កំពង់ឆ្នាំង៖ មនុស្សពីរនាក់បានវាចេញពីរថយន្ត បន្ទាប់ពីរថយន្តនេះបានធ្លាក់ចូលទៅក្នុងប្រឡាយក្រឡាប់ផ្ងាជើង បន្ទាប់ពីបើកលឿនដល់ផ្លូវកោងបត់មិនទាន់ ។ ហេតុការណ៍នេះបានកើតឡើងនៅម៉ោងប្រមាណជា៥ល្ងាចថ្ងៃទី១៩មេសា២០២០តាមបណ្ដោយផ្លូវជាតិលេខ៥៣ ចំណុចខាងមុខក្លោងទ្វារវត្តព្រះរាមរង្សី ស្ថិតនៅក្នុងភូមិព្រះរាមរង្សី ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។

ប្រជាពលរដ្ឋ ដែលឃើញហេតុការណ៍ខាងលើនេះផ្ទាល់ភ្នែកបានបញ្ជាក់នៅមុនពេលកើតហេតុខាងលើនេះគាត់បានឃើញរថយន្តតូយ៉ូតាកាមរីបាឡែនមួយគ្រឿងពណ៌ខ្មៅ ពាក់ស្លាកលេខ បន្ទាយមានជ័យ២A-៣៤០២ បើកបរដោយបុរសពីរនាក់ មិនស្គាល់អត្តសញ្ញាណក្នុងល្បឿនលឿនធ្វើដំណើរ ក្នុងទិសដៅពីកើតទៅលិចមកដល់ចំណុចផ្លូវបត់ចូលទៅតាមខ្លោងទ្វារផ្លូវវត្តព្រះរាមរង្សី តែដោយល្បឿនលឿនពេកទើបបត់មិនទាន់បណ្ដាលឲ្យរថយន្តធ្លាក់ ចូលទៅក្នុងអូរត្រាំទឹកតែម្ដងទៅក្រឡាប់តែម្តង ។ ក្រោយពេលកើតហេតុក្រឡាប់រថយន្តនោះគេឃើញបុរសពីរនាក់ដែលនៅក្នុងរថយន្តបានវាយបំបែកកញ្ចក់រត់យន្តវាចេញមកដោយសុវត្ថិភាពមិនមានអ្នកណារងរបួសធ្ងន់ធ្ងរទេ ៕ចន្ថា