ភ្នំពេញ៖ បុរសម្នាក់បើករថយន្តកុងតឺន័រមួយគ្រឿងរេចង្កូតឡើងទៅលើសួនច្បារជ្រុលទៅបុកបង្គោលប៉ាណូផ្សាយពាណិជ្ជកម្មក្រុមហ៊ុនភេសជ្ជៈខាវរ៉ាបាវ មួយដើមបាក់រាបដល់ដីរថយន្តកល់ជាប់ទៅមុខលែងរួច។

ហេតុការណ៍នេះកើតឡើងកាលពីវេលាម៉ោង ១០ យប់ថ្ងៃទី ២៦ខែមេសាឆ្នាំ ២០២០ នៅចំណុចមុខសាលារៀនជម្ពូវ័នតាមបណ្ដោយផ្លូវជាតិលេខ ៤ ក្នុងសង្កាត់ចោមចៅទី៣ ខណ្ឌពោធិ៍សែនជ័យ។

តាមប្រភពព័ត៌មានពីកន្លែងកើតហេតុបានឲ្យដឹងថា៖ មុនកើតហេតុគេឃើញបុរសម្នាក់បើករថយន្តកុងតឺន័រមួយគ្រឿង ម៉ាកHINOក្បាលពណ៌សពាក់ស្លាកលេខភ្នំពេញ3E-6557ធ្វើដំណើរតាមបណ្តោយផ្លូវជាតិលេខ៤ទិសដៅពីកើតទៅលិច លុះមកដល់ចំណុចកើតហេតុខាងលើបានរេចង្កូតមកខាងស្តាំដៃឡើងទៅលើសួនច្បារជ្រុលទៅបុកបង្គោលប៉ាណូមួយដើមសព្វផ្សាយពាណិជ្ជកម្មរបស់ក្រុមហ៊ុនខាវរ៉ាបាវ បាក់រាបដល់ដីរថយន្តបង្កកល់ជាប់នឹងសួនទៅមុខលែងរួច។ ភ្លាមៗនោះតៃកុងរថយន្តបានបើកទ្វារចុះរត់គេចខ្លួនបាត់ស្រមោល។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យនគរបាលចរាចរផ្លូវគោករាជធានីភ្នំពេញរងចាំធ្វើការដោះស្រាយគ្នាទៅតាមផ្លូវច្បាប់៕

ដោយ៖សុខាសែនជ័យ​