ភ្នំពេញ៖ បុរសជនជាតិចិនម្នាក់ស្រវឹងស្រាជោគជាំបានបើករថយន្តក្នុងល្បឿនយ៉ាងលឿនរេចង្កូតបុក​រ៉ឺម៉កដែលគេដាក់លក់ដូរលើចិញ្ចើមផ្លូវពេញទំហឹងបណ្តាលឱ្យរងការខូចខាត តែសំណាងល្អមិនមាន​អ្នក​រងរបួស ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង២ និង៥០នាទីរំលងអាធ្រាត្រឈានចូលថ្ងៃទី១៥ ខែមករា ឆ្នាំ២០១៦ នៅចំណុចមុខឃ្លាំងលក់រថយន្តលេខ៣ តាមបណ្តោយផ្លូវម៉ៅសេទុង ស្ថិតក្នុងសង្កាត់បឹងត្របែក ខណ្ឌចំការមន ។

ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្ត HILUX VIGO ពណ៍ទឹកប្រាក់ ពាក់ស្លាកលេខ AT15 2-0110 បើកបរដោយបុរសជនជាតិចិនម្នាក់​ទាំងស្ថានភាពស្រវឹងស្រាជោគជាំក្នុងល្បឿនយ៉ាងលឿន តាមបណ្តោយផ្លូវម៉ៅសេទុងទិសដៅពីលិច​ទៅកើតរេពេញផ្លូវ ខណៈមកដល់ចំណុចកើតហេតុបានរេចង្កូតទៅបុករ៉ឺម៉កម៉ូតូដែលគេដាក់លក់លើ​ចិញ្ចើមផ្លូវពេញទំហឹង បណ្តាលឱ្យខ្ទេចរ៉ាយប៉ាយពេញផ្លូវ សំណាងល្អមិនមានអ្នករងរបួសនោះទេ ។

ប្រភពបន្តថា បន្ទាប់ពីបង្កហេតុបុរសជនជាតិចិនបានព្យាយាមបើករត់គេច តែត្រូវប្រជាពលរដ្ឋ​ដែល​ធ្វើ​ដំណើរ និងអ្នករត់ម៉ូតូឌុប ដេញតាមរហូតដល់មុខមជ្ឍមណ្ឌល គ្រឿងសង្ហារឹម និងអគ្គីសនី​អេសអឹម តាមបណ្តោយផ្លូវព្រះមុន្នីវង្ស កែងនឹងផ្លូវលេខ៣៦០ ទើបឃាត់បាន រីឯរថយន្តបង្កបានរងការ​ខូច​ខាត​ផ្នែក​ខាងមុខយ៉ាងដំណំ ។

ភ្លាមនោះប្រជាពលរដ្ឋបានទំនាក់ទំនងទៅសមត្ថកិច្ចមូលដ្ឋានឱ្យចុះមកអន្តរាគមន៍ និងធ្វើការ​សម្រប​សម្រួល ដោយភាគីខាងបុរសជនជាតិដែលបង្កចេញសងថ្លៃខូចខាត១០០០ដុល្លារបញ្ចប់រឿង នៅនឹងកន្លែងកើតហេតុ ចំណែកភាគីជនរងគ្រោះក៏ព្រមទទួលព្រោះមិនចង់មានរឿងវែងឆ្ងាយរំខានដល់សមត្ថកិច្ច ៕

ដោយ៖ ភារ៉ា ដង្កោ