ខេត្តស្វាយរៀង៖ យុវជនម្នាក់សង្ស័យស្រវឹងស្រាបានបើកម៉ូតូលឿនដូចហោះទៅបុករថយន្តមួយគ្រឿងដែលធ្វើដំណើរឆ្លងកាត់ចំពីក្រោយយ៉ាងពេញទំហឹង កាលពីវេលាម៉ោង៩យប់ថ្ងៃទី១៤ ខែមករា ឆ្នាំ២០១៦ត្រង់ចំណុចផ្លូវបែកជាបួនស្ថិតក្នុងភូមិស្រះវង្ស សង្កាត់-ក្រុងស្វាយរៀង។
បើតាមសមត្ថកិច្ចនគរបាលក្រុងស្វាយរៀងបានឲ្យដឹងថា ជនរងគ្រោះឈ្មោះ យ៉ាន់ រតនា អាយុ២១ឆ្នាំ មានទីលំនៅ ភូមិ ចំបក់គុយ ឃុំ ចំឡង ស្រុក ស្វាយជ្រំ ខេត្ត ស្វាយរៀង ចំណែកឯអ្នកបើករថយន្តហាយឡេនឌ័រក្រោយពីកើតហេតុមិនបានឈប់នោះទេគឺបន្តបើកគេចខ្លួនបាត់ស្រមោលទុកឲ្យជនរងគ្រោះនៅដេកស្ដូកស្ដឹងតែម្នាក់ឯង។
បើតាមប្រជាពលរដ្ឋបានឃើញហេតុការណ៍បានឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាក ហាយឡែនឌ័រ មិនចាំស្លាកលេខធ្វើដំណើរពីលិចទៅកើត លុះមកដល់ផ្លូវបែកជាបួនឆ្លងផ្លូវជិតផុតហើយស្រាប់យុវជនម្នាក់បានបើកបរម៉ូតូមួយគ្រឿងម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១១ ពាក់ស្លាកលេខ ស្វាយរៀង1E-0041 ក្នុងល្បឿនលឿនដូចហោះពីជើងទៅត្បូងហើយសង្ស័យស្រវឹងស្រាចាប់ហ្វ្រាំងមិនទាន់ក៏បុកចំខាងក្រោយរថយន្តហាយឡែនឌ័របណ្តាលឲ្យបោកខ្ទប់នឹងរថយន្ត បាក់ជើងបែកមុខ ហូរឈាមគួរឲ្យញាក់សាច់។
ក្នុងនោះប្រជាពលរដ្ឋឈរមើលនិងរាយការណ៍មកសមត្ថកិច្ចមូលដ្ឋានចុះអន្តរាគមន៍ដឹកជនរងគ្រោះមកកាន់ មន្ទីរពេទ្យបង្អែកខេត្តដើម្បីសង្គ្រោះ៕
...
ដោយ៖ យឹម សុថាន
