ភ្នំពេញ៖នារីវ័យក្មេងម្នាក់បើករថយន្តលឿនជ្រុលទៅបុកក្បាលនាគពុះចែកទ្រូងផ្លូវបណ្ដាលឲ្យរថយន្តបង្កក្រឡាប់ផ្ងារជើងទ្រមេឃសំណាងល្អអ្នកបើកបរងរបួសស្រាល ។
ហេតុការនេះកើតឡើងកាលពីម៉ោង១១យប់ថ្ងៃទី៣១ ខែមករាឆ្នាំ២០២០ ស្ថិតនៅតាមបណ្ដោយផ្លូវម៉ៅសេទុងកែង និងផ្លូវលេខ១៩៣ ក្នុងសង្កាត់ទួលស្វាយព្រៃទី១ ខណ្ឌបឹងកេងកងរាជធានីភ្នំពេញ។
ប្រភពពត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញនារីវ័យក្មេងម្នាក់បើករថយន្តម៉ាកតូយ៉ូតាព្រូស ពណ៌កណ្ដុរប្រមេះ ពាក់ស្លាកលេខភ្នំពេញ2AF-2302 ធ្វើដំណើរតាមបណ្ដោយផ្លូវម៉ៅសេទុង ក្នុងទិសដៅពីត្បូងទៅជើងយ៉ាងលឿន ខណៈមកដល់ចំណុចកើតហេតុបានរេចង្កូតជ្រុលទៅបុកក្បាលនាគពុះចែកទ្រូងផ្លូវពេញទំហឹងបណ្ដាលឲ្យរថយន្តក្រឡាប់ផ្ងារជើងទ្រមេឃ។ភ្លាមៗនោះសមត្ថកិច្ចមូលដ្ឋានដែលល្បាតនៅក្បែរកន្លែងកើតហេតុបានឃើញហេតុការណ៍នេះបាននាំគ្នាមកជួយគាស់ទ្វារថយន្តយកអ្នកបើកបរចេញមកក្រៅសំណាងល្អរបួសស្រាល។
បន្ទាប់ពីកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចរាចរចុះមកស្ទូចយករថយន្តបង្កទៅរក្សាទុកនៅការិយាល័យចរាចរផ្លូវគោកស្នងការដ្ឋានទីភ្នំពេញរងចាំដោះស្រាយគ្នានៅពីក្រោយ ៕ ជ្រោយពេជ្រ
