ខេត្តកំពង់ឆ្នាំង៖ នៅឯសាលាខេត្តកំពង់ឆ្នាំងការប្រារព្ធមហាមិទ្ទិញរម្លឹកខួបលើកទី៣៧ នៃទិវាជ័យជម្នះ៧មករា (៧.១.១៩៧៩-១.៧.២០១៦) បានប្រព្រឹត្តទៅក្រោមអធិបតីភាពសម្តេចចៅហ្វាវាំង គង់ សំអុល ឧបនាយករដ្ឋ មន្ត្រី រដ្ឋមន្ត្រីក្រសួងព្រះបរមរាជវាំង និងមានការចូលរួមពីមន្ត្រីរាជការ កងកម្លាំងប្រដាប់ សហភាពសហព័ន្ធ យុវជន យុវជនកាកក្រហមកម្ពុជា កាយរីទ្ធិជាតិកម្ពុជា និងប្រជាពលរដ្ឋប្រមាណជិត១ម៉ឺននាក់ កាលពីរសៀលថ្ងៃទី០៧ ខែកមរា ឆ្នាំ២០១៦ នៅសាលាខេត្ដកំពង់ឆ្នាំង ។
លោក ឈួរ ច័ន្ទឌឿន អភិបាលខេត្តកំពង់ឆ្នាំង បានបញ្ជាក់ថា៖ ថ្ងៃនេះយើងជួបជុំគ្នាដើម្បីរម្លឹកនូវទិវានៃជ័យជម្នះ៧កមរា ក្នុងស្មារតីគោរពដឹងគុណដ៏ជ្រាលជ្រៅបំផុតចំពោះវីរយុទ្ធជន យុទ្ធនារីនិងអ្នកស្នេហាជាតិដ៏ច្រើនឥតគណនា និងវីរយុទ្ធជននៃកងទ័ពស្ម័គ្រចិត្តវៀតណាមដែលបានប្រយុទ្ធនិងធ្វើពលិកម្មយ៉ាងអង់អាចក្លាហានបំផុត ដើម្បីរំដោះប្រទេសកម្ពុជា។ យើង ទាំងអស់គ្នា សូមលំឱនកាយគោរពដួងវិញ្ញាណក្ខន្ធរបស់ជន រួមជាតិជាងបីលានបីសែននាក់ ដែលត្រូវបានសម្លាប់យ៉ាងអយុត្តិធម៌បំផុតក្រោមរបបប្រល័យពូជសាសន៍ និងសូមឧទ្ទិសបួង សួងសូមឱ្យដួងព្រលឹងរបស់លោកអ្នកទាំងនោះបានទៅកាន់សុគតិភពជារៀងរហូត។
ស្មារតី៧មករា នៅស្ថិតស្ថេរជានិច្ច ក្នុងដួងចិត្តរបស់ប្រជាជនកម្ពុជាទាំងក្នុងពេលបច្ចុប្បន្ន ក៏ដូចអនាគត ដែលនាំយើងឱ្យឈានទៅរកជ័យជម្នះឥតឈប់ឈរ។ ស្មារតី៧មករាបានផ្តល់នូវមេរៀន និងបទពិសោធន៍ជាច្រើនដ៏មានតម្លៃបំផុតសម្រាប់យើងទាំងអស់គ្នា ដើម្បីកសាង និងការពារមាតុភូមិតទៅមុខទៀត។ ស្មារតី៧មករាមានសត្រូវតែមួយប៉ុណ្ណោះ គឺរបបប្រល័យ ពូជសាសន៍ ប៉ុល ពត ដែលបានក្លាយជាបញ្ហា ក្នុងប្រវត្តិសាស្ត្រទៅហើយ។ ដូច្នេះ អ្នកប្រឆាំងនឹងស្មារតី៧មករាគឺជាអ្នកស្រឡាញ់របបប្រល័យពូជសាសន៍ ជាអ្នកប្រឆាំងនឹងដំ ណើរការ លូតលាស់របស់ប្រទេសជាតិ។
