ជនភៀសខ្លួនមូស្លីនរ៉ូហ៊ីងយ៉ា១៥នាក់បានស្លាប់ និងជាច្រើននាក់ផ្សេងទៀតបាត់ខ្លួននៅថ្ងៃទី១១ ខែកុម្ភៈ ឆ្នាំ២០២០ ក្រោយពីទូកមួយគ្រឿងដឹកមនុស្សប្រហែល១៣០នាក់បានក្រឡាប់លិចស្ថិតនៅឈូងសមុទ្រ Bay Bengal ពេលដែលកំពុងព្យាយាមចូលទៅកាន់ប្រទេសម៉ាឡេស៊ី ។ នេះបើតាមមន្ត្រីឆ្មាំការពារដែនសមុទ្របង់ក្លាសដែសមួយរូប បញ្ជាក់ប្រាប់ប្រភពព័ត៌មានរ៉យទ័រថ្ងៃនេះ ។
បើតាមមន្ត្រីបង់ក្លាដែស ឈ្មោះ Hamidul Islam បានបញ្ជាក់ថា អ្នកនៅលើទូកប្រហែល៧០នាក់ ត្រូវបានជួយសង្គ្រោះ ។ មន្ត្រីរូបនេះបន្ថែមថា ទូកនោះបានធ្វើដំណើរកាលពីព្រឹកថ្ងៃទី១១ ខែកុម្ភៈ ផ្ទុកទៅដោយមនុស្សខុសច្បាប់ភៀសខ្លួនចេញពីជំរុំនៅជិតរមណីយដ្ឋានទីក្រុង Cox’s Bazar ក្នុងប្រទេសបង់ក្លាដែស។ ប្រភពបញ្ជាក់ថា វាអាណោចអាធ័មខ្លាំងណាស់ ។ ទូកដឹកមនុស្សរហូតដល់១៣០នាក់ ខណៈដែលសមត្ថភាពទម្ងន់ផ្ទុកបានតែចំនួន៥០នាក់ប៉ុណ្ណោះ ។
ប្រភពបញ្ជាក់ថា សាកសពស្ត្រី និងកុមារ១៥នាក់ត្រូវបានរកឃើញ បន្ទាប់ពីទូកនេះបានក្រឡាប់លិចនៅជិតដែនកោះ Saint Martin ភាគអាគ្នេយ៍របស់ប្រទេសបង់ក្លាដែស ។
គួរបញ្ជាក់ថា កាលពីឆ្នាំ២០១៧ យោធាមីយ៉ាន់ម៉ាបានបង្ក្រាប បណ្តាលឲ្យជនម៉ូស្លីមរ៉ូហ៊ីងយ៉ាងជាង ៧៣០ ០០០នាក់ភៀសខ្លួនពីមីយ៉ាន់ម៉ាទៅកាន់ប្រទេសជិតខាងគឺបង់ក្លាដែស។
មីយ៉ាន់ម៉ាជាប្រទេសកាន់សាសនាព្រះពុទ្ធដ៏ច្រើនលើសលប់នោះបានច្រានចោលការចោទប្រកាន់របស់អង្គការសហប្រជាជាតិថា កម្លាំងយោធារបស់ប្រទេសនេះធ្វើសកម្មភាពប្រឆាំងទៅលើក្រុមជនភាគតិចរ៉ូហ៊ីងហ៉ា ដោយអំពើ«ប្រល័យពូជសាសន៍»នោះ។
កាលពីវិច្ឆិកា ឆ្មាំការពារដែនសមុទ្របង់ក្លាដែសបានសង្គ្រោះជនភៀសខ្លួនរ៉ូហ៊ីងយ៉ា១២២នាក់ ពីឈូងសមុទ្រ Bay Bengal ខណៈដែលទូករបស់ពួកគេបានធ្វើដំណើរដោយខុសច្បាប់ទៅកាន់ប្រទេសម៉ាឡេស៊ីនោះបានលិច ដោយសារតែបញ្ហាម៉ាស៊ីនខូច ៕
