ភ្នំពេញ៖ តាមគម្រោងកិច្ចប្រជុំកំពូល ជាមួយថ្នាក់ដឹកនាំកំពូលនៃបណ្តាប្រទេសអាស៊ានទាំង១០ ជាសហរដ្ឋអាមេរិកនឹងត្រូវធ្វើឡើងនៅថ្ងៃទី១៤ ខែមីនា ឆ្នាំ២០២០ នៅទីក្រុងឡាសវេហ្គាស រដ្ឋណេវ៉ាដា ។ ទីបំផុតបែរជាសហរដ្ឋអាមេរិក សម្រេចពន្យារនៃកិច្ចប្រជុំនេះ ដោយសារព្រួយបារម្ភការរីករាលដាល Covid-19

បើតាមការចេញផ្សាយដោយ ទីភ្នាក់ងារព័ត៌មាន Reuters នៅព្រឹកថ្ងៃសៅរ៍ ទី២៩ ខែកុម្ភៈ ឆ្នាំ២០២០ បានអោយដឹងថា៖ សហរដ្ឋអាមេរិកបានសម្រេចចិត្តពន្យារពេលរៀបចំកិច្ចប្រជុំកំពូល ជាមួយថ្នាក់ដឹកនាំកំពូលនៃបណ្តាប្រទេសអាស៊ានទាំង១០ ដែលគ្រោងធ្វើឡើងនៅថ្ងៃទី១៤ ខែមីនា ឆ្នាំ២០២០ ខាងមុននេះ នៅទីក្រុងឡាសវេហ្គាស រដ្ឋណេវ៉ាដា ដោយសារក្តីព្រួយបារម្ភកាន់តែខ្លាំងឡើង ចំពោះការរីករាលដាលនៃវីរុសកូរ៉ូណាថ្មី ឬ COVID-19។
យោងតាមលិខិតរបស់ឯកអគ្គរាជទូតកម្ពុជាប្រចាំសហរដ្ឋអាមេរិក ជំរាបជូនឧបនាយករដ្ឋមន្រ្តី ប្រាក់ សុខន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៩ ខែកុម្ភៈ ឆ្នាំ២០២០ ក៏បានបញ្ជាក់ដែរថា «លោក David Stilwell ឧបការីរដ្ឋមន្រ្តីការបរទេស ទទួលបន្ទុកកិច្ចការអាស៊ី និងប៉ាស៊ីហ្វិក និងលោកក Matthew Pottinger ឧបការីរងរបស់ប្រធានាធិបតី បានជំរាបជូនឯកអគ្គរាជទូត និងឯកអគ្គរដ្ឋទូតអាស៊ាន តាមរយៈកិច្ចប្រជុំតាមទូរស័ព្ទ (Conference Call) នៅថ្ងៃទី២៨ ខែកុម្ភៈ ឆ្នាំ២០២០ថា ប្រធានាធិបតី ដូណាល់ ត្រាំ បានសម្រេចលើកពេលនៃកិច្ចប្រជុំកំពូលពិសេសអាស៊ាន-អាមេរិក ដើម្បីផ្តោតការយកចិត្តទុកដាក់លើការប្រយុទ្ធប្រឆាំងនឹងការរីករាលដាលរបស់មេរោគ Covid-19» ។
សូមជំរាបថា ប្រធានាធិបតីសហរដ្ឋអាមេរិកលោក ដូណាល់ ត្រាំ បានបញ្ជើញមេដឹកនាំកំពូលនៃបណ្តា ប្រទេសអាស៊ានទាំង ១០ មកជួបលោកនៅទីក្រុងឡាសវេហ្គាស (Las Vegas) ដ៏ស៊ីវីល័យរបស់សហរដ្ឋអាមេរិក បន្ទាប់ពីលោកបានខកខានមិនបានទៅចូលរួម កិច្ចប្រជុំកំពូលមួយជាមួយអាស៊ាន កាលពីខែវិច្ឆិកា ឆ្នាំ២០១៩ ក្នុងទីក្រុងបាងកកកប្រទេសថៃ។
សូមបញ្ជាក់ថា៖ ចំនួនអ្នកឆ្លង COVID-19 នៅកូរ៉េខាងត្បូង កើនឡើងយ៉ាងគំហុកដល់ជិត ៣,០០០ករណី និងអ្នកជំងឺ១៦នាក់ស្លាប់។

អាជ្ញាធរកូរ៉េខាងត្បូង ក៏បានប្រកាសផងដែរថា ប្រទេសសរុបចំនួន ៥៨ ហើយ បានធ្វើការរឹតបន្តឹងការធ្វើដំណើរ ជាមួយនិងប្រទេសកូរ៉េខាងត្បូង ដោយសារតែផ្ទុះមេរោគឆ្លង COVID-19 កាន់តែខ្លាំងនោះ៕

ដោយ៖ សិលា