កន្លងមកថ្នាក់ដឹកនាំជាច្រើននៅលើពិភពលោកទាំងប្រធានាធិបតី អាមេរិកដូណាល់ ត្រាំ ប្រធានាធិបតីកូរ៉េខាងត្បូង…បានលើកឡើងពីស្ថានភាពរបស់មេដឹកនាំគីម ជុងអ៊ុន ក្រោយពេលលោកមិនបានបង្ហាញវត្ដមានជាសាធារណៈ ក្នុងព្រឹត្តិការណ៍សំខាន់ៗនៅកូរ៉េខាងជើង ក្នុងនោះមានខួបកំណើតជីតាគីម អុីលស៊ុង។
តាំងពីពេលនោះមានព័ត៌មានជាច្រើនបានផ្សាយពី គីម ជុងអ៊ុន នៅការសន្និដ្ឋាននានាមិនមែនជាការពិត ។ នៅពេលនេះ សូម្បីតែអគ្គលេខាធិការអង្គការសហប្រជាជាតិ លោក Antonio Guterres ក៏បានទទួលស្គាល់ផងដែរថា លោកក៏មិនដឹងព័ត៌មានពាក់ព័ន្ធ គីម ជុងអ៊ុន ដែរ។
សារព័ត៌មាន Press Trust of India នៅថ្ងៃទី១ខែឧសភា បានដកស្រង់សម្តីអគ្គលេខាធិការអង្គការសហប្រជាជាតិ លោក Guterres បានបញ្ជាក់ថា លោក ក៏មិនបានដឹងពីស្ថានភាពសុខភាពរបស់លោកគីម ជុងអ៊ុនហើយ ក៏មិនដឹងថាលោកនៅទីណានោះដែរ។
ចំណែកប្រព័ន្ធផ្សព្វផ្សាយរបស់កូរ៉េខាងជើង ក៏មិនបានផ្សាយថាតើ លោកគីម ជុងអ៊ុន កំពុងធ្វើអ្វីនៅកន្លែងណានោះដែរតាំងពីកិច្ចប្រជុំនៅថ្ងៃទី ១១ខែមេសាមកទល់ពេលនេះ។
ជាមួយគ្នានេះប្រធានាធិបតីអាមេរិក ដូណាល់ ត្រាំ ក៏បានប្រកាសនៅក្នុងសន្និសីទកាសែតថា «ខ្ញុំយល់នៅអ្វីដែលកំពុងកើតឡើងនៅកូរ៉េខាងជើង ហើយខ្ញុំមិនអាចនិយាយអ្វីពី លោកគីម ជុងអ៊ុន នាពេលនេះឡើយ។ ខ្ញុំសង្ឃឹមថាអ្វីគ្រប់យ៉ាងនៅកូរ៉េខាងជើងនិងល្អប្រសើរតែប៉ុណ្ណោះ»។
ប៉ុន្តែកន្លងមក គេហទំព័រ 38 north បានផ្សាយថា កូរ៉េខាងជើង អាចនឹងកំពុងសម្រាកលម្ហែកាយនៅទីក្រុង Wonsan ។ការសន្និដ្ឋាននោះគឺតាមរូបភាពផ្កាយរណបថតឃើញរថភ្លើងសម្រាប់ដឹកគីម ជុងអ៊ុនមានវត្តមាននៅទីនោះ ។ អ្នកឯកទេសវិភាគបានលើកឡើងថាប្រសិនបើដឹងថាមេដឹកនាំ គីម ជុងអ៊ុន នៅទីណា កំពុងធ្វើអ្វីនោះ គេមិនហៅកូរ៉េខាងជើងថាជាប្រទេសសម្ងាត់ និងអាថ៌កំបាំងបំផុតលើពិភពលោកនោះឡើយ។ទាំងនោះជាចំណុចសំខាន់របស់កូរ៉េខាងជើងដែលអាមេរិកមិនហ៊ានវាយប្រហារ៕