លើមូលដ្ឋានរក្សាខ្ជាប់ស្មារតី៧មករា ប្រជាជនយើងបានឆ្លងកាត់ឆ្នាំ២០១៥ជាមួយនឹងការ សម្រេចបានសមិទ្ធផលថ្មីៗទៀត លើគ្រប់វិស័យហើយកំពុងឈាន ចូលឆ្នាំ២០១៦ ប្រកប ដោយសុទិដ្ឋិនិយមយ៉ាងមុតមាំ។ ពេលនេះយើងអាចអះអាងដោយមោទនភាពថា សភាព ការណ៍ទូទៅរបស់កម្ពុជា មានភាពល្អប្រសើរដែលបានឆ្លុះបញ្ចាំងឱ្យឃើញច្បាស់នូវភាពកាន់តែរឹងមាំនៃសន្តិភាព ស្ថិរភាព ការបង្រួបបង្រួមជាតិ ប្រជាធិបតេយ្យ និងនីតិរដ្ឋ។ ភាពចាស់ទុំនៃគណបក្ស ដែលមានអាសនៈក្នុងរដ្ឋសភា បានផ្តល់ក្តីសង្ឃឹមកាន់តែច្រើន ដល់ប្រជាជនទូទៅ ដែលប្រាថ្នាចង់ឱ្យមាតុភូមិខ្លួនបន្តរីកចម្រើន ក្នុងសន្តិភាព និងការផ្សះផ្សារជាតិ ដោយគោរពប្រតិបត្តិខ្ជាប់ខ្លួននូវគោលការណ៍ប្រជាធិបតេយ្យ និងនីតិរដ្ឋ។
នៅក្នុងចំណាប់អារម្មណ៍របស់ខ្លួន តំណាងអង្គមិទ្ទិញបានលើកឡើងថា ថ្ងៃ៧មករា គឺជាទិវាប្រវត្តិសាស្ត្ររបស់ជាតិយើង និងជាថ្ងៃកំណើតទី២របស់ជាតិ និងប្រជាជនកម្ពុជា។យើងខ្ញុំជាស្រទាប់យុវវ័យបន្តវេនជំនាន់ ក្រោយបានយល់ដឹងកាន់តែច្បាស់ថា «បើគ្មានថ្ងៃ ៧មករា យើងពិតជាគ្មានអ្វីៗទាំងអស់ដូចថ្ងៃនេះទេ» នេះជា សច្ចធម៌ប្រវត្តិសាស្ត្រ ដែលមិន អាចមានបុគ្គលណាម្នាក់បដិសេធបានឡើយ»។
យើងខ្ញុំសូមប្រកាសថ្កោលទោសយ៉ាងម៉ឹងម៉ាត់ ចំពោះជនជ្រុលនិយមមួយចំនួន ដែល មួយរយៈកន្លងមកនេះ បានញុះញង់ អុជអាល បំផុសធ្វើបាតុកម្មយ៉ាងអនាធិបតេយ្យ ដែលជា ការពិតសកម្មភាពរបស់ពួកគេ គឺបង្ក អសន្តិសុខ អស្ថិរភាពសង្គម បំផ្លាញដំណើរ ការជា ប្រក្រតីនៃផលិតកម្ម និងជីវភាពសង្គម ការអភិវឌ្ឍប្រទេស ប៉ះពាល់ដល់ជីវភាព រស់នៅរបស់ ប្រជាជនកម្មករ អាជីវករនៅទូទាំងប្រទេស ធ្វើឱ្យអាប់ ឱនដល់កិត្តិយស សេចក្តីថ្លៃថ្នូរ របស់ជាតិ ឆ្លើយទម្លាក់កំហុសមកលើរាជរដ្ឋាភិបាល ក្នុងគោលបំណងផ្តួលរំលំរាជរដ្ឋាភិបាល ស្របច្បាប់ ដែលកើតចេញពីការបោះឆ្នោត ស្របតាមឆន្ទៈប្រជាជន។ យើងខ្ញុំទាំងអស់គ្នាក៏ សូមប្រកាសជាឱឡារិកគាំទ្រចំពោះចំណាត់ការត្រឹមត្រូវតាមច្បាប់ជាធរមានរបស់រាជរដ្ឋាភិ បាល ដែលនាំឱ្យប្រជាជន កម្មករ ទូទាំងប្រទេសសោមនស្សរីករាយគាំទ្រស្វាគមន៍នោះ។
នៅក្នុងមហាមិទ្ទិញនោះ សម្តេចចៅហ្វាវាំង គង់ សំអុល និងមន្ត្រីក្រោមឱវាទបានប្រគេណទ័យ ទានព្រះសង្ឃចំនួន៣៨អង្គ និងបានផ្តល់អំណោយដល់ ក្រុមរបាំ ជូនពរ ក្រុមសិល្បៈសម្តែង ឈុតខ្លីពីសោកនាតកម្ម នៃរបបប្រល័យពូជសាសន៍ផងដែរ៕
ដោយ៖ សំរិត
