ភ្នំពេញ៖ ពិតជាកោតសរសើរដល់ទឹកចិត្តតារាចម្រៀងប្រចាំផលិតកម្មសាន់ដេ លោក ឆាយ វីរៈយុទ្ធ និងភរិយាដែល បានប្រកាសឧបត្ថម្ភអង្ករ៦តោនដល់សិល្បករចាស់ជរាគ្រា កូវីដ-១៩ បាននិងកំពុងឆ្លងរាតត្បាត។ ការប្រកាសនេះក៏ក្រោយពេលដែលោកបានចូលរួមបរិច្ចាកថវិកាជួយទៅដល់ការប្រយុទ្ធប្រឆាំង នឹងជំងឺកូវីដ-១៩ កន្លងមកតាមការអំពាវនាវរបស់ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន ។
គេដឹងថា នៅពេលដែលមេរោគកូវីដ-១៩ បានិងកំពុងឆ្លងរាតត្បាតជាសកល ប្រទេសកម្ពុជា ក៏រងផលប៉ះពាល់ផ្នែកសេដ្ឋកិច្ចខ្លះដែរ ជាពិសេសទៅលើចំណូលពីវិស័យសិល្បៈ ខណៈកម្មវិធីប្រគំតន្ត្រី និងពិធីជួបជុំធំៗត្រូវបានលុបចោល។ លោក ឆាយ វីរៈយុទ្ធ និងគ្រួសារដែលជាម្ចាស់រោងម៉ាស៊ីនកិនស្រូវធំមួយនោះ បានឧបត្ថម្ភអង្ករចំនួន៦តោន ដើម្បីឲ្យសមាគមសិល្បៈចាត់ចែង។ នេះបើតាមគណនីហ្វេសប៊ុកលោក ហេង ឡុង។លោកថាអង្ករទាំង៦តោន នឹងត្រូវចាត់ចែងដល់អ្នកសិល្បៈចាស់ជរា ឬមានជីវភាពខ្វះខាតចំនួន៣តោន និងចែកជូនពលរដ្ឋខ្វះខាតចំនួន៣តោន ក្នុងគ្រាដែលមេរោគកូវីដ-១៩ រាតត្បាត មិនមានចំណូលគ្រប់គ្រាន់។ ជាមួយគ្នានេះលោក ភរិយា ព្រមទាំងកូនស្រី ក៏បាបជូនពរបងប្អូនប្រជាជនខ្មែរទូទាំងប្រទេសនិងក្រៅប្រទេសព្រមទាំងប្រជាជនទូទាំងពិភពលោកទាំងមូលសូមជៀសផុតពីជម្ងឺCOVID-19ដ៏កាចសាហាវនេះ ហើយលោកក៏សូមបងប្អូនការពារនិងថែរក្សាសុខភាពឲបានខ្ពស់បំផុតសំរាប់ខ្លួនឯង ក្រុមគ្រួសារ និងប្រទេសជាតិទាំងមូល។
គួរបញ្ជាក់ដែរថាកន្លងទៅថ្មីៗនេះដោយសារជំងឺកូវីដ-១៩ការងារសិល្បៈដូចជាការប្រគុំតន្ត្រីថតភាពយន្តជាច្រើនត្រូវបានលុបចោលដើម្បីបញ្ចៀសការរីករាលដាលនៃជំងឺដ៏កាចសាហាវមួយនេះ។ សម្រាប់សិល្បករដែលមានជិវិភាពមធ្យម និងធូរធាមិនជាបញ្ហាប្រឈមនោះទេប៉ុន្តែសម្រាប់សិល្បករដែលមានជីវភាពក្រីក្រ និងរស់នៅជួលផ្ទះគេស្នានៅ គឺពិតជាមានការប្រឈម។ ការចែករំលែកធនធាន នេះបានឆ្លុះបញ្ចាំងពីទឹកចិត្តសប្បុរសក្នុងគ្រាដែលមនុស្សជាច្រើនកំពុងរស់នៅទាំងលំបាក និងព្រួយបារម្ភ៕
ដោយ វឌ្ឍនា
