ខេត្តស្វាយរៀង៖ ផ្ទះមួយខ្នងមានទំហំ៥គុណ៧ម៉ែត្រធ្វើអំពីឈើប្រកស័ង្ខសីជញ្ជំងស្លិកត្នោតត្រូវបានអគ្គីភ័យឆាបឆេះអស់គ្នានសល់ សង្ស័យមានគេលួចដុតខណៈដែលម្ចាស់ផ្ទះ ជាប់រវល់ទៅលេងបងប្អូននៅឯខេត្តក្រចេះ កាលពីវេលាម៉ោង១ និង៣០នាទីយប់ថ្ងៃទី១៨ ខែមករា ឆ្នាំ២០១៦ស្ថិតនៅភូមិថ្នល់ ឃុំសម្បត្តិមានជ័យ ស្រុករមាសហែក ខេត្តស្វាយរៀង។

យោងតាមមន្ត្រីកងរាជអាវុធហត្ថស្រុករំដួលបានអោយដឹងថា ផ្ទះដែលសង្ស័យថាមានមនុស្សលួចដុតមានម្ចាស់ឈ្មោះស្រី ចក់ ភេទប្រុស អាយុ៤៨ឆ្នាំមានមុខរបរ បើករត្រាក់ទ័រ មានទីលំនៅក្នុងភូមិឃុំកើតហេតុខាងលើ។

ប្រភពបន្តថាសម្ភារៈដែលខូចខាតរួមមានខ្សែកទម្ងន់ ០១ជី, ប្រាក់ដុល្លា ២៥០$, ផ្ទាំងសូឡាអាគុយ ចំនួន ០១ គ្រឿង, គ្រែប្រអប់ចំនួន ០១, ពួក ០១ ផ្ទាំង និងសម្ភារៈប្រើប្រាស់សំលៀកបំពាក់ និងចានឆ្នាំងមួយចំនួនធំផងដែរ។

យោងតាមម្ចាស់ផ្ទះ ឈ្មោះ ស្រី  ចក់ បានអោយដឹងថា រូបគាត់បានទៅលេងស្រុកបងប្អូននៅឯខេត្តក្រចេះរីឯប្រពន្ធឈ្មោះហ៊ិនស្រីណា អាយុ៣៤ឆ្នាំមិននៅផ្ទះដែរដោយទៅលេងផ្ទះម្ដាយធម៌នៅឃុំកំពង់ត្រាច ស្រុករមាសហែក។

ដោយ៖ យឹម សុថាន