោះទី១.រឿង រិទ្ធ ភេទប្រុសអាយុ២៩ឆ្នាំ ទី២.ឈ្មោះស គឹមសួង ភេទស្រី អាយុ ១៨ឆ្នាំ ពួកគេទាំង២នាក់បច្ចុប្បន្នរស់នៅភូមិដំណាក់បេង ឃុំបួរ ស្រុកភ្នំព្រឹក ។ សមត្ថកិច្ចដកហូតបានថ្នាំញៀនមេតំហ្វេតាមីនគ្រាប់WY ចំនួន៥គ្រាប់ កាំភ្លើងអាកា៤៧ កាត់កាណុង១ដើម នៅមានគុណភាព៧៥ភាគរយ គ្រាប់ក្នុងបង់២គ្រាប់ សំបកកាទូស២គ្រាប់ ដកហូតបានកាំបិត និងដាវសាំម៉ូរ៉ៃ ៣ដើម កាំភ្លើងឈើកែច្នៃ១ដើម និងសម្ភារៈឧបករណ៍ ប្រើប្រាស់ថ្នាំញៀនមួយចំនួនទៀតផង ។
បច្ចុប្បន្នជនសង្ស័យគ្រឿងញៀនទាំង២នាក់ត្រូវបាននគរបាលស្រុកភ្នំព្រឹកចាប់បញ្ជូន មកកាន់ស្នងការដ្ឋាននគរបាលខេត្តបាត់ដំបងដើម្បីយកមកចាត់ការតាមនីតិវិធីច្បាប់ ៕
ដោយ៖ សំវិច្ឆិកា
