បន្ទាយមានជ័យ​ ៖ នៅវេលាម៉ោង០០ និង០៥នាទី រំលងអាធ្រាត ថ្ងៃទី០៥/០៥/២០២០ កម្លាំងមូលដ្ឋានអាវុធហត្ថហាត់ក្រុងប៉ោយប៉ែត ក្រោមការចង្អុលបង្ហាញពីលោកវរសេនីយ៍ត្រី នួន នីណារ៉ូ មេបញ្ជាការ បានចុះល្បាតការពារសន្តិសុខសណ្ដាប់ធ្នាប់ក្នុងភូមិសាស្រ្តក្រុង រហូតដល់ម៉ោង០៣និង០០នាទីទៀបភ្លឺ នៅចំណុចវត្តថ្មី ស្ថិតក្នុងភូមិបាលិលេយ្យ សង្កាត់/ក្រុងប៉ោយប៉ែត ខេត្តបន្ទាយមានជ័យ បានប្រទះឃើញជនសង្ស័យពីរនាក់ឈរតាមផ្លូវ កម្លាំងបានធ្វើការសួរនាំ ហើយជនសង្ស័យម្នាក់ឈ្មោះ ចក់ លីន ឆ្លើយថា ខ្លួនគេឈរមើលផ្លូវឱ្យមិត្តភ័ក្រគេប្រើប្រាស់គ្រឿងញៀន។ ដូច្នេះកម្លាំងបានធ្វើប្រតិបត្តិការឃាត់ខ្លួនបានជនសង្ស័យចំនួន០១នាក់ទៀត ឈ្មោះ ង៉ែត ជឺយ ហៅ អាកណ្ដុរ និងបានដកហូតវត្ថុតាង កាំបិតចំនួន០៧ដើម ហើយបញ្ជូនមកមូលដ្ឋានអាវុធហត្ថក្រុង ដើម្បីសាកសួរ។
លោកវរសេនីយ៍ត្រី នួន នីណារ៉ូ បានឱ្យដឹងថា តាមចម្លើយសារភាពរបស់ជនសង្ស័យទាំង០២នាក់ ឆ្លើយសារភាពថា ពួកគេកន្លងមកធ្លាប់ប្រើប្រាស់គ្រឿងពិតប្រាកដមែន ហើយកាំបិតទាំងអស់នេះពួកគេដាក់តាមខ្លួនដើម្បីការពារក្រែងមានក្រុមផ្សេងទៀតមករករឿងពួកគេ។ ក្រោយពីបានចម្លើយសារភាព និងមានវត្ថុតាងហើយនោះ កម្លាំងជំនាញព្រហ្មទណ្ឌ អាវុធហត្ថក្រុង បានកសាងសំណុំរឿងបញ្ជូនមកបញ្ជាការដ្ឋានអាវុធហត្ថខេត្តចាត់ការបន្ត។
បច្ចុប្បន្ន ជនសង្ស័យទាំង០២នាក់ និងវត្ថុតាង ត្រូវបានកម្លាំងជំនាញការិយាល័យបទល្មើសព្រហ្មទណ្ឌ អាវុធហត្ថខេត្តបញ្ជូនទៅសាលាដំបូងខេត្តចាត់ការតាមនីតិវិធីហើយ៕សសម