ភ្នំពេញ៖ គ្រោះថ្នាក់ចរាចរណ៍ដ៏រន្ធត់មួយបង្កឡើងដោយសារតែរថយន្តម៉ាករ៉េហ្វមួយគ្រឿង បើកក្នុងល្បឿនលឿនហើយព្យាយាមជែងរថយន្តម៉ាកហ៊ីយ៉ាន់ដាយ ក៏ជ្រុលបុកម៉ូតូឌ្រឹមសង់សេរីឆ្នាំ២០១២ដែលធ្វើដំណើរបញ្ច្រាស់ទិសគ្នាបណ្តាលអោយខ្ទាតទៅប៉ះនឹងរថយន្តហីហ៊ីយ៉ានដាយបោកក្បាលស្លាប់ម្នាក់ និងម្នាក់ទៀតរងរបួសធ្ងន់ ។
កាលពីវេលាម៉ោង៨និង៣០នាទីយប់ ថ្ងៃទី១៣ ខែមករា ឆ្នាំ២០១៦ នៅចំណុចមុខបញ្ជាការដ្ឋានកងទ័ពជើងគោក តាមបណ្តោយផ្លូវជាតិលេខ៤ សង្កាត់កន្ទោក ខណ្ឌពោធិ៍សែនជ័យ បន្ទាប់មករថយន្តបង្កបើកគេចខ្លួនបាត់ស្រមោលចំណែករថយន្តហីុយ៉ាន់ដាយត្រូវសមត្ថកិច្ចឃាត់ជាប់ ។
តាមសាក្សីនៅកន្លែងកើតហេតុបានអោយដឹងថា នៅមុនពេលកើតហេតុ គេបានឃើញជនរងគ្រោះជិះម៉ូតូមួយគ្រឿងម៉ាកឌ្រឹមសង់សេរីឆ្នាំ២០១២ ពណ៌ខ្មៅ គ្មានស្លាកលេខ ធ្វើដំណើរតាមបណ្តោយផ្លូវជាតិលេខ៤ ខណៈមកដល់ចំណុចកើតហេតុ ស្រាប់តែមានរថយន្តម៉ាករ៉េហ្វ មួយគ្រឿងមិនចាំស្លាកលេខធ្វើដំណើរទិដៅពីលិចទៅកើតដោយព្យាយាមជែងរថយន្តមួយគ្រឿងទៀតម៉ាកហ៊ីយ៉ាន់ដាយពណ៍ស ពាក់ស្លាកលេខ កោះកុង 3A 0536 ហើយបានជ្រុលបុកម៉ូតូពេញទំហឹងបណ្តាលអោយម៉ូតូខ្ទាតទៅខ្ទប់នឹងរថយន្តហ៊ីយ៉ាន់ដាយបោកក្បាលស្លាប់ម្នាក់ និងម្នាក់ទៀតរបួសធ្ងន់ ។
សាក្សីដដែលបានបន្តថា បន្ទាប់ពីរថយន្តបង្កបុកម៉ូតូរួចក៏បានបន្ថែមល្បឿងគេចខ្លួនបាត់ស្រមោលតែម្តង ចំណែករថយន្តហីយ៉ានដាយត្រូវបានសមត្ថកិច្ចឃាត់ជាប់ភ្លាមៗតែម្តង។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណែកសពជនរងគ្រោះសមត្ថកិច្ចបានយកទៅតម្កល់ទុកនៅវត្តកំបូល រង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណីនៅស្រុកកំណើត ដោយឡែករថយន្តនិងម៉ូូតូសមត្ថកិច្ចមួយដ្ឋានបានសហការជាមួយជុំនាញធ្វើការវាស់វែងយកទៅការិយាល័យចរាចរណ៍ជើងគោងរាជធានីភ្នំពេញដើម្បីដោះស្រាយតាមផ្លូវច្បាប់៕
ដោយ៖ សុខាសែនជ័យ
