ភ្នំពេញ ៖ ក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) និងក្រសួងបរិស្ថាននឹងរៀបចំ «វេទិកាកេសរកូលលើកទី១នៅកម្ពុជា» ។ ស្ថាប័នទាំងពីរនេះនឹងពិធីចុះហត្ថលេខាលើអនុស្សរណៈយោគយល់ ស្តីពីកិច្ចសហប្រតិបត្តិការរវាងអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព-ក្រសួងបរិស្ថាន និងសារមន្ទីរប្រវត្តិសាស្រ្តធម្មជាតិទីក្រុងប៉ារីស នៅថ្ងៃទី១០ ខែកុម្ភៈ ឆ្នាំ២០២០ ចាប់ពីម៉ោង៨៖៣០នាទីព្រឹក ដល់ម៉ោង១៧៖០០នាទីរសៀល នៅទីស្តីការក្រសួងបរិស្ថាន (សាលប្រជុំម៉ុក ម៉ារ៉េត ជាន់ទី៥) ។
នេះបើយោងតាមក្រុមប្រឹក្សាជាតិអភិវឌ្ឍន៍ដោយចីរភាព ដែលបានប្រកាសព័ត៌មាននៅថ្ងៃទី៧ ខែកុម្ភៈ ឆ្នាំ២០២០នេះដោយបញ្ជាក់ថា អគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព មានកិត្តិយសសូមជម្រាបជូនដំណឹងដល់សាធារណជន និងបណ្តាញសារព័ត៌មានជាតិ និងអន្តរជាតិឱ្យបានជ្រាបថា ក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) និងក្រសួងបរិស្ថាននឹងរៀបចំ “វេទិកាកេសរកូលលើកទី១នៅកម្ពុជា និងពិធីចុះហត្ថលេខាលើអនុស្សរណៈយោគយល់ ស្តីពីកិច្ចសហប្រតិបត្តិការរវាងអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព-ក្រសួងបរិស្ថាន និងសារមន្ទីរប្រវត្តិសាស្រ្តធម្មជាតិទីក្រុងប៉ារីស នៅថ្ងៃទី១០ ខែកុម្ភៈ ឆ្នាំ២០២០ ចាប់ពីម៉ោង៨៖៣០នាទីព្រឹក ដល់ម៉ោង១៧៖០០នាទីរសៀល នៅទីស្តីការក្រសួងបរិស្ថាន (សាលប្រជុំម៉ុក ម៉ារ៉េត ជាន់ទី៥) ។
ពិធីនេះ ក្រោមអធិបតីភាពលោក សាយ សំអាល់ ប្រធាន ក.ជ.អ.ច. និងជារដ្ឋមន្រ្តីក្រសួងបរិស្ថាន ដោយមានការអញ្ជើញចូលរួមស្ថាប័ន ស្ថានទូត អង្គការ វិស័យឯកជន អ្នកជំនាញជាតិ និងអន្តរជាតិ សិស្ស និស្សិត និងអ្នកពាក់ព័ន្ធប្រមាណ៥០០នាក់។
ក្រុមប្រឹក្សាជាតិអភិវឌ្ឍន៍ដោយចីរភាពបញ្ជាក់ទៀតថា ទិកានេះរៀបចំឡើងក្នុងគោលបំណងចំនួន៣ដូចខាងក្រោមនេះ ៖
១.បំផុសគំនិតសាធារណជនឱ្យស្រឡាញ់ និងអភិរក្សកេសរកូល
២. ពង្រឹងភាពជាដៃគូ និងផ្សារភ្ជាប់បណ្តាញអ្នកសិក្សាស្រាវជ្រាវកេសរកូលកម្ពុជា
៣. លើកកម្ពស់ជីវភាពប្រជាពលរដ្ឋ តាមរយៈទេសចរណ៍ធម្មជាតិ និងកម្មវិធីនានារបស់មជ្ឈមណ្ឌល និងអភិរក្សកេសរកូល សុខ អាន ភ្នំគូលែន ។ អាស្រ័យសូមអញ្ជើញសាធារណជនបណ្តាញព័ត៌មានជាតិ និងអន្តរជាតិចូលរួម និងផ្តិតព័ត៌មានក្នុងកម្មវិធីតាមការគួរ ៕
