ភ្នំពេញ៖ ជនសង្ស័យម្នាក់ បានធ្វេីសកម្មភាពលួចម៉ូតូរបស់ប្រជាពលរដ្ឋមួយគ្រឿងបានសម្រេច នៅចំណុចភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ កាលពីវេលាម៉ោង៦ព្រឹកថ្ងៃទី២០ ខែឧសភាឆ្នាំ ២០២០ ហេីយយកទៅដោះដូរគ្រឿង នៅក្នុងបន្ទប់ជួលស្ថិតនៅភូមិព្រៃព្រីងខាងត្បូងទី២ សង្កាត់ចោមចៅទី៣ ខណ្ឌពោធិ៍សែនជ័យ ត្រូវនគរបាលក្របួចជាប់ចំនួន៥នាក់ កាលពីវេលាម៉ោង ៣និង៣០នាទីរសៀលថ្ងៃដដែល ។
មន្រ្តីនគរបាលខណ្ឌពោធិ៍សែនជ័យ បានឲ្យដឹងថា ជនសង្ស័យទាំង៥នាក់ ដែលសមត្ថកិច្ចឃាត់ខ្លួននោះ ទី១ឈ្មោះ ពុំ បុប្ជា ភេទប្រុស មុខរបរមិនពិតប្រាកដ ស្នាក់នៅភូមិទួលពង្រ សង្កាត់ចោមចៅទី១ខណ្ឌពោធិ៍សែនជ័យ រាជធានីភ្នំពេញ ។ ទី២ឈ្មោះ យ៉ាន ពៅ ភេទប្រុស មុខរបរជាងសំណង់ ។ទី៣ឈ្មោះ ញិល សុីញ៉ាន់ ភេទប្រុស មុខរបរកម្មករសំណង់ ។ ទី៤ឈ្មោះ ឈន អុីណា ភេទស្រី មុខរបរកម្មការីនីរោងចក្រ ។និងទី៥ឈ្មោះ សុខ ធា ភេទស្រី មុខរបរកម្មការីនីរោងចក្រ។
ដោយឡែកសម្ភារដកហូតរួមមាន ៖ ម៉ូតូចំនួន២គ្រឿង,ទី១) ម៉ាក គីមកូ (ចិន) ពាក់ស្លាកលេខភ្នំពេញ1CH8991 , ទី២) ម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ1CH3264 ,ដាវកែឆ្នៃមួយដេីម,កាំបិតបុ័ងតោចំនួន១ដេីម និងសម្ភារមួយចំនួនទៀត។
សមត្ថកិច្ចបន្តថា នៅវេលាម៉ោង៦ព្រឹក ថ្ងៃទី២០ ខែឧសភា ឆ្នាំ២០២០ ជនសង្ស័យម្នាក់ឈ្មោះពុំ បុប្ជា បានលួចម៉ូតូរបស់ជនរងគ្រោះមួយគ្រឿងម៉ាកហុងដាឌ្រីម សេ១២៥ពណ៌ខ្មៅ ពាក់ស្លាកលេខភ្នំពេញ1CH3264 ត្រង់ចំណុចភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ បានសម្រេច ហេីយបានយកមកបន្ទប់ជួលស្ថិតនៅភូមិព្រៃព្រីងខាងត្បូងទី២ សង្កាត់ចោមចៅទី៣ ខណ្ឌពោធិ៍សែនជ័យ ដេីម្បីដោះដូរគ្រឿង។ ខណៈកំពុងដោះគ្រឿងដោយមានប្រជាពលរដ្ឋល្អប្រទះឃើញក៏រាយការណ៍សម្ងាត់ ទេីបកម្លាំងជំនាញចុះទៅភ្លាមៗក្របួចជាប់៣នាក់ជាក់ស្តែងតែម្តង ។
បច្ចប្បន្នជនសង្ស័យកំពុងឃុំខ្លួនបណ្ដោះអាសន្ននៅអធិការខណ្ឌដេីម្បីកសាងសំណុំរឿងបញ្ជូនទៅកាន់តុលាការចាត់ការតាមច្បាប់៕ដោយ៖សុខា សែនជ័យ
