ភ្នំពេញ៖ ណាហ្គាវើលបេះដូងសប្បុរស បាននឹងកំពុងចូលរួមចំណែកជាវិជ្ជមានក្នុងការអភិវឌ្ឍន៍សហគមន៍ក្នុងប្រទេសកម្ពុជា។ នៅថ្ងៃទី ១៤ខែមករាឆ្នាំ ២០១៦ណាហ្គាវើលបេះដូងសប្បុរស ដែលដឹកនាំដោយ លោកJames Ma នាយកផ្នែកទំនាក់ទំនងបុគ្គលិកនិងការងារសង្គមណាហ្គាវើល បានឧបត្ថម្ភសម្ភារចង្ក្រានបាយមួយចំនួនធំដល់អង្គការបណ្តុះបណ្តាលកុមារកំព្រាយុវជនពិការនិងស្ត្រីក្រីក្រ ស្ថិតក្នុងខណ្ឌសែនសុខ រាជធានីភ្នំពេញ។
លោក James Maបានមានប្រសាសន៍ថា “នៅពេលដែលណាហ្គាវើលបេះដូងសប្បុរសបានចុះទៅដល់មណ្ឌលកុមារកំព្រាដំបូងលោកស្រីនាយិកា អង្គការបណ្តុះបណ្តាលកុមារកំព្រាយុវជនពិការនិងស្ត្រីក្រីក្របានស្នើសុំដល់ណាហ្គាវើលបេះដូងសប្បុរសឲ្យជួយឧបត្ថម្ភសម្ភារចង្ក្រានបាយ និងអាហារ។ ក្នុងការឆ្លើយតបតាមការស្នើសុំ និងមើលឃើញពីភាពលំបាករបស់កុមារកំព្រាដែលកំពុងតែជួបប្រទះនៅទីនោះណាហ្គាវើលបេះដូងសប្បុរសបានសម្រេចចិត្តឧបត្ថម្ភសម្ភារចង្ក្រានបាយនិងអាហារដល់អង្គការបណ្តុះបណ្តាលកុមារកំព្រាយុវជនពិការនិងស្ត្រីក្រីក្រ ដើម្បីជួយសម្រួលដល់កុមារ។ ពួកគេគឺដូចជាកូនចៅរបស់យើង ហើយពួកគេគួរតែទទួលបានសេចក្តីស្រឡាញ់ និងការយកចិត្តទុកដាក់ពីយើង។ យើងសប្បាយរីករាយដែលឃើញពួកគេរស់នៅដោយសេចក្តីសុខ និងមានអាហារញាំគ្រប់គ្រាន់។យើងសង្ឃឹមថា កុមារទាំងអស់នោះ នឹងខិតខំរៀនបន្ថែមទៀតដើម្បីអនាគតភ្លឺស្វាងរបស់ខ្លួន និងសម្រាប់ប្រទេសកម្ពុជា”។
គាត់បន្ថែមទៀតថា “រហូតមកដល់សព្វថ្ងៃនេះណាហ្គាវើលបេះដូងសប្បុរសផ្តល់នូវការគាំទ្រដល់អង្គការមិនមែនរដ្ឋាភិបាលជាង ១២អង្គការ ក្នុងប្រទេសកម្ពុជា។ យើងបានចែករំលែកនូវសេចក្តីស្រឡាញ់ និងការយកចិត្តទុកដាក់របស់យើង តាមរយៈកម្មវិធី “សេចក្តីប្រាថ្នាក្លាយជាការពិត” ក្នុងឱកាសបុណ្យណូអ៊ែលរបស់យើង ដែលមានកុមារក្រីក្រជា ៥០០នាក់ក្នុងរាជធានីភ្នំពេញ បានទទួលផលប្រយោជន៍ជាមួយនឹងកាដូរបុណ្យណូអ៊ែលរបស់យើងដែលឧប្ថម្ភដោយបុគ្គលិកណាហ្គាវើល។ អ្វីទាំងអស់ដែលបានធ្វើកន្លងមកដោយក្តីសង្ឃឹមថាកុមារក្រីក្រ កុមារកំព្រា និងកុមារផ្ទុកមេរោគអេដស៍ដែលរស់នៅក្នុងមណ្ឌលកុមារកំព្រានិងស្ត្រីម៉ែម៉ាយ នឹងរីករាយជាមួយនិងការរីកចំរើននៃកំណើនសេដ្ឋកិច្ចនៅក្នុងប្រទេសកម្ពុជា”។
លោកស្រីប្រាក់សុខានាយកប្រតិបត្តិនៃអង្គការបណ្តុះបណ្តាលកុមារកំព្រាយុវជនពិការនិងស្ត្រីក្រីក្របានមានប្រសាសន៍ថា “យើងសូមថ្លែងអំណរគុណដល់ណាហ្គាវើលដែលតែងតែបានជួយគាំទ្រដល់អង្គការនិងកុមាររបស់យើង។នាពេលកន្លងមកណាហ្គាវើលបេះដូងសប្បុរសបានឧបត្ថម្ភនូវកាដូរបុណ្យណូអ៊ែល និងអារហារដល់កុមារ និងអង្គការរបស់យើង។ថ្ងៃនេះ ណាហ្គាវើលបេះដូងសប្បុរសបានឧបត្ថម្ភសម្ភារចង្ក្រានបាយដល់ពួកយើង។ អ្វីដែលណាហ្គាវើលបេះដូងសប្បុរសកំពុងធ្វើនេះ គឺជា “វប្បធម៌ចែករំលែក” ហើយយើងសង្ឃឹមថា វប្បធម៌នេះនឹងបន្តទៅថ្ងៃអនាគតទៀត។ តាំងនាមឲ្យកុមារ ខ្ញុំសូមថ្លែងអំណរគុណយ៉ាងជ្រាលជ្រៅដល់ណាហ្គាវើលដែលតែងតែជួយឧបត្ថម្ភអាហារនិងសម្ភារផ្សេងៗទៀតដល់ពួកយើង ហើយបានបង្កលក្ខណៈងាយស្រួលដល់កុមារកំព្រានិងសិស្សានុសិស្សក្រីក្ររស់នៅតាមជនបទ។យើងអាចនិយាយបានថាណាហ្គាវើលជាក្រុមហ៊ុនដែលឈានមុខគេក្នុងការលើកស្ទួយវប្បធម៌ចែករំលែកដូច្នេះក្រុមហ៊ុនផ្សេងៗគួរតែអនុវត្តតាម។ យើងសូមជូនពរឲ្យបុគ្គលិកណាហ្គាវើលទាំងអស់ទទួលបានភាពជោគជ័យក្នុងឆ្នាំថ្មីនេះ” ៕
ដោយ៖ ស ដារ៉ា
