លោក អេង ឃាង មេបញ្ជាការកងវរៈសេនាតូចលេខ៣០១ ការពារព្រំដែន នៃតំបន់ប្រតិបត្តិការសឹករងខេត្តតាកែវ ត្រូវបានកូនចៅក្រោមឱវាទប្រមាណ៨០នាក់ កាលពីពេលថ្មីៗនេះបានដាក់ពាក្យបណ្តឹងសុំរកកិច្ចអន្តរាគមន៍ពីប្រមុខរាជរដ្ឋាភិបាល ក៏ដូចជាក្រសួងការពារជាតិ ដោយចោទប្រកាន់ថា បានជាប់ពាក់ព័ន្ធនឹងការប្រព្រឹត្តអំពើពុករលួយ ស៊ីដាច់ លុយកូនចៅសរុបប្រមាណ៥០ម៉ឺនដុល្លារ ។
នៅក្នុងពាក់បណ្តឹងកម្រាស់៩ទំព័រ ក្រុមមន្ត្រីយោធាទាំងនោះបានចោទលោកមេបញ្ជាការវរៈសេនាតូច៣០១ចំនួន១១ចំណុច ដែលក្នុងនោះរួមមានទាំងបញ្ហាបក្ខពួកនិយម និងអំពើពុករលួយ ។ នៅក្នុងពាក្យបណ្តឹងបញ្ជាក់ថា អំពើពុករលួយត្រូវបានលោកមេបញ្ជាការកាត់ប្រាក់ខែមន្ត្រីយោធា២១នាក់, កាត់យកថវិកាសម្រាប់អន្តរាគមន៍, ប្រាក់ប្រេងសាំង, ថវិកាឧបត្ថម្ភរបស់ថ្នាក់ដឹកនាំ និងថវិកាសម្រាប់ផ្នែកសុខាភិបាលដែលសរុបជាទឹកប្រាក់ប្រមាណ៥០ម៉ឺនដុល្លារ។
ក្រៅអំពីនេះ ក្រុមមន្ត្រីយោធាដែលរងគ្រោះបានបញ្ជាក់ថែមទៀតថា លោក អេង ឃាង ក៏បានអនុញ្ញាតឲ្យបក្ខពួកជំរិតទារលុយពីប្រជាពលរដ្ឋដែលរកស៊ីឆ្លងដែននោះទៀតផង ។ គេរាយការណ៍ថា រឿងនេះបានអូសបន្លាយជាយូរណាស់មកហើយ ។ នៅពេលដែលរឿងរ៉ាវបានបែកធ្លាយ លោក អេង ឃាង បានឲ្យដៃជើងរបស់ខ្លួនស៊ើបរកមន្ត្រីយោធាណា ដែលបញ្ចេញព័ត៌មាននេះចេញក្រៅ ។ មន្ត្រីយោធាខ្លះរួញខ្លួន ព្រោះខ្លាចអំណាចលោក អេង ឃាង ៕
