ភ្នំពេញ៖ ជនជាតិកូរ៉េខាងត្បូង២នាក់ ត្រូវយុវសិស្សិវិទ្យាល័យបាក់ទូក២នាក់ បានធ្វើសកម្មភាពឆក់កាបូបស្ពាយមិនបានសម្រេច ខណៈដែលពួកគាត់កំពុងជិះម៉ូតូកង់បីដើរលេងនៅជិតស្ពានអាកាសតិចណូ តែគេចមិនផុតពីកម្លាំងកងរាជអាវុធហត្ថខណ្ឌទួលគោកកំពុងជិះល្បាតចាប់បានភ្លាមៗផងដែរ ។

ករណីឆក់កាបូបស្ពាយជនបរទេសខាងលើនេះ បានកើតឡើងកាលពីវេលាម៉ោង១១ព្រឹកថ្ងៃទី១៨ ខែមករា ឆ្នាំ២០១៦ នៅចំនុចមុខអាគារពន្ធដា ផ្លូវលេខ១២២កែងម៉ៅសេទុង សង្កាត់ទឹកល្អក់១ ខណ្ឌទួលគោក រាជធានីភ្នំពេញ ។

តាមប្រភពព័ត៍មានពីមន្ត្រីកងរាជអាវុធខណ្ឌទួលគោក បានឲ្យដឹងថា ជនសង្ស័យទាំង២នាក់នេះទី១-ឈ្មោះមាស រតនា ភេទប្រុស អាយុ១៧ឆ្នាំ ជនជាតិខ្មែរ មុខរបរសិស្សិថ្នាក់១២E1 វិទ្យាល័យបាក់ទូក ស្នាក់នៅផ្ទះលេខ១៣ ផ្លូវត្រសក់ផ្អែមខណ្ឌដូនពេញ  (ជាអ្នកអង្គុយពីក្រោយធ្វើសកម្មភាពឆក់កាបូប) និងទី២-ឈ្មោះសៀវ ម៉េង ភេទប្រុស អាយុ១៧ឆ្នាំ ជនជាតិខ្មែរ មុខរបរសិស្សិថ្នាក់១២E1 វិទ្យាល័យបាក់ទូក ស្នាក់នៅផ្ទះលេខ៣៦៩ ផ្លូវលេខ១០ ខណ្ឌច្បារអំពៅ  រាជធានីភ្នំពេញ។ ចំណែកឯជនរងគ្រោះឈ្មោះ  Hanui Ju  អាយុ៣១ឆ្នាំ ជនជាតិកូរ៉េខាងត្បូង មុខរបរ ទេសចរណ៍ស្នាក់នៅខុនដូរ កាំកូសីុធី សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ។

វត្ថុតាងចាប់យក៖ ម៉ូតូ០១គ្រឿង ម៉ាកហុងដាសេ១២៥ ពណ៍ខ្មៅពាក់ស្លាកលេខភ្នំពេញ1DD5056 (ជារបស់ជនសង្ស័យធ្វើសកម្មភាព), កាបូប០១  ក្នុងកាបូបមានលុយ១៥៥$ និង២០០០វុន ជារបស់ជនរងគ្រោះបានប្រគល់ជូនជនរងគ្រោះវិញ។

មន្ត្រីកងរាជអាវុធហត្ថដដែរ បានបន្តទៀតថា នៅមុនពេលកើតហេតុនៅវេលាម៉ោង១០ព្រឹកជនរងគ្រោះបានចេញពីខុនដូរកាំសីុធីដោយជិះតុកតុកពីរនាក់ពូរបស់គាត់គោលបំណងទៅវិទ្យាស្ថានបច្ចេកទេសកម្ពុជា(សាលាតិចណូ) ដើម្បីចង់ស្គាល់និងថតរូបលេងជាលក្ខណៈទេសចរណ៍ ប៉ុន្តែតុកតុកក៍បានជិះហួសពេលនោះជនរងគ្រោះក៍បានប្រាប់ឲ្យតុកតុកឈប់ពេលនោះតុកតុកក៍ឈប់ជនរងគ្រោះក៍បានចុះពីលើតុកតុកដោយស្ពាយកាបូបនៅដៃខាងឆ្វេងស្រាប់តែមានជនសង្ស័យ០២នាក់ជិះមកក្បែរធ្វើសកម្មភាពឆក់កាបូបហើយជនរងគ្រោះក៍បានស្រែកចោរៗតែម្តង ពេលនោះកម្លាំងល្បាតរបស់អង្គភាពយើងខ្ញុំដែលកំពុងល្បាតក្បែរនោះដេញតាមចាប់យ៉ាងប្រផាប់ប្រផីងមកដល់ចំនុចផ្លូវ១២២កែងផ្លូវម៉ៅសេទុង សង្កាត់ទឹកល្អក់១ ខណ្ឌទួលគោក ក៍ធ្វើការឃាត់បានជាក់ស្តែងបានតែម្តង។

បច្ចុប្បន្នជនសង្ស័យទាំង២នាក់ និងវត្ថុតាងត្រូវបានបញ្ជូនបន្តទៅទីបញ្ជាការអាវុធហត្ថរាជធានីភ្នំពេញដើម្បីចាត់ការតាមនិតិវិធី ៕

ដោយ៖ ស ដារ៉ា