ភ្នំពេញ៖ នៅរសៀលថ្ងៃទី៣ ខែឧសភា ឆ្នាំ២០២០ នាយឧត្តមសេនីយ៍ ហុឹម យ៉ាន អគ្គស្នងការរង នគរបាលជាតិ បានផ្ញើរសារដល់មន្ត្រីអនុវត្តច្បាប់ ដែលមានភារកិច្ចរឹតបន្តឹងច្បាប់ចរាចរណ៍ អោយមាន សីលធម៌ សុភាពរាបសារ វិន័យ បន្ទាប់ពីមានបាតុភាពមិនប្រក្រតីពីមន្ត្រី រហូតដល់ ការផាកពិន័យគេ ខ្លួនឯងអត់ស្គាល់បណ្ណបើកបរ ផងនោះ។

នាយឧត្តមសេនីយ៍ ហុឹម យ៉ាន បានជម្រាបជូនទៅស្នងការរង លោកប្រធានការិយាល័យចរាចរណ៍ទូទាំងប្រទេស គ្រប់រាជធានី-ខេត្តដោយបញ្ជាក់ថា៖ ឃើញការងារ ២ថ្ងៃនេះ យើងខិតខំ អនុវត្តការរឹតបន្តឹងច្បាប់ចរាចរណ៍ បានល្អប្រសើរ មានភាពរលូនច្រើន។ ប៉ុន្តែទន្ទឹមនោះ ក៏មានបញ្ហាមួយចំនួនដែលកើតឡើង ក្នុងនោះគឺទី១-អំពីសីលធម៌ វិន័យ គឺយើងមិនទាន់ទន់ភ្លន់ សុភាពរាបសារ អាចមានកន្លែងខ្លះ មានបញ្ហាទំនាស់ជាមួយប្រជាពលរដ្ឋ ហើយមានកន្លែងខ្លះត្រូវប្រជាពលរដ្ឋរិៈគន់វិញ ដូចជាមន្ត្រីរបស់យើងខ្លះអត់ស្គាល់បណ្ណបើកបររថយន្ត ប្រភេទ(ក) ប្រភេទ(ខ) ជាដើម។ល។ នៅប្រកែកជាមួយអ្នកបើកបរជាដើម។ ដូច្នេះស្នើគ្រប់រាជធានី-ខេត្ត លោកស្នងការរង លោកប្រធានការិយាល័យចរាចរណ៍ ទទួលខុសត្រូវ ដឹកនាំ មន្ត្រីរបស់ខ្លួន ទាំងអស់នោះ ខិតខំធ្វើយ៉ាងណា ពង្រឹង វិន័យ សីលធម៌ ហើយអនុវត្តឱ្យត្រឹមត្រូវ ទន់ភ្លន់ សុភាពរាបសារ ជាមួយប្រជាពលរដ្ឋ ។ បញ្ហាទី២-គឺអនុវត្តត្រឹមតែចំណុចដែលបានណែនាំ គឺម៉ូតូមាន៧ចំណុច ហើយរថយន្តមាន ៩ចំណុច មិនអនុញ្ញាតអោយធ្វើអីផ្សេង ត្រួតពិនិត្យអីផ្សេងក្រៅពី៧ និង៩ចំណុចនេះទេ។ ឈប់អោយធ្វើអ្វីឱ្យលើសពីបណ្តាករណីកន្លងទៅ លើសពីការណែនាំ។

សូមបញ្ជាក់ថា៖ ករណីល្មើសខាងម៉ូតូ៧ចំណុច ចំពោះទោចក្រយានយន្ត ត្រីចក្រយានយន្ត ត្រីចក្រយានយន្ត សណ្តោងរុឺម៉ក និងម៉ូតូកង់បួន ក្នុងនោះរួមមាន៖
១-មិនពាក់មួកសុវត្ថិភាព ៦០០០០រៀល
២-មិនគោរពភ្លើង និងផ្លាកសញ្ញាចរារចរណ៍ ១០ ០០០០រៀល
៣-ល្មើសក្នុងការបត់ ការវ៉ាជែង ១០ ០០០០រៀល
៤-ការដឹកលើសចំណុះ ១០ ០០០០រៀល
៥-ស្រវឹង ២៥ ០០០០រៀល ទៅ ១.០០០.០០០រៀល(តាមកម្រិតជាតិអាល់កុល)
៦-គ្មានផ្លាកលេខ ១២ ០០០០រៀល
៧-ទូរស័ព្ទពេលបើកបរ ៨០០០០រៀល(ប្រើបានតែខ្សែក្រវ៉ាត់សម្លេង)។
ដោយឡែកចំពោះយានយន្តធុនស្រាល និងយានយន្តធុនធ្ងន់៩ ចំណុចរួមមាន៖
១-ល្មើសល្បឿន ១២ ០០០០រៀល -៦២៥ ០០០រៀល (តាមល្បឿន+ប្រភេទយាន)
២-ស្រវឹង ៤០ ០០០០រៀល ទៅ ៤ ០០០ ០០០ រៀល(កម្រិតអាល់កុល+ប្រភេទយាន)
៣-គ្មានប័ណ្ណបើកបរ ១២ ០០០០រៀល ទៅ ២៤ ០០០០០រៀល (តាមប្រភេទយាន)
៤-មិនគោរពភ្លើង និងផ្លាកសញ្ញាចរារចរណ៍ ១៥ ០០០០រៀល ទៅ ៣០ ០០០០រៀល (តាមប្រភេទយាន)
៥-ល្មើសក្នុងការបត់ ការវ៉ាជែង ១៥ ០០០០រៀល ទៅ ៣០ ០០០០រៀល (តាមប្រភេទយាន)
៦-មិនពាក់ខ្សែក្រវ៉ាត់សុវត្ថិភាព ៧៥ ០០០រៀល ទៅ ១៥ ០០០០រៀល (តាមប្រភេទយាន)
៧-ការដឹកលើសចំណុះ ១៥ ០០០០រៀល ទៅ ៣០ ០០០០រៀល (តាមប្រភេទយាន)
៨-គ្មានផ្លាកលេខ បណ្ណសំគាល់យាន ១.២០០ ០០០រៀល ទៅ ២.៤០០ ០០០រៀល (តាមប្រភេទយាន)
៩-ទូរស័ព្ទពេលបើកបរ ១២ ០០០០រៀល ទៅ ២២៥ ០០០រៀល (តាមប្រភេទយាន) ប្រើបានតែ ប្រើខ្សែរភ្ជាប់សម្លេង។
សូមរម្លឹកថា៖ តាមពិតទៅ មន្ត្រីអនុវត្តច្បាប់ នឹងទទួលខុសត្រូវចំពោះមុខច្បាប់ផងដែរ នូវសកម្មភាពបំពានច្បាប់ ក្នុងពេលបំពេញមុខងាររបស់ខ្លួន យោងតាមមាត្រា៧៤ នៃច្បាប់ស្តីពី ចរាចរណ៍ផ្លូវគោក។ ក្នុងមាត្រា៧៤ មន្ត្រីនគរបាលចរាចរណ៍ផ្លូវគោកណាដែលនៅក្នុងក្របខ័ណ្ឌមុខងារ ឫក្នុងឱកាសបំពេញមុខងាររបស់ខ្លួន ដែលបានដកហូតយកបណ្ណបើកបរ ផ្លាកលេខ បណ្ណសម្គាល់យានជំនិៈ ឬឃាត់ទុកយានជំនិៈដោយបំពានច្បាប់ ត្រូវផ្តន្ទាទោសដាក់ពន្ធនាគារពី ៦ថ្ងៃ ដល់១ខែ និងពិន័យជាប្រាក់ ពី១០ ០០០០រៀល ទៅ ៨០ ០០០០រៀល ។
ក្នុងករណីដែលមន្ត្រីនគរបាលចរាចរណ៍ផ្លូវគោក ធ្វើឱ្យមានការខូចខាត ឬបាត់បង់ផ្នែកណាមួយ នៃយានជំនិៈ ដែលបានឃាត់ទុក អង្គភាពសាមីត្រូវទទួលខុសត្រូវក្នុងការសងការខូចខាតឬបាត់បង់នោះ។
សូមអំពាវនាវដល់អ្នកប្រើប្រាស់ផ្លូវទាំងអស់ ចូលរួមគោរព អនុវត្តច្បាប់ចរាចរណ៍ផ្លូវគោក ដោយស្មារតី ភ្ញាក់រលឹក និងទទួលខុសត្រូវ ដើម្បីសុវត្ថិភាពផ្ទាល់ខ្លួន និងអ្នកដទៃ៕

ដោយ៖ សុខ ខេមរា