ភ្នំពេញ៖ នារីម្នាក់បានមកដាក់ពាក្យបណ្តឹងនៅប៉ុស្តិ៍នគរបាលទឹកថ្លាក្រោយពីរូបនាងកំពុងជិះម៉ូតូតែម្នាក់ឯងតាមបណ្តោយផ្លូវ២៧១ក្នុងគោលបំណងទៅធ្វើការនៅម្តុំផ្សាស្ទឹងមានជ័យហើយត្រូវក្រុមចោរជិះតាមឆក់យកកាបូបបានសម្រេចបណ្តាលអោយដួលរងរបួសស្រាលរលាត់ដៃរលាត់ជើង ។

ហេតុការណ៍នេះកើតឡើងកាលពីម៉ោង៦ និង៥៥នាទីព្រឹកថ្ងៃទី៧ ខែមករា ឆ្នាំ២០១៦នៅចំណុចមុខផ្សារហេងលី តាមបណ្តោយផ្លូវ២៧១ ភូមិត្រពាំងឈូកសង្កាត់ទឹកថ្លា ខណ្ឌសែនសុខ ។

នារីរងគ្រោះមានឈ្មោះ យូ សុខជៀន អាយុ២៥ឆ្នាំមុខរបរបុគ្គលិកវិន ស្នាក់នៅផ្ទះជួល ភូមិសេប៉េសេ សង្កាត់ទឹកថ្លា ខណ្ឌសែនសុខ និងមានស្រុកកំណើតភូមិត្រពាំងសង្កែ ឃុំត្រពាំងសង្កែ ស្រុកកំពត ខេត្តកំពត ។

តាមសម្តីស្ត្រីរងគ្រោះបានប្រាប់សមត្ថកិច្ចថា នៅមុនកើតហេតុនាងបានជិះម៉ូតូម៉ាកហុងដា សេ១២៥ ពណ៌ខ្មៅស៊េរី២០០៧ពាក់ស្លាកលេខកំពត1B-2123ចេញពីផ្ទះជួលម្នាក់ឯងគោលបំណងទៅធ្វើការនៅម្តុំផ្សារស្ទឹងមានជ័យដោយបើកបរក្នុងទិសដៅពីជើងទៅត្បូងខណៈមកដល់ចំណុចខាងលើស្រាប់តែមានជនសង្ស័យ២នាក់ជិះម៉ូតូហុងដា សេ១២៤ ពណ៌ខ្មៅមិនចាំស្លាកលេខមកពីក្រោយបានធ្វើសកម្មភាពឆក់យកកាបូបស្ពាយជំហៀងរបស់នាងបានសម្រេច ហើយបានបើកគេចខ្លួនទៅត្បូងបាត់ស្រមោលក្នុងករណីនេះបណ្តាលអោយនាងដួលម៉ូតូរងរបួសរលាត់ដៃរលាត់ជើង ។

នារីរងគ្រោះបានប្រាប់អោយដឹងទៀតថា នៅក្នុងកាបូបស្ពាយរបស់នាងមាន ទូរស័ព្ទដៃចំនួន២គ្រឿង លុយចំនួន៥០ដុល្លាអត្តសញ្ញាណប័ណ្ឌសញ្ជាតិខ្មែរ០១សន្លឹកកាតគ្រឺម៉ូតូ១សន្លឹក កាតវិន១សន្លឹក និងឯកសារមួយចំនួន ។

ក្រោយកើតហេតុនារីរងគ្រោះបានត្រឹមតែមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទឹកថ្លាតែប៉ុណ្នោះ ។ គេចាំមើលថាតើលោកមេប៉ុស្តិ៍ទឹកថ្លាស្វែងរកចាប់ខ្លួនជងល្មើសទាំងនោះបានដែរឬយ៉ាងណា ៕

ដោយ៖ តុង សីហា