ប៉ូលិសក្រុង San Diego បានស្នើឲ្យសាធារណជនជួយស្វែងរកស្ត្រីអាយុ២៩ឆ្នាំម្នាក់ដែលបាត់ខ្លួន ឈ្មោះ យ៉ុង ច័ន្ទសុធាវី ត្រូវគេប្រទះឃើញលើកចុងក្រោយគឺចាកចេញពីផ្ទះមិត្តភក្តិរបស់ខ្លួនស្ថិតនៅក្នុងទីក្រុង San Diego កាលពីថ្ងៃចន្ទ ។
ស្ត្រីវ័យក្មេងនេះរស់នៅតំបន់ភាគខាងកើត ទីក្រុង San Diego ហើយទំនងជានាងធ្វើដំណើរទៅកាន់មហាវិទ្យាល័យ Everett ក្នុងទីក្រុងវ៉ាស៊ីនតោន ។ នេះបើតាមប៉ូលិស ក្រុង San Diego ។ ប៉ុន្តែទោះបីយ៉ាង ប៉ូលិសបានបញ្ជាក់ថា ស្ត្រីដែលបាត់ខ្លួននេះគ្មានគម្រោងចាកចេញពី San Diego នោះឡើយ ដោយសារថា នាងមិនបានយករបស់របរវត្ថុមានតម្លៃរបស់នាងទៅជាមួយនោះទេ ។
យោងតាម SDPD(ស្នងការប៉ូលិសក្រុងDiego San ) បញ្ជាក់ថា ស្ត្រីរងគ្រោះដែលបាត់ខ្លួននេះមានសញ្ជាតិជាពលរដ្ឋកម្ពុជា និងនិយាយភាសាអង់គ្លេសបានតិចតួចប៉ុណ្ណោះ ។ នាងមានកម្ពស់៥ហ្វីត(feet) ទម្ងន់ប្រហែល១០០ផោន ។ នៅពេលចុងក្រោយបំផុត គេបានប្រទះឃើញនាងស្លៀកពាក់អាវធំពណ៍ខ្មៅ, ខោខ្មៅ និងស្បែកជើងខ្មៅ ។
អ្នកដែលប្រទះឃើញស្ត្រីដូចភិនភាគខាងលើថានៅទីកន្លែងណានោះ សូមទំនាក់ទំនងទៅកាន់ស្នងការប៉ូលិសក្រុង Diego San តាមរយៈលេខទូរស័ព្ទ 619-531-2000 ឬការិយាល័យទទួលបន្ទុកអ្នកបាត់ខ្លួនដែលមានលេខ (619) 531-2277 ៕
ប្រែសម្រួល៖ ថាច់ យ៉ាត